Read NQAARIIT NE ROOG Mace 2 Bible Online

Mace 2 - NQAARIIT NE ROOG bible

Mace 2

¹Yaa Yeesu a rimteena Betleheem no lanq kaa Yudee, a jopir Herood a refaa o maad, yaal-o-and a inoora no batand, a ngar Yeerusaleem, too a lay ee:

²«Taa o maad oxe no Yaawuur we sogeena o rim? Kaa i nga o xoor um no batand boo ten taxu i ngar ndax i mbaɗooxin.»

³Yaa o maad Herood a nanna kaaga, a jaaxiɗ’a lool too Yeerusaleem fop itam a njaaxiɗ’a nen o ten.

⁴A fokata saasadax maak waa fo jaajangin waa no kebil kaa Moyiis ndeeƭna kam xeet faa fop too a laamit a den ee: «Mam o Muumucil oxe regteena a ware o rimit?»

⁵A ndoonaan ee: «Betleheem no jegel olaa Yudee, yaam kene o tuleer oxe a bind’u:

⁶‹Wo Betleheem, no lanq ke Yudaa, a woora yee moƴiro o neew na saax a maak ake Yudaa, yaam na wo o kelwaar oxe na gaykaa a Isra’el fee refna xeet es a sutoorkaa.› »

⁷Yaa Herood a nanna kaaga, a dalfooxa o xoyin yaal-o-and waa na pet, too a laamit a den a mbane da nga’’ina o xoor ole.

⁸Cinj kaaga, a lula a den Betleheem, a lay ee: «Ndetyo laamit qoolu kaa farna no ndeɓandoong onqe. Nu nga’angaan, yegnaamoo o ten, ndax mi itam um faɗookin.»

⁹Yaa o maad oxaa a layna fa den boo a ƴut, a ndeta. A ƈook’ahina o xoor ole da nga’it’ina no batand, too a mbelakinoox’a lool. O xoor ole a ñaaƴooga mbaambir den boo neen a fadiidu me o ndeɓandoong onqe a reeƭna, soo ta geenoox.

¹¹A ndoka kam mbind naa, too a soƥa maaga o ndeɓandoong onqe fa Mari fee ya um. A ngooknooxa, a mbaɗoox o ndeɓandoong onqe. Cinj kaaga, a apta a tog den, soo a ci’in wurus fa cuuraay fa miir.

¹²Maaga, Roog a maƭooxa a den no ƭaaɗ ee baa nomtoox maa Herood. A ndeefa a ƭat a lakas, soo a nqaad saate den.

¹³Yaa yaal-o-and waa a ndetna, malaaka fee no Yaal oxe a feeñooxa a Yoseef no ƭaaɗ, too a layin ee: «Inooxi jang o ndeɓandoong onqe fa ya um, raay Misira. Moofi maaga boo yaa dakooxoonga o lay lakas, yaam xan Herood a waaƭin o ndeɓandoong onqe ndax ta saŋkin.»

¹⁴Yoseef a inooxa o yeng o njeek, a jang o ndeɓandoong onqe fa ya um, soo a ret Misira.

¹⁵A moofa maaga boo neen Herood a xonu, ndax ke o Yaal oxe a lay’ina, a reefandin no tuleer oxe a fadnoox: «Xoytaam o ƥees Misira.»

¹⁶Yaa Herood a andna yee yaal-o-and waa kaa nax’un, a fuuxa fuux ɗomu. A lula wiin Betleheem fo no caate kaa mbiduuna fop, ndax da mbarik xa teɓandoong xa koor axe njeg’ina xa kiid xa ƭaq mbaat kaa moƴna o neew, a reefandin na waxtu faa yaal-o-and waa a lay’uuna.

¹⁷Maaga, kaa lay’eena na pexey o tuleer oxaa ne’eena Yeremi a fadnoortu:

¹⁸«O wuuq a nane na saate faa Rama, xa lool fo ƭomatax maak, Rakel na loolaa xa ƥeem, too bugee o yaalel, yaam ñoowatee.»

¹⁹Yaa Herood a xonna, malaaka fee no Yaal oxe a feeñooxa a Yoseef no ƭaaɗ kam saax laa Misira.

²⁰A layaan ee: «Inooxi jang o ndeɓandoong onqe fa ya um, too xaad no saax laa Isra’el, yaam we mbug’ina o mbar o goor ole a nqona.»

²¹Yoseef a inooxa, a jang o ndeɓandoong onqe fa ya um, soo a xaad no saax laa Isra’el.

²²Kaa koy, ye ta nanna yee Arkelawos rondand’u a Herood fee faap um no maat naa Yudee, a saɗarooga o fadik maaga. Yaa Roog a dakooxuuna o maƭoox no ƭaaɗ, a reta no jegel olaa Galile,

²³a genik na teeru faa Nasaret. Neene, ke reefandeena no duleer we a fadnooru: «Xan a xoyeel o Naanasaret.»