Read NQAARIIT NE ROOG Mark 1 Bible Online

Mark 1 - NQAARIIT NE ROOG bible

Mark 1

¹Keeke refu mberaandoong ne no Yegil mbaax ne na laytaa kaa farna na Yeesu Kiristaa, o Ƥeenqe Roog.

²Neene ke bind’eena no safe le no tuleer Esayi a fadnoortu, ye ta layna yee: «Mexe heblaa o tuleer es ta adooxong, a jagandanong a ƭat.

³Keeke refu o ñuxur ole na falalooxaa kam a koƥ-a-ƥor alaa yee: ‹Sexanyo o Yaal oxe a qal, njofandanin a ƭat.› »

⁴Saŋ a feeña kam a koƥ-a-ƥor alaa, a batiise’aa, too a waare’aa yee: «Mbesyo pakaad nuun a cinj, mbatiise’el, too xan Roog a waasan a nuun.»

⁵Wiin we no jegel ole Yudee fo we ngenna Yeerusaleem fop a ndetooga maa Saŋ, too a batiise’ooga a den kam o xuluɓ ole Yordaan, cinj yaa da mbeejilna pakaad den.

⁶Saŋ ndoki naa fi’teena a ƥiñ ngeeleemb a rokooxoogu, a saqaa o kumnoor ƭool no ndet um. Soƈ fo suum ke na xa yulumbuum axe a ñoowtoogu.

⁷A waare’ooga, too a layaa yee: «Oxe na reefaniidaxam moƴaxam o jeg doole, too ƴuug fekit xa ñaaƭ um sax a jombaxam.

⁸Mi, mexe batiise’taa a nuun foofi, ndaa ten o mat, xan a batiise’it a nuun Yiif Tedu le.»

⁹Na pe akaaga, Yeesu a inoortiida na teeru faa Nasaret no jegel olaa Galile, too Saŋ a batiise’aan kam o xuluɓ ole Yordaan.

¹⁰Ndak fo ndak, yaa Yeesu a sutooxaa foofi laa a ga’a asamaan fee a xaajoox. Yiif le Roog a fudooxiida took um, a saxit nen a nuukuur.

¹¹O ñuxur a nannoorta na asamaan ee: «Wo refu o Ƥees onqe fexuuma fex, na wo felakinoortum.»

¹²Ndak fo ndak, Yiif le Roog a dalfooxa o riñ a Yeesu kam a koƥ-a-ƥor alaa.

¹³A refa maaga boo ñaal qarɓeen nahik kaa Saytaane a fogan. A reeƭa fo ƥaaɓaan ke, too malaaka ke a ndagooxoogaan.

¹⁴Cinj yaa Saŋ a ɓekeena kaso, Yeesu a reta kam o jegel olaa Galile, a waare’aa Yegil mbaax ne hatna na Roog.

¹⁵Kaa layoogu yee: «Waxtu fee a fada, too Maat ne Roog a matiida. Mbesyo pakaad nuun a cinj, too njaɓ Yegil mbaax ne.»

¹⁶Yaa Yeesu a ñaaƴaa na ƥeeraamb alaa no Maag olaa Galile a ga’a a Simoŋ fa Andare fee o ndeɓ Simoŋ feene. Kaa ndeɓoogu mbaal kam o maag olaa, yaam faafaal a ndeeƭu.

¹⁷Yeesu a laya a den ee: «Ndeefaamoo, too xam fi a nuun faafaal no wiin.»

¹⁸Ndak fo ndak, a nqaƴa paal kaa den, too a ndeefanin.

¹⁹Yaa Yeesu a retna boo a yaac o goƭ, a ga’a xa ƥiy axe Sebede ndefna Saak fa Saŋ fee o ndeɓ um. Kaa ndeeƭu kam suk den, a nqendandaa paal den.

²⁰Ndak fo ndak, Yeesu a xoya a den, too a nqaƴa a Sebede fee faap den fo jaajal waa kam suk naa, a ndeefanin.

²¹Yeesu fo daalbe we ten a ndeta na teeru faa Kapernawum, too yaa bes fee na ñootnax ale a fadiidna, a roka kam mbind a qeƭ naa, a jangnaa.

²²Wiin waa nan’uuna a njaaxiɗ’a na cangin um. Kaa jangnitoogu nen oxaa jegna sañ-sañ, too refee nen jaajangin we no kebil ke Moyiis.

²³Maaga, a jeg’a kam mbind a qeƭ naa o koor oxaa jini a dam’ina. A wuuqa,

²⁴a lay ee: «Yeesu o Naanasaret oxe, xar i nqetu? Ndax kaa o saŋkiid a in? Andaam oxe refoona: Wo refu o Tedu xe hatna na Roog.»

²⁵Yeesu a ŋala jini fee, a layin ee: «Naagi muut! Sutooxi no kiin oxene!»

²⁶Jini fee a yo’na o kiin oxaaga fa doole, a sutooxin soo a wuuq a maak.

²⁷Wiin waa fop a ndiid’a, a ndefat no laamtiraa yee: «Xar kene? A cangin a qas alaa yoonna fa sañ-sañ! O kiin oxene kaa heblaa cini ke sax, too kaa nananan.»

²⁸Ndak fo ndak, gon le Yeesu a joota kam o jegel olaa Galile fop.

²⁹Yaa Yeesu fo daalbe we ten a sutooxna mbind a qeƭ naa, a ndeta no mbind Simoŋ fa Andare, a yoon fa Saak fa Saŋ.

³⁰O seemir o tew Simoŋ kaa wondoox’u yaam cer um kaa sum’u. Yaa Yeesu a fadiidna, wiin waa a layaan o ten no ñofu.

³¹Maaga, a matiidaan, a damin no ɓay, soo a inin. A sumaan ale a xaƴaan, too o tew oxe a inooxa ndax ta genar a den.

³²No yaar olaa cinj yaa njeeƈ ne a mudna, wiin waa a ƥisiida me Yeesu we njir’ina fop fo we cini a ndam’ina.

³³Saax laa fop kaa mbokatoor’u na carind alaa no mbind ne.

³⁴Yeesu a wodanda wiin mayu waa xa ƭomel xa pogreer a ndamna, too a raxa cini mayu itam. Xaƴoogee cini ke da lay, yaam a anda oxe Yeesu a reeƭna.

³⁵No feet olaa ƥiiɓ teel, a soƥ ta maad o niɓaanaa, Yeesu a inooxa a sutoox mbind naa. A reta boo tafil saate faa no mbiñ o mbootu, soo a ref no xeɗaa.

³⁶Simoŋ fo yoon um a ndeta a mbaaƭkin.

³⁷Yaa da nga’uuna, a layaan ee: «Fop owe mbaaƭang.»

³⁸Kaa koy, Yeesu a doona a den ee: «Fat i ndet o mbiñ o lakas, kam caate ke matna. Waraam o waare maaga itam yaam keene taxu um gar.»

³⁹Neene, Yeesu a reta kam Galile fop. Kaa waare’oogu kam pind a qeƭ ke no saax le, too a raxaa cini ke.

⁴⁰Maaga, o yaal a tik-a-maak a gara maa Yeesu, a gooknoox mbaambir um. A ƴufginooxaan, a layin ee: «A felangaang, waagaxamo o xooland.»

⁴¹A yuɗ’a a Yeesu lool. A letna o ɓay um, a duqin, too a layin ee: «A felaxam, xooli!»

⁴²Ndak fo ndak, a tik-a-maak alaa ten a wata, too a xoola.

⁴³Cinj kaaga, Yeesu a maƭooxaan, soo a heblin ta ret ndak fo ndak,

⁴⁴a layin ee: «Wootooxi o lay dara o kiin o lakas. Reti laltinook maa no saasadax oxaa, too sadaxit ke Moyiis a hebilna we nqoolandeena, ndax fop a seede yee xoolaa.»

⁴⁵Kaa koy, o kiin oxeene a reta muu refna, a yegnitik ke ta fi’an’eena. Yaam keene, Yeesu waag’atee o feeñ kam teeru ke. Kaa sutooxoogu tafil, a ret no mbiñ o mbootu, soo wiin we a inooraa muu refna, a ngaraa me ten.