Read NQAARIIT NE ROOG Mace 9 Bible Online

Mace 9 - NQAARIIT NE ROOG bible

Mace 9

¹Yeesu a roka no suk, a gadandoox o maag olaa, soo a gar na teeru um.

²Maaga, a ɓisiide o ƥoof oxaa wondneena no njong. Yeesu a ga’a o ngim den, too a laya o ƥoof oxe yee: «Saƭakinooxi, o ƥees, yaam pakaad of a mbaasane.»

³Took ɗelem laaga, leng-leng no jaajangin waa no kebil kaa Moyiis a laya na yiif den ee: «O kiin oxene a wena a Roog!»

⁴Kaa koy, Yeesu a anda a qalaat den, too a laya a den ee: «Xar taxu nu njeg a qalaat a paaxeer na yiif nuun?

⁵Xar moƴu yooɓ o layel: ‹Pakaad of a mbaasane› ndi lay ee: ‹Inooxi ñaaƴ›?

⁶Kaa koy, kaam bug nu and ee o Ƥeenqe no kiin oxe a jega sañ-sañ faa ta waasantaa pakaad na adna fee.» Maaga, a laya o ƥoof oxe yee: «Inooxi, jang njong of, too xaad!»

⁷O ƥoof oxaa a dalfooxa o inoox, soo a xaad no mbind um.

⁸Yaa wiin waa a nga’na kaaga, diid a dama a den, too a ƥoxota a Roog o ndam, ten fee ci’na wiin we sañ-sañ fa mbodu neene.

⁹Yaa Yeesu a inoorna maaga, a ga’a o kiin oxaa moofna maa wiin waa a ndabditoogna juuti, too a ne’el Mace. Yeesu a layaan ee: «Reefanaam!» Mace a inooxa, a reefanin.

¹⁰Yaa Yeesu a refna kam mbind Mace, waa mbogna no we ndabdinooxoogna juuti fo baabakaad lakas mayu a ngara. Yeesu fo daalbe um a ndeera fa den, a ñaamaa.

¹¹Farisiya waa a nga’a kaaga, too a laya daalbe we yee: «Xar taxu o Caajangin nuun a ñaamaa fo we na ndabdinooxaa juuti fo baabakaad we?»

¹²Yaa Yeesu a nanuuna, a laya yee: «Refee yee we mbodna soxla’u o baawaadin, ndaa jiru we.

¹³Njangikyo ke fa lay fene a tekitna: ‹Yirmande moƴanaxam sadax.› Xoyiidiim wiin jofu we, ndaa baabakaad we.»

¹⁴Daalbe we Saŋ o Paabatiise xe a ngara me Yeesu, too a laamtin ee: «Xar taxu iniin Farisiya weyiin i ngooraa, too daalbe we wo naangee o ngooraa?»

¹⁵Yeesu a doona a den ee: «Ndax we na ngulookaa a mbaaga ñak o sawar yaa o kor-no-kulook oxe a refna fa den? Ñaal ke o kor-no-kulook oxe a refkateerna fa den owe ngaraa, too yaaga xan a ngoor.

¹⁶O leng kacitkee ndoki nogoyu o seegiit o xas, yaam xan o seegiit ole a ɓisloox a seek no ndoki ne, too yaaga xan o quuy ole a ɓaatoox.

¹⁷O leng ñolandkee biiñ fa nqas kam poxos kiid mbaat xan poxos ke a ngef, biiñ fee a ɓaxoox, soo poxos ke a ñakel. Biiñ fa nqas kam poxos qas a ñolandteel, ndax biiñ fee fo poxos ke a miñ.»

¹⁸Yaa Yeesu a maadna o layaa fa den kaaga, kelfa fa leng a fadiida, a gooknoox me ten too a lay ee: «O ƥees o ndew kaa sogaa xon ndiiki, ndaa gari doonin o ɓay too xan a ñoowatin.»

¹⁹Yeesu a inooxa, ten fo daalbe um, too a reefanin.

²⁰O tew oxaa jir’ina, yaam ne ta ga’oogna tap, too ɗegroogee boo xa kiid xarɓaxay fo xa kiid xa ƭaq, a garta a Yeesu a cinj, a matiidin, soo a duq o noflax ole no ndoki ne ten,

²¹yaam kaa layoogu no yiif um ee: «Um waagangaa o duq ndoki um soom, xam wod.»

²²Yeesu a wiƈaqilooxa, too yaa ta ga’uuna a layaan ee: «O ƥees, saƭakinooxi, yaam o ngim of a muclaang.» Na waxtu faaga sax sax o tew oxaaga a wodu.

²³Yaa Yeesu a fadiidna no mbind naa na kelfa faa boo a ga faafak we fo combol le no wiin waa,

²⁴a laya a den ee: «Ndiƈatooxyo, yaam o ndoog onqe xonee, kaa ɗaanaa soom.» Maaga, wiin mayu a nqaadnooxooga a Yeesu.

²⁵Yaa wiin mayu waa a sutooxna, Yeesu a roka, soo a dam o ndoog onqaa no ɓay ta inoox.

²⁶Ke xew’ina a nannooxa boo kam caate kaa matna maaga fop.

²⁷Yaa Yeesu a inoorna maaga, fuul ɗik a ndeefanaan, soo a layaa a maak ee: «Wo o Ndaan Dawid! Ngela yirmi a in!»

²⁸Yaa da mbadna no mbind naa, fuul waa a matiida a Yeesu, soo ta lay a den ee: «Ndax nu ngima yee waagaam o fi ke nu nqeɗaxam?» A ndoonaan ee: «O Yaal oxe, waagaano o fi moos!»

²⁹Maaga, a duqa a kid den, a lay ee: «Fat nu mbi’antel o ten ne nu ngimtuuna.»

³⁰A kid akaa den a mbetooxa. Yeesu a maƭooxa a den ee: «Mbootooxyo o lakas a yegin!»

³¹Kaa koy, yaa wiin waaga a sutooxna, a ndalfooxa o laytaa gon um no caate kaa mbidna maaga fop.

³²Yaa da sutooxaa, Yeesu a ɓisiide oxaa jini a muumandna.

³³Yaa jini faa a raxeena, o kiin oxaa a laya. Kaaga a bet’a wiin waa fop boo a tax da layaa yee: «Tig nandu nene mosaand o ga Isra’el boo Isra’el a xet!»

³⁴Farisiya waa koy kaa layoogu yee: «Na pexey o maad oxe no cini ke a raxtaa cini ke.»

³⁵Yeesu a reefanooga teeru ke fo caate ke, a jangnaa kam pind a qeƭ kaa, too a waare’aa Yegil mbaax ne no Maat ne Roog. A wodandooga jir luu refna fo nqiiboon nuu refna.

³⁶Yaa ta ga’na wiin mayu waa, a yuɗ’aan lool, yaam kaa nqij’u too a yogorlooxaa nen paal kaa njegeerna o kaynaak.

³⁷Maaga, a laya daalbe um ee: «A saxad ale a magna, ndaa jaajal we mayee.

³⁸Nqeɗyo o Yaal a saxad ale boog, ndax ta luliid jaajal na saxad ale ten.»