Read NQAARIIT NE ROOG Mace 18 Bible Online

Mace 18 - NQAARIIT NE ROOG bible

Mace 18

¹Na waxtu faaga, daalbe we a matiida a Yeesu, a laamtin ee: «Ndi an hupu no Maat ne na asamaan?»

²Yeesu a xoya o ndeɓandoong o ndutuuñ, a geennin a ndeer den,

³soo a lay a den ee: «No ndigil, mexe layaa a nuun ee: Nu saktooxangee boo nand nen xa teɓandoong xa tutuuñ, nu ndokkee no maat ne na asamaan.

⁴Ten taxu oxuu neewandooxna boo nen o ndeɓandoong onqene, xan a ref oxe hupna no maat ne na asamaan.

⁵Oxuu genarna o ndeɓandoong o ndutuuñ o mbodu nene yaam mi, mi a genaru.»

⁶«Kaa koy, oxuu tolofnoorna o leng na xa teɓandoong axene ngimna na mi, kaa moƴna no ten ta rokel ɓil unir no cok soo a deɓel no duf laa no maag olaa.

⁷Ndaw sabab took adna fee yaam ke na tolofnooraa wiin we. Tolofnoorel waagee ñak, ndaa ndaw sabab took no xe na ɓisiidan!

⁸Boo o ɓay of mbaat a caf of a ɓekang na bakaad, ɗegeen deɓin koƭu! Rok kam o ñoow ole fo laƈ mbaat fo o ɓay o leng moƴu o jeg a caf a ƭak fo xa ƥay xa ƭaq too deɓel kam fiɗel laa ñufkeerna.

⁹Boo a ngid of a ɓekang na bakaad, luqteen deɓin koƭu! Rok kam o ñoow ole fo a ngid a leng moƴu o jeg a kid a ƭak too deɓel kam fiɗel laa ñufkeerna.»

¹⁰«Mbootooxyo o nqeef o leng na xa teɓandoong axene. Mexe layaa a nuun ee: Waxtu fuu refna malaaka kaa den ndefna kam asamaan kaa nga’aa a tagid Faap es fee na asamaan. [

¹¹Yaam o Ƥeenqe no kiin oxe kaa mucliid ke mo’’ina.]

¹²«Nam a nandu nuun? O kiin a jegangaa paal teemeed, too leng na den a mo, ndax xaƴkee paal qarɓeen ɓetuu nahik fo paal ɓetuu nahik ke na xa coong axe, soo a waaƭik leng ne mo’na?

¹³No ndigil, mexe layaa a nuun ee: A ga’angaan, xan a sawar kupu ke ta sawarna no paal qarɓeen ɓetuu nahik fo paal ɓetuu nahik ke mo’eerna.

¹⁴Naaga koy Faap nuun fee na asamaan a bugteeru o leng na xa teɓandoong axene a mo.»

¹⁵«O pog of a bakaadangaa, reti asin maa nu ndefna nuun ɗik soom. A nan-gilooxangaang, muclaa o pog of.

¹⁶Kaa koy, a nan-gilooxangirang, jangi o kiin o leng mbaat wiin ɗik fa wo, ndax fop a xendandoox na fa lay no seede ɗik mbaat daduk.

¹⁷A fañangaa o nan-giloox a den, layeen mbokatax ne no gimu we. Boo ta fañna o nan-giloox mbokatax ne no gimu we, fat o fi’in nen o kimaƭaru mbaat nen oxaa na rabdinooxaa juuti.»

¹⁸«No ndigil, mexe layaa a nuun ee: Kuu nu ngumna na adna fee, xan a humel na asamaan itam. Kuu nu mbokitna na adna fee, xan a woktel na asamaan.

¹⁹Mexe layahinaa a nuun ee: Boo wiin ɗik a njofoorna ndax da nqeɗ kuu ta waagna waag o ref, yaaga xan Faap es fee refna na asamaan a ci’in a den.

²⁰Muu ɗik mbaat daduk a mbokatoorna no gon es, mexey a ndeer den.»

²¹Maaga, Piyeer a matiida a Yeesu, a laamtin ee: «O Yaal oxe, a caf a podnum warum o waasan o pog es yaa ta tooñaxama? Ndax boo a caf ɓetaa ƭaq a refkaa?»

²²Yeesu a doonaan ee: «Layiroong boo a caf ɓetaa ƭaq, ndaa a caf qarɓeen ɓetuu ƭik boo a caf ɓetaa ƭaq.

²³Ten taxu Maat ne na asamaan kaa nand fo o maad oxaa bugna laac dag um ke da saqanuuna.

²⁴Yaa ta limaa, a ɓisiide oxaa saqanuuna xa qanjar cuni xarɓaxay wurus.[4]

²⁵Ye ta jegeerna ndabid, o yaal mbind um a hebla yee ta jikooxel, ten fo o teem fo xa ƥeem fo ke ta jegna fop, ndax ta rabditel o lad olaa.

²⁶O tag oxaa a dalfooxa o naag giriƥriƥ, a gooknoox mbaambir um, too a layin ee: ‹Yaal mbind, muñanaam, too xam rabdong fop!›

²⁷A yuɗ’a o yaal mbind oxaa lool, too a xaƴa o tag oxaa, a waasanin o lad ole.

²⁸Yaa o tag oxaa a sutooxna maaga, a xeta fo o yoon um oxaa saqanuuna xa qanjar teemeed xaaliis fa nqoolu. A dalfooxaan o ɓoƭ, soo a layin ee: ‹Rabdaam ke saqanaxamoona!›

²⁹O yoon oxaaga a dalfooxa o gooknoox, too a layin ee: ‹Muñanaam, too xam rabdong!›

³⁰Kaa koy, oxaaga nan-gilooxiran sax, too a reta, a wegnin kaso, a cungaa ta rabdin ke ta saqan’uuna.

³¹Yaa yoon um lakas a nga’na ke xewna, a feƭar’a a den lool, too a ndeta a mbetandooxin o yaal mbind den.

³²O yaal mbind oxaa a xoyna o tag oxaa, soo a layin ee: ‹Wo soo ref o tag o soxodu! Mee ndax ye xeɗooxaxamoona, waasan’aaxoong o lad ole wo?

³³Ndax war’iro o yirim o yoon of ne yirmit’oonga?›

³⁴O yaal mbind um a fuuxa lool, too a ɓoxotaan alkaati kaa boo neen a rabdu ke ta saqan’uuna fop.

³⁵Neene Faap es fee na asamaan a fi’kaa a nuun, yaa oxuu refna na nuun a waasaneerna o pog um fo xeeñ letu.»