Read NQAARIIT NE ROOG Mace 28 Bible Online

Mace 28 - NQAARIIT NE ROOG bible

Mace 28

¹Na diiboor faa, a cinj bes faa na ñootnax alaa, Mari-Magdala fa Mari fa lakas fee a ƥiiɓa a ƭeetik a mboy alaa.

²Maaga, lanq ke a yo’nooxa, yaam malaaka no Yaal oxe kaa fudoortiid’u na asamaan. A berenga ɓil laa weg’ina a mboy alaa, too a moof took um.

³Nen o hiiñaand a nand’u, toki ke ten a ndanig boo fur.

⁴Yeeyetax waa a ndiida boo a meeñaa.

⁵Malaaka faa a laya rew we yee: «Nuun o mat, ba nu ndiid, yaam andaam ee Yeesu fee rengeena na kurwaa nu mbaaƭaa.

⁶Refatee mene, a xontooxa ne ta layit’uuna a nuun. Ngaryo nga me ta wondin’eena.

⁷Ndetyo no ñofu, too lay daalbe um ee: ‹A xontooxa a ndeer no xon we, too oxaa adookaa a nuun Galile. Maaga nu nga’itkan.› Keene soom um laykaa a nuun.»

⁸A ndalfooxa o ndiƈatoox a mboy alaa, a ndiid, too a ƭaay itam. A ƈufa, a yegnikin daalbe um.

⁹Maaga, Yeesu a xetooxiida a den too a lay ee: «Nu mbeedee jam!» A matiida, ndax da nduq a caf um. A ngooknooxa mbaambir um, soo a mbaɗooxin.

¹⁰Yeesu a laya a den ee: «Ba nu ndiid, ndaa ndetyo lay xa teɓ es i nqetik Galile. Maaga a nga’itkaxam.»

¹¹Yaa rew we a ndetaa, leng-leng no yeeyetax waa a ndoka kam teeru faa, soo a yegin saasadax maak waa ke xew’ina.

¹²Waaga a mbokata maak waa, a njeetaay a ndeer den, soo a coox xiixire waa xaaliis fa mayu,

¹³too a lay a den ee: «Fat nu lay ee: ‹Daalbe um kaa ngar no yeng ole, a nguuɗ o dal ole, a soƥ i ƭaanaa.›

¹⁴Gofornoor fee a yegangaan, xan i neexlin, yaaga koy ba nu njaaxiɗ.»

¹⁵Yeeyetax waa a njanga xaaliis faa, soo a ndeef kaa da lay’eena. Kaaga a nannooxa kam Yaawuur we boo xaye.

¹⁶Daalbe xarɓaxay fo o taalbe leng oxaa a ndeta Galile, no joong olaa Yeesu a tox’ina a den.

¹⁷Yaa da nga’na a Yeesu, a ngooknooxa mbaambir um den fop, soo a mbaɗooxin. Kaa koy, leng-leng na den a njega a yiif-a-ƭak.

¹⁸Yeesu a matiida a den, a lay ee: «Ci’eem sañ-sañ fuu refna na asamaan fo na adna.

¹⁹Ndetyo mbi’ik qeet ke fop daalbe. Mbatiise’yo a den no gon le na Faap fee fo Ƥeenqe fo Yiif Tedu le,

²⁰too njangin a den da ngay ke hebluuma fop. Mexey fa nuun bes fuu refna boo maa adna fee a daykaa.»