Read NQAARIIT NE ROOG Mace 16 Bible Online

Mace 16 - NQAARIIT NE ROOG bible

Mace 16

¹Farisiya waa fo Sadusiya waa a nqetooxiida a Yeesu ndax da ƭeetlooxin. A nqeɗooxaan ndax ta lal a den o anddiloor olaa inoorna na asamaan.

²Yeesu a doona a den ee: «[A yaarangaa, kaa nu layaa yee xan a seeƈ o feet yaam ne asamaan fee a xoolna.

³Nqes ne itam kaa nu layaa yee xaye ta deɓ, yaam asamaan fee mosee.]

⁴Xeet fa soxodu fa ngore’aƭaru fene fesna a Roog a cinj, oxe xeɗaa o anddiloor, ndaa Roog ci’kee a den o anddiloor o lakas olaa refeerna ole Yoona.» A xaƴa den maaga, soo a ret.

⁵Yaa da laqtooxaa kaltaa o maag olaa, daalbe we a mbeec’a o ƥisloox puuru.

⁶Yeesu a laya a den ee: «Mbootooxyo too yetoox no poɗaxnir ke no Farisiya we fo ke no Sadusiya we!»

⁷Maaga, daalbe we a layra yee: «Ne i saqeerna puuru taxu ta layaa keene.»

⁸Yaa Yeesu a andna ke da ŋur-ŋurnoogna, a laya a den ee: «Nuun soo neew o ngim! Xar taxu nu layraa yee nu saqee puuru?

⁹Ndax kaa tig refee na qoox nuun? Ndax kaa nu mbetandooxee puuru ƥetik ke no wiin cuni ƥetik we fo a ƭamba pod ne nu nqaadit’ina?

¹⁰Ndi kaa nu mbetandooxee puuru ɓetuu ƭik ke no wiin cuni nahik we fo a cenjel a pod ne nu nqaadit’ina?

¹¹Nam nu mbaagu o ñak o andit ee refee kaa farna no puuru um ne’aa a nuun? Mbootooxyo poɗaxnir ke no Farisiya we fo ke no Sadusiya we layum a nuun.»

¹²Maaga, a andtu yee refee kaa farna no poɗaxnir mbuuru a ne’oogu a den da mbootoox, ndaa a cangin ale no Farisiya we fo ale no Sadusiya we.

¹³Yaa Yeesu a fadiidna no jegel olaa Kesare faa Filip, a laamta daalbe um ee: «An wiin we a layaa yee o ten o Ƥeenqe no kiin oxe a refu?»

¹⁴A ndoonaan ee: «Leng we kaa layaa yee Saŋ o Paabatiise xe, lakas we a layaa yee Eliya. A jega itam lakas waa na layaa yee Yeremi mbaat o lakas no duleer we.»

¹⁵Yeesu a laamta a den ee: «Nuun o mat, an nu layu yee o ten refum?»

¹⁶Maaga, Simoŋ Piyeer a doonaan ee: «Wo refu Kiristaa fee o Muumucil oxe regteena refna o Ƥeenqe Roog fa ñoow jok fee.»

¹⁷Yeesu a layaan ee: «Ɗaayaa, Simoŋ, o ƥiy Yoona, yaam refee yee cer ke mbaat fo’oy le mbeeñlong o ten, ndaa Faap es fee refna na asamaan.

¹⁸Mi koy, mexe layang ee: Wo refu Piyeer[3]. Took ɓil leene um maxkaa o fog ole no gimu we mi. Fa nqon fee sax waagankiran dara.

¹⁹Xam cooxong xa caafu xe no Maat ne na asamaan. Kuu humoona na adna fee, xan a humel na asamaan itam. Kuu woktoona na adna, xan a woktel na asamaan.»

²⁰Yeesu a maƭooxa a den ee baa lay o leng ee o ten refu Kiristaa fee.

²¹Maaga, Yeesu a fertu o jangnaa daalbe we ten ee a wara o ret Yeerusaleem ndax maak waa fo saasadax maak waa fo jaajangin waa no kebil kaa Moyiis a ñagadilin. Xan a mbarin, ndaa no ñaal ndadkandeer naa, xan a xontoox.

²²Piyeer a sayooxa fo ten, a ref no xasanan ee: «Koo boo muk, o Yaal oxe! Kaaga dalkirang muk!»

²³Kaa koy, Yeesu a geleerooxa, soo a layin ee: «Saytaane, riƈatooxaam! Kaa o bugaam o tolofnoor, yaam a qalaat of mbogree fo a qalaat Roog, a qalaat no kiin oo.»

²⁴Yeesu a laya daalbe um itam ee: «Oxuu bugaxama o reefan, fat a wuus o ñis um, a gadooxaa a kurwaa um, soo a reefanaam.

²⁵Oxe na bugkaa o mucil o ñis um, xan a ñakin, ndaa oxe na ñakkan yaam mi, xan a daawin.

²⁶Xar a jiriiñkaa o kiin ta jeg adna fee fop yaa ta ñakna o laaw um? Ndi xar o kiin a sofitkaa o laaw um?

²⁷O Ƥeenqe no kiin oxe xan a gar kam o ndam Faap um, a yoon fo malaaka um, soo a ɓoxot o kiin oo kiin a pi um.

²⁸No ndigil, mexe layaa a nuun ee: Leng-leng no we ndefna meeke nqonkee, too nga’ee o Ƥeenqe no kiin oxe a garaa kam maat um.»