Read NQAARIIT NE ROOG Mace 24 Bible Online

Mace 24 - NQAARIIT NE ROOG bible

Mace 24

¹Yaa Yeesu a sutoorna no Mbind Roog naa boo a goƭkaa, daalbe waa ten a matiidaan, ndax da lalin ne ta jalteena.

²Maaga, Yeesu a laya a den ee: «Nu nga’a nga keene fop de? No ndigil, mexe layaa a nuun ee: Yoqkee muul leng took muul gend um laa yenkeerna.»

³Yeesu a moofa took o Joong olaa no taxar oliiw kaa, too daalbe we a ngara den soom, a laamtin ee: «Layangi a in, a mbane kaaga xewkaa fo ke na refkaa o anddiloor ole na kar ale wo fo no muukandoong adna?»

⁴Yeesu a doona a den ee: «Mbootooxyo o kiin a nax a nuun,

⁵yaam xan wiin mayu a ngar, a ne’ooxaa gon es, too xan a lay ee: ‹Mi refu Kiristaa fee o Muumucil oxe regteena.› Maaga, xan a nax wiin mayu.

⁶Boo nu nanna coow xire, nan wiin we a laytaa kaa farna na xire, ba nu njaaxiɗ, yaam keene a wara o xew, ndaa refkafulee muukandoong ne.

⁷Xan saax a inooxan saax, maat a inooxan maat, too xan a jeg qeex fo yo’nax lanq na saax a mayu.

⁸Keene fop nen gaaj ɓelafuleer a nandkaa.

⁹Na jamaane faaga, xan wiin we a ƥoxot a nuun nu ñagadilel. Xan a mbarnoor a nuun itam, too xan qeet ke fop a sib a nuun yaam gon es.

¹⁰Xan mayu a mbes o ngim onqe a cinj, too xan a ngodir. Wiin we kaa mbugko sibraa a ndeer den.

¹¹Xan a jeg duleer maamaaɓ mayu waa ngarna, too xan a nax wiin mayu.

¹²Xan o mbeq no wiin mayu a ɓut yaam ne njofaƭar ne a moƴkaa o may.

¹³Kaa koy, oxe na saƭikkaa boo no muukandoong naa, xan a muc.

¹⁴Xan Yegil mbaax nene no Maat ne Roog a waare’el kam adna fee fop ndax ta ref seede no qeet ke fop. Cinj kaaga, xan muukandoong ne a gar.»

¹⁵«Xan nu nga ‹Cakalaaru ke sibdeena›, o tuleer Dañel a ne’oogna, ta fod no mbiñ o tedu nqe. Oxuu na jangaa a ƭelem akene, fat a wootoox a paax!

¹⁶A koom, waa na ndefkaa no jegel olaa Yudee a mbara o ƈufan xa coong axaa.

¹⁷Baa oxe ta soƥkaa no dung-took a fudoox, ndax ta jang ke refna kam a ndok um.

¹⁸Baa oxe na refkaa na xa qol axaa itam a nomtoox, ndax ta jang sabadoor um.

¹⁹Ndaw naqad no rew we na ndefkaa fo fud fo no we na mbugko numnaa a koom!

²⁰Nqeɗyo boog, ndax a kaat ake nuun ndefkee no ndiig mbaat na bes fee na ñootnax ale.

²¹Yaam a koom, xan a jeg coono fa maak faa moseerna o jeg yaa adna godeena ɓaax boo ndiik, too jegkatee nandu neene boo muk.

²²Boo ñaal kaaga a mbañ’aandeena, o leng muckoogee, ndaa xan a mbañel yaam we njileena.

²³A koom koy, boo o kiin a layna a nuun ee: ‹Kiristaa fee o Muumucil oxe regteena oxey mene›, mbaat: ‹Oxaay maana›, ba nu ngimin.

²⁴Xan Kiristaa maamaaɓ fo duleer maamaaɓ a mbeeñ, too xan a mbi’aa xa anddiloor xa magnu fo comlaand, ndax da nax we Roog a jilna sax, a mbaagangaan.

²⁵Yegnaanum a nuun yaaga fadiidafulee.

²⁶Boo nu layeena boog ee: ‹Oxaa na koƥ alaa› ba nu ndet, too bo nu layeena yee: ‹Oxe no tok ke› ba nu ngimin itam,

²⁷yaam ne o hiiñaand a inoortaa no batand boo a sip no mudand, neene a kar ale no Ƥeenqe no kiin oxe a refitkaa itam.

²⁸Me o dal a refna, maaga a tud ake a mbokatoorkaa.»

²⁹«Ndak fo ndak, a cinj coono fa maak faaga, xan njeeƈ ne a nuk, a qoor ale a niifaar, soo xa qoor axe a yenit na asamaan, too xan katil ke ndefna na asamaan a yo’noox.

³⁰Maaga koy, xan o anddiloor ole no Ƥeenqe no kiin oxe a feeñit na asamaan. Xan o qeet oluu refna no lanq ke a faɗoox, too xan a nga o Ƥeenqe no kiin oxe a garaa took a eel ake na asamaan, a yoon fa katil fo o ndam o maak.

³¹Xan a luliid malaaka ke ten fo a luuƥ ale na bugko jibaa a maak, too xan a mbokat we ta jilna na xa saax xa nahaq axe, kaa xotitna no cat boo no cat asamaan.»

³²«Njangityo na naxax ale xotteena no ndun ne. Boo a naaq ake a ƈiƴiidaa too a naf ake a saqtaa, nu anda yee ndiig ne a matiida.

³³Neene itam, boo nu nga’na keene fop, andyo yee o Ƥeenqe no kiin oxe a matiida, oxe paam o don-maax ole.

³⁴No ndigil, mexe layaa a nuun ee: Wiin we na jamaane fene[7] mbaafkee, too keene fop xewee.

³⁵Xan asamaan fo lanq a mbaaf, ndaa fa lay es faafkee boo muk.»

³⁶«No ke farna no ñaal ne fo na waxtu fee o Ƥeenqe no kiin oxe a nomtooxiidkaa, o leng andiran, malaaka ke na asamaan fo o Ƥeenqe sax andiran, Faap fee soom andun.

³⁷Kaa xew’ina na jamaane faa Nowe na dakkaa o xew, yaa o Ƥeenqe no kiin oxe a garkaa.

³⁸Yaam no ñaal kaa adoox’ina o jaɓ o maak olaa, wiin we kaa ñaamoogu, a yeraa, a ndolnireel, a ci’taa xa ƥiy den a tolax, boo na bes faa Nowe a rok’ina na kaal alaa.

³⁹Wiin we yeg’ee taaga dara boo neen o jaɓ o maak olaa a garu, soo a saŋik a den. Naaga a refitkaa itam yaa o Ƥeenqe no kiin oxe a garkaa.

⁴⁰A koom, goor ɗik we na ndefkaa no qol, xan o leng oxe a jangel, o lakas oxe a xaƴel.

⁴¹Rew ɗik we na ndefkaa no unand ke itam, xan o leng oxe a jangel, o lakas oxe a xaƴel.

⁴²Yetooxyo boog, yaam nu andee na bes fee o Yaal nuun a garkaa.

⁴³Nuun moƴu o and ee boo o yaal mbind a and’ina waxtu fee o kuuɗ oxe a garkaa, a yetooxkooga, too xaƴkoogee mbind um a gefel.

⁴⁴Ten taxu, njagandooxyo nuun itam, yaam o Ƥeenqe no kiin oxe xan a gar na waxtu faa nu mboogukeeruuna.»

⁴⁵«O paɗ oxum gore’u too a ƴiƴ boog, ndax o yaal mbind um a xaƴin fo wiin mbind um, ta cooxaa a den ñaamel, yaa waxtu a fadna.

⁴⁶O paɗ oxe o yaal mbind um a soƥkaa ta fi’aa ne warna, a ɗaaya.

⁴⁷No ndigil, mexe layaa a nuun ee: Xan a hooloox o doxnin o jeg um fop.

⁴⁸Kaa koy, boo ta refna o paɗ o soxodu xaa na layaa taa no yiif um ee: ‹O yaal mbind es oxe miñaa a koƥ›,

⁴⁹soo a refat no xawaa faɗ we ta doxneena, a ñaamaa yeraa fo yeeyer say we,

⁵⁰xan o yaal mbind no paɗ oxaaga a gar no ñaal naa ta cungoogeeruuna fo na waxtu faa ta andeerna.

⁵¹Xan a ɗegin teɓ-reɓ, a fokat a las um fo yememaar we, maa xa lool fo ƈaxrand a ñiiñ a ndefkaa.»