Read NQAARIIT NE ROOG Mark 13 Bible Online

Mark 13 - NQAARIIT NE ROOG bible

Mark 13

¹Yaa Yeesu a sutooxaa Mbind Roog ne, o leng no daalbe we ten a layaan ee: «O Caajangin oxe, ɗeeti! Ndaw a muul a mosu! Ndaw calel mosu!»

²Yeesu a doonaan ee: «Ga’aa ga calel magnu kene de? Yoqkee muul leng took muul gend um laa yenkeerna.»

³Yeesu a moofa took o Joong olaa no taxar oliiw kaa, jasnoorna fo Mbind Roog naa. Piyeer fa Saak fa Saŋ fa Andare waa ndeeƭna fo ten soom, a laamtaan ee:

⁴«Layangi a in a mbane kaaga a xewkaa fo o anddiloor olum na lalitkaa waxtu fee keene fop a fadnooxkaa?»

⁵Maaga, Yeesu a refa no layaa a den ee: «Mbootooxyo o kiin a nax a nuun,

⁶yaam xan wiin mayu a ngar, a ne’ooxaa gon es, too xan a lay ee: ‹Mi refun.› Maaga, xan a nax wiin mayu.

⁷Boo nu nanna coow xire, nan wiin we a laytaa kaa farna na xire, ba nu njaaxiɗ, yaam keene a wara o xew, ndaa refkafulee muukandoong ne.

⁸Xan saax a inooxan saax, maat a inooxan maat, too xan a jeg a yo’nax lanq na saax a mayu, xan a jeg qeex itam. Keene fop nen gaaj ɓelafuleer a nandkaa.

⁹Nuun o mat, mbootooxyo a qoox nuun! Xan nu ƥisel no mbind no maad, too xan nu nqawel kam pind a qeƭ ke, ƥisel mbaambir gofornoor ke fo maad we yaam mi, ndax nu mbaagaam o seede’an mbaambir den.

¹⁰Yegil mbaax ne xan a eet o waare’el qeet ke fop.

¹¹Boo nu ƥiseel, ndax nu ƥoxotel mbaambir o hate’and ole, ba nu njaaxiɗ no ke nu laykaa yaa nu mbadna. Layyo a ƭelem ake nu cooxkeel na waxtu faaga sax, yaam refee yee na nuun a inoorkaa ndaa no Yiif Tedu le.

¹²Xan o kiin a warnoor o pog um ŋaƈit, faap a warnoor o ƥeem, xa ƥiy axe a inooxan we ndimna a den, a mbarnoor a den.

¹³Xan fop a sib a nuun yaam gon es, ndaa oxe na saƭikkaa boo no muukandoong naa xan a muc.»

¹⁴«Xan nu nga oxe na xoyeel ‹Cakalaaru ke sibdeena› ta fod me ta war’eerna o fod. Oxuu na jangaa a ƭelem akene fat a wootoox a paax! A koom, waa na ndefkaa no jegel olaa Yudee a mbara o ƈufan xa coong axaa.

¹⁵Baa oxe ta soƥkaa no dung-took a fudoox, soo a rok na ndok ale, ndax ta xot tig.

¹⁶Baa oxe na refkaa na xa qol axaa itam a nomtoox, ndax ta jang sabadoor um.

¹⁷Ndaw naqad no rew we na ndefkaa fo fud fo no we na mbugko numnaa a koom.

¹⁸Nqeɗyo boog, ndax keene xewkee no ndiig.

¹⁹Yaam no ñaal kaaga, xan a jeg coono fa maak faa moseerna o jeg naa Roog a saku adna fee boo xaye, too jegkatee nandu neene boo muk.

²⁰Boo o Yaal oxe a wañ’eerna ñaal kaaga, o leng muckoogee. Kaa koy, xan a wañ a den yaam we ta jilanna a xoox um.

²¹A koom koy, boo o kiin a layna a nuun ee: ‹Kiristaa fee o Muumucil oxe regteena oxey mene›, mbaat ‹Oxaay maana›, ba nu ngimin.

²²Xan Kiristaa maamaaɓ fo duleer maamaaɓ a mbeeñ, too xan a mbi’aa xa anddiloor fo comlaand, ndax da nax we Roog a jilna sax, a mbaagangaan.

²³Mbootooxyo boog, yegnaam a nuun fop yaaga fadiidafulee.»

²⁴«Kaa koy, no ñaal kaaga, cinj coono fa maak faaga, njeeƈ ne xan a nuk, a qoor ale a niifaar,

²⁵xa qoor axe a yenit na asamaan, too katil ke ndefna na asamaan xan a yo’noox.

²⁶Maaga, xan wiin we a nga o Ƥeenqe no kiin oxe a garaa took a eel ake, a yoon fa katil maak fo o ndam.

²⁷A koom, xan a luliid malaaka ke ten na xa saax xa nahaq axe no lanq ke, ndax da mbokat we ta jilna, no ke xotitna no cat adna boo no cat asamaan.»

²⁸«Njangityo na naxax ale xotteena no ndun ne. Boo a naaq ake a ƈiƴiidaa, too a naf ake a saqtaa, nu anda yee ndiig ne a matiida.

²⁹Neene itam, boo nu nga’na keene a xewaa, andyo yee o Ƥeenqe no kiin oxe a matiida, oxe paam o don-maax ole.

³⁰No ndigil, mexe layaa a nuun ee: Wiin we na jamaane fene[5] mbaafkee, too keene fop xewee.

³¹Xan asamaan fo lanq a mbaaf, ndaa fa lay es faafkee boo muk.»

³²«No ke farna no ñaal ne fo na waxtu fee ta nomtooxiidkaa, o leng andiran, malaaka ke na asamaan fo o Ƥeenqe sax andiran, Faap fee soom andun.

³³Mbootooxyo boog, too yetoox, yaam nu andee a mbane waxtu fee a refkaa.

³⁴Xan a nand nen o koor oxaa na ñaaƴkaa, a xaƴ mbind um, a doxnin faɗ um, oxuu refna fo calel um, soo a sim o paɗ oxe na yetooxaa a carind ale ta yetoox a paax.

³⁵Yetooxyo boog, yaam nu andee a mbane o yaal mbind ne a gatkaa, a waaga ref kirand mbaat ndeer o yeng mbaat na siik a layu mbaat nqes.

³⁶Saɗaryo ta bet a nuun, soo a soƥ nu ƭaanaa.

³⁷Ke um layaa a nuun, fop um layan: Yetooxyo!»