Read NQAARIIT NE ROOG Mace 26 Bible Online

Mace 26 - NQAARIIT NE ROOG bible

Mace 26

¹Yaa Yeesu a ƴutna jeetaay leene fop, a laya daalbe um ee:

²«Nu anda yee Xew fee na colandax ale ñaal ƭik soom yoqu ta fadiid, too teen o Ƥeenqe no kiin oxe a ɓoxotitkeel soo a rengel na kurwaa.»

³Saasadax maak we fo maak we fop a mbokatoora no mbind ne no saasadax o maak oxaa ne’eena Kayif.

⁴Kaa njeetaayoogu ndax da mbaag o ndam a Yeesu no ƴiƴ, soo a mbarin,

⁵ndaa a layra a ndeer den ee: «Baa ref kam xew fee, yaam ndik ta jeg ŋaaloor a ndeer no wiin we.»

⁶Yaa Yeesu a refna Betani, kam mbind no yaal a tik-a-maak o ne’e Simoŋ,

⁷o tew a matiidaan a saq o njaq onqaa fi’teena ɓil seeru laa ne’eena albaatar, a yip ƭuumooxel cafeñu. A ɓaxa ƭuumooxel ke fop took xoox le Yeesu, a soƥ ta ñaamaa.

⁸Yaa daalbe waa a nga’na kaaga, fel’ee a den dara, too a laya yee: «Ndi xar yaq fene a ɗaxkaa?

⁹Ƭuumooxel keene a waag’e o jikoox na xaaliis fa mayu, soo a dimle’tel rool we.»

¹⁰Yeesu a yegaan, soo a lay a den ee: «Xar taxu nu njom’andaa o tew oxene? Tig paax a fi’anaxam.

¹¹Rool we owe fa nuun bes fuu refna, ndaa mi, refkiim fa nuun boo faw.

¹²Ye ta yipna ƭuumooxel keene no cer es, a mboy es a fi’anun.

¹³No ndigil, mexe layaa a nuun ee: Muu Yegil mbaax ne a waare’eena kam adna fee fop, xan a betandax no ke o tew oxene a fi’na a laytel maaga itam.»

¹⁴Cinj kaaga, oxaa ne’eena Yudaa o Iskariyot oxe, too a fog’u no xarɓaxay fo ɗik waa a reta maa no saasadax maak waa,

¹⁵too a lay a den ee: «Xar nu ndabidkaxam yaa ɓoxotanuuma a nuun?» Maaga, a ndabdaan xa monjong qarɓeen tadik[9] xaaliis fa nqoolu.

¹⁶No kaa xotitna na waxtu faaga, a waaƭoogata maa ta ɓoxotitna a Yeesu.

¹⁷No ñaal mberaand naa na Xew faa no puuru canja’e ke, daalbe waa a ngara, a lay a Yeesu yee: «Mam bugo i njawantong a cu’ax ale na bes fee na Colandax ale?»

¹⁸A doona a den ee: «Ndetyo na teeru faa, no mbind ndeetar, too layeenoo yee: ‹O Caajangin oxe kaa tee: Waxtu es a mata, too kaam bug o ñaamit a cu’ax ale na bes fee na Colandax ale kam mbind of, mi fo daalbe es.› »

¹⁹Daalbe waa a mbi’a ke Yeesu a hebil’ina a den, too a njawa a cu’ax ale.

²⁰Yaa tigaa yaarna, Yeesu a reera fo xarɓaxay fo ɗik waa.

²¹Yaa da ñaamaa, Yeesu a laya yee: «No ndigil, mexe layaa a nuun ee: Xan o leng na nuun a ɓoxotaam.»

²²Daalbe we a naqadiloox’a lool, too oxuu refna na den a laamtoogaan ee: «O Yaal oxe, mbaar refee mi?»

²³Yeesu a doona a den ee: «Oxe ɓekna o ɓay fa mi no roon ole na ɓoxotkaxam.

²⁴O Ƥeenqe no kiin oxe xan a xon, ne a Pind a Tedu ke a laytuuna no ten. Kaa koy, ndaw sabab took no xe na ɓoxotkaa o Ƥeenqe no kiin oxe. Ñak’el o rim sax moƴ’u no ten.»

²⁵Yudaa fee ɓoxotkooguuna a layaan ee: «O Caajangin oxe, mbaar refee mi?» Yeesu a doonaan ee: «Wo ne’un!»

²⁶Yaa da ñaamaa, Yeesu a janga mbuuru, a barke’in, a xustin, a cooxin daalbe um, soo a lay a den ee: «Njangyo ñaam! Kene refu cer es.»

²⁷A janga o kaas biiñ itam, a gidim a Roog, a cooxin a den, soo a lay ee: «Yeryo teen nuun fop,

²⁸yaam kene refu fo’oy es, fo’oy le no ngiɓoor ne. Kaa ɓaxel ndax mayu a mbaasanel pakaad den.

²⁹Mexe layaa a nuun ee: Yerkatiim kaa inoorna no ndaxar biiñ a refangeerna na bes faa um dakooxkaa o yer fa nuun biiñ fa nqas faa refna kam Maat naa Faap es.»

³⁰Cinj kaaga, a ngima a kim a tedu boo a ƈut, soo a ndet no Joong olaa no taxar oliiw kaa.

³¹Maaga, Yeesu a laya a den ee: «No yeng olene, nuun fop xan nu mbesaam a cinj ne a Pind a Tedu ke a laytuuna yee: ‹Xam war o kaynaak oxe, too xan paal ke no ged le a pictoor.› »

³²Kaa koy, a doona teen ee: «Cinj a qontax es, xam adook a nuun Galile.»

³³Piyeer a doonaan ee: «Lakas we fop a mbesangaang a cinj sax, mi fa xoox es feskiroong a cinj muk.»

³⁴Yeesu a layaan ee: «No ndigil, mexe layang ee: No yeng olene sax, a siik laykee, too layiro boo a caf a tadak ee andiraamo.»

³⁵Piyeer a dakooxaan o lay ee: «Um narangaa o xon fa wo sax, xañkiroong muk!» Daalbe waa fop a laya leng kut ke itam.

³⁶Cinj kaaga, Yeesu a reta no mbiñ onqaa ne’eena Getsemane, a yoon fo daalbe um, soo a lay a den ee: «Moofyo mene, boo um xeɗik maana.»

³⁷A ɓislooxa a Piyeer fo xa ƥiy xa ƭaq axe Sebede. A dalfooxa o naqadiloox, a jaaxiɗ,

³⁸too a laya a den ee: «Xeeñ es kaa gooy lool boo na fa nqon. Yoqyo mene, yetoox fa mi.»

³⁹Yaa ta retna boo a goƭ o ndik, a gooknooxa, a gung, too a xeɗa a Roog ee: «Faap, a waagangaa jeg, fat o kaas coono lene a riƈatoox boo yerkinum. Kaa koy, baa jegit ne bugtanuuma, ndaa ne bugtanoona.»

⁴⁰A nomtooxiida me no daalbe daduk we, soo a soƥ a den da ƭaanaa. A laya a Piyeer ee: «Nu mbaagee o yetoox fa mi waxtu fa leng sax?

⁴¹Yetooxyo too nqeɗ ndax nu yenkee no mbog. Yiif le a jagandooxa, ndaa cer ke kaa ngees.»

⁴²A dakooxa o riƈatoox jaf ɗikandeer, soo a xeɗ ee: «Faap, o kaas coono lene a waagangee riƈatoox too yerinum, fat ke bugoona a jeg.»

⁴³A nomtooxiidahina, too a soƥa a den da ƭaanaa. A kid den kaa nqaaɗ’u.

⁴⁴A dakooxa o waas a den maaga, soo a riƈatoox. No jaf dadkandeer leene itam a xeɗa leng kut ke.

⁴⁵Cinj kaaga, a gara me no daalbe we, a lay a den ee: «Kaa nu maad o ƭaanaa, ñootnooxaa? Waxtu fee a fadiida. Nga’yo, o Ƥeenqe no kiin oxe xan a ɓoxotel ndeer xa ƥay axe no baabakaad we.

⁴⁶Inooxyo i ndet, oxe na ɓoxotkaxam a matiida.»

⁴⁷Yaa Yeesu a maadna o layaa, Yudaa fee reeƭna o leng no xarɓaxay fo ɗik waa a fadiida, a yoon fo faan maak laa saqna laƥ fo xa ƭong. Saasadax maak we fo maak we na xeet fee ngebil’u a den.

⁴⁸Oxe nar’uuna o ɓoxot a coox’a a den o anddiloor olene: «Oxe um foonkaa yoo! Fat nu ndamin!»

⁴⁹Ndak fo ndak, Yudaa a matiida a Yeesu, soo a layin ee: «O Caajangin oxe, hirop!» Cinj kaaga, a foona a Yeesu.

⁵⁰Yeesu a layaan ee: «Xaariit es, ke ɓisiidoonga, fi’een!» Wiin waa ta yoonit’ina a matiida, soo a ndam a Yeesu.

⁵¹O leng no we ndeeƭna fa Yeesu a woosa laƥ um, a facin o tag oxe no saasadax o maak oxaa boo nof naa a ɗeg.

⁵²Maaga, Yeesu a layaan ee: «Nomti laƥ ne no xool um, yaam we na njangkaa laƥ, laƥ na warkaa den.

⁵³Ndax kaa foogiro yee waagaam o xeɗ a Faap es, too yaaga xan a cooxaam ndak fo ndak malaaka kaa ngupna a yaj xarɓaxay fo a yaj a ƭak, a yaj aluu refna a jeg malaaka cuni ɓetuu fa leng?

⁵⁴Kaa koy, yaaga, nam a Pind a Tedu ke a mbadnooritkaa? Fop a wara o jegit ne da laytuuna.»

⁵⁵Na waxtu faaga, Yeesu a laya faan laa yee: «Kaa nu ngaraa, mbi nen waa na mbelaa o kuuɗ, saq laƥ fo xa ƭong ndax nu ndamaam. Yaag oo toox de, bes fuu refna a ndeer nuun moofoogum, jangnaa kam Mbind Roog ne, too nu ndam’iraam.

⁵⁶Kaa koy, keene fop a fadiida, ndax ke duleer we a mbindna a fadnoox.» Maaga, daalbe waa fop a nqaƴaan, a ƈuf.

⁵⁷We ndam’ina a Yeesu a ƥisaan maa no saasadax o maak oxaa ne’eena Kayif. Jaajangin waa no kebil kaa fo maak waa fop a mbokatoora maaga.

⁵⁸Piyeer a reefana a Yeesu, a danganin o ndik boo neen a roku no maax olaa no saasadax o maak oxaa. A moofa fo yeeyetax waa, ndax ta ga ne tige a muukooritkaa.

⁵⁹Saasadax maak we fo Mal maak ne fop kaa mbaaƭanoogu a Yeesu a nox, ndax da mbarin.

⁶⁰Kaa koy, nga’ee dara, ke mayu a mberan’uuna fop oo. Maaga, ɗik a mbadiida, soo a lay ee:

⁶¹«Oxene kaa lay’u yee: ‹Waagaam o gef Mbind Roog ne, soo koy maxatinin no ñaal tadik.› »

⁶²Maaga, o saasadax o maak oxaa a inooxa, a laamtin ee: «Ndax kaa doonkiro dara no ke wiin we a njambang?»

⁶³Yeesu kaa tiimoogu. O saasadax o maak oxaa a dakooxaan o lay ee: «Mexe daaɓoortan a Roog fa ñoow jok fee! Layi a in ndax wo refu Kiristaa fee o Muumucil oxe regteena, refna o Ƥeenqe Roog?»

⁶⁴Yeesu a doonaan ee: «Wo ne’un! Too mexe layaa a nuun ee: Xan nu nga o Ƥeenqe no kiin oxe a moof na ñamaak Roog o Yaal katil, soo a garaa took a eel ake, a inoortiid na asamaan.»

⁶⁵Maaga, o saasadax o maak oxaa a dalfooxa faar toki[10] kaa ten, soo a lay ee: «A wena a Roog! Xar i soxla’atu seede? Nu nana wen le ta wenna a Roog.

⁶⁶Nam a nandu a nuun?» A ndoonaan ee: «Fa nqon soom waru no ten!»

⁶⁷Maaga, a nduxdaan na tagid, a unin tiq, a mbeelin paƭ, too a lay ee:

⁶⁸«Kiristaa, koo fi’ooxaa o tuleer! Gapi oxe fadoonga!»

⁶⁹Yaa Piyeer a moofna no maax olaa, o mbindaand a matiidaan, soo a layin ee: «Wo itam fa Yeesu o Kaagalile xe reeƭo.»

⁷⁰Maaga, a xaña mbaambir no fop too a lay ee: «Andiim ke o ne’aa.»

⁷¹Yaa ta xotna farna fo a carind alaa, o mbindaand o lakas a ga’aan, soo a lay we ndeeƭna maaga yee: «Oxene itam a reeƭa fa Yeesu o Naanasaret oxe.»

⁷²A gaaña, too a daka o lay ee: «Andiim o kiin oxeene.»

⁷³Ɓaatnee dara waa ndeeƭna maaga a matiida a Piyeer, too a layin ee: «Ga’na rek na den fogo, yaam a layooƭ ale wo sax a weejlaang.»

⁷⁴Maaga, a dalfooxa o daaɓoox, a gaañ ee: «Ndeer es fa Roog, andiim o kiin oxeene.» Ndak fo ndak, a siik a laya.

⁷⁵Maaga, Piyeer a wetandooxa ke Yeesu a lay’uuna yee: «A siik laykee, too layiro boo a caf a tadak ee andiraamo.» A inooxa maaga, a naag ciic a lool.