Read NQAARIIT NE ROOG Mark 10 Bible Online

Mark 10 - NQAARIIT NE ROOG bible

Mark 10

¹Yeesu a inoora maaga, a ret no jegel olaa Yudee fo kaltaa o xuluɓ ole Yordaan. Wiin mayu a ndakooxa o mbokatoor a paam um, too a jangnooga a den, ne ta mer’uuna o fi’taa.

²Farisiya waa a matiidaan, ndax da ƭeetlooxin. A laamtaan ee: «Ndax o kiin a waaga o waas o teem?»

³Yeesu a doona a den fo laamit nene yee: «Kebil num Moyiis a cooxu a nuun ee?»

⁴A ndoona yee: «Moyiis a laya yee: O kiin a waaga o cooxit o moon baasin olaa lalitna yee a waasa o teem soo a xaƴ o teem.»

⁵Maaga, Yeesu a laya a den ee: «A qeeñ a saƭku ke nuun taxu Moyiis a coox a nuun kebil neene,

⁶ndaa no mberaand naa na sak ale, ‹Roog a saka o koor, a sak o tew.›, ne ta bindteena.

⁷‹Ten taxu o koor a xaƴaa a faap um fa ya um, a hiɓoor fo o teem,

⁸den ɗik da ndefat njer leng kut.› Naaga ndefkatee ɗik, ndaa o leng kut a ndefatu.

⁹Yaag boog, baa o kiin a xaaj ke Roog a fokatna.»

¹⁰Yaa da ndefna kam mbind naa, daalbe we a ndakooxaan o laamit kaa farna no keene.

¹¹Yeesu a laya a den ee: «Oxuu waasna o teem, soo a gilig o lakas, a seeqa, a ɗap o teem a ƭat.

¹²O tew oxuu xeɗna o kor um o cok um, soo a dolookan o lakas, a seeqa.»

¹³Yeesu a ɓisiide xa teɓandoong xa tutuuñ, ndax ta duq a den. Kaa koy, daalbe waa a nqasanooga waa ƥisiid’ina a den.

¹⁴Yaa Yeesu a ga’na kaaga, a ɗom’aan, too a laya daalbe we ten ee: «Nqaƴyo xa teɓandoong axe da ngar me mi. Ba nu mbañit a den, yaam we nandna fa den njegu Maat ne Roog.

¹⁵No ndigil, mexe layaa a nuun ee: Oxuu jaɓeerna Maat ne Roog nen o ndeɓandoong, waagkee o rok teen muk.»

¹⁶Cinj kaaga, a ɓopa a den, a doon oxuu refna xa ƥay, soo a barke a den.

¹⁷Yaa Yeesu a refna na ƭat a retaa, o koor a ƴufiida me ten, a gooknoox mbaambir um, too a laamtin ee: «O Caajangin o paax oxe, xar helum o fi, ndax um lam o ñoow o fagkeer ole?»

¹⁸Yeesu a doonaan ee: «Xar taxu o xoyaxam o paaxu xe? O leng soom faaxu, ta ref Roog.

¹⁹Ndax kaa andiro kebil kene: Warkiro o kiin! Seeqkiro! Guuɗkiro! Seede’ankiro o kend of na xa maaƥ! Ba nax o kiin, jang halal um! Niwi a faap of fa ya of!»

²⁰O koor oxe a doonaan ee: «O Caajangin oxe, miñaam o reefaa kebil keene fop no ndeƥandoong es boo ndiik.»

²¹Yeesu a ɗeetaan fo o mbeq, a layin ee: «Yoqɗaa tig leng kut: Reti jikoox ke jegoona fop, lasin rool we, too yaaga xan o jeg halal na asamaan. Cinj kaaga, o gar reefanaam!»

²²Yaa o koor oxaa a nanna fa lay faaga, a lupandooxa, a naag col a ret, a gooy lool, yaam kaa may’u halal.

²³Yeesu a geleerooxa, a lay daalbe um ee: «Xan yaal kalal ke a ƭom o ndok no Maat ne Roog.»

²⁴Daalbe waa a njaaxiɗ’a na fa lay feene lool. Kaa koy, Yeesu a dakooxa o lay a den ee: «Xa teɓandoong es, o rok no Maat ne Roog a ɗoma lool.

²⁵Ngeeleemb a ñoom no yul o fiic moƴu o yooɓ ee o yaal halal a rok no Maat ne Roog.»

²⁶Daalbe waa a moƴ’a o njaaxiɗ, too a laamtaan ee: «Yaaga boog, an waagu o muc?»

²⁷Yeesu a ɗeeta a den, too a lay ee: «Wiin we mbaagiran, ndaa Roog a waagaan, yaam dara xoxiran.»

²⁸Maaga, Piyeer a dalfooxaan o lay ee: «In de, i nqaƴa fop, soo ndeefanong.»

²⁹Yeesu a laya yee: «No ndigil, mexe layaa a nuun ee: Oxuu mi fo Yegil mbaax ne i taxna ta xaƴ mbind um mbaat maag um mbaat xa teɓ um mbaat a ya um mbaat a faap um mbaat xa ƥeem mbaat xa qol um, xan a daawatin na jamaane feeke pind fo maag fo xa teɓ fo yaay fo xa ƥiy fo xa qol boo a caf teemeed, a ñagadilange sax oo. Xan a daaw itam o ñoow o fagkeer ole na jamaane fee na garaa.

³⁰

³¹Mayu no we adooxna ndiiki, xan a ndef we mbalakna, too mayu no we mbalakna ndiiki, xan a ndef we adooxna.»

³²A nqotayo a ƭat a njofaa Yeerusaleem, too Yeesu a adooxana a den. Daalbe we a njaaxiɗ’a lool, too we ndeefanoogna a den a ndiid’a. Yeesu a xoyahina xarɓaxay fo ɗik waa, soo a ref no layaa a den ke waruuna o dal ee:

³³«In we ndetaa Yeerusaleem, too xan o Ƥeenqe no kiin oxe a ɓoxotel saasadax maak we fo jaajangin we no kebil ke Moyiis. Xan a ngate’in ndax ta warel, too xan a ƥoxotin gimaƭaru we.

³⁴Xan a nqaadnooxin, a nduxdin, a nqawin xa cap, soo a mbarin, ndaa cinj ñaal tadik xan a xontoox.»

³⁵Xa ƥiy xa ƭaq axe Sebede ndefna Saak fa Saŋ, a matiida a Yeesu a layin ee: «O Caajangin oxe, kaa i mbug o fi’an a in ke i nqeɗkang.»

³⁶Yeesu a laamta a den ee: «Xar nu mbugu um fi’an a nuun?»

³⁷A layaan ee: «Ci’i a in i moof paam of, kam o ndam of, oxene na ñamaak of, o lakas oxe na janoon of.»

³⁸Kaa koy, Yeesu a laya a den ee: «Nu andee ke nu nqeɗaa. Ndax nu mbaaga o yer o kaas coono le waruuma o yer mbaat nu mbatiise’el batiise fa ƭomu fee waruuma o daaw?»

³⁹A layaan ee: «Ii, i mbaagaan.» Maaga, Yeesu a doona a den ee: «Ndigil oo kañ ee xan nu yer o kaas ole waruuma o yer, too xan nu mbatiise’el batiise fee waruuma o daaw.

⁴⁰Kaa koy, no ke farna no moof na ñamaak es mbaat na janoon es, kaaga hapooxee na mi, ndaa we Roog a jagandanuuna, xan a ndaawin.»

⁴¹Yaa daalbe xarɓaxay waa a nanuuna, a mbuuxana a Saak fa Saŋ.

⁴²Yeesu a xoya a den, soo a lay a den ee: «Nu anda yee yaal a saax ake kaa ngeblaa a saax den fa doole, soo aa-adax we a laltaa sañ-sañ den.

⁴³Fat nu and koy ee refitkee naaga a ndeer nuun. Kaa koy, oxuu bugna o ref o maak a ndeer nuun, fat a ref o tag nuun.

⁴⁴Oxuu bugna adooxan a nuun, fat a ref o paɗ no fop.

⁴⁵Yaam o Ƥeenqe no kiin oxe kaa gar, refee yee ndax ta dagooxel, ndaa ndax ta dagoox, soo a cooxit o ñis um nen a su’nit no wiin mayu.»

⁴⁶Yeesu fo daalbe um a mbadiida kam teeru faa Yeriko. Yaa da sutooxna teeru faa, faan maak a ndeefana a den. A jega o puul o ne’e Bartime, a ref o ƥiy Time oxaa moof’ina paam a ƭat ale, a sadaxnooxaa.

⁴⁷Yaa ta nanna yee Yeesu o Naanasaret oxe yoo, a dalfooxa o falaloox ee: «Yeesu o Ndaan Dawid, ngela yirmaam!»

⁴⁸Mayu a nqasanoogaan ndax ta tiim, ndaa a moƴa o falaloox ee: «O Ndaan Dawid, yirmaam!»

⁴⁹Yeesu a geenooxa, too a lay ee: «Nqoyeenoo!» A nqoya o puul oxaa, a layin ee: «Saƭakinooxi, too inoox, oxey a xoyang.»

⁵⁰O puul oxaa a ñofa o deɓ pay ngulooxel um, a dalfoox o inoox, soo a gar farna fa Yeesu.

⁵¹Yeesu a laamtaan ee: «Xar bugo um fi’anong?» O puul oxe a doonaan ee: «O Caajangin oxe, kaam bug o ga’atin.»

⁵²Yeesu a layaan ee: «Reti, o ngim of a muclaang.» Na waxtu faaga sax sax a waagata a ka, too a reefana a Yeesu na ƭat ale.