Read NQAARIIT NE ROOG Mark 14 Bible Online

Mark 14 - NQAARIIT NE ROOG bible

Mark 14

¹Xew fee na colandax ale fa fee no puuru canja’e ke ñaal ƭik soom a yoq’u. Saasadax maak we fo jaajangin we no kebil ke Moyiis kaa mbaaƭoogu maa da ndamitna a Yeesu no ƴiƴ, soo a mbarin.

²Kaa koy, a layra a ndeer den ee: «Baa ref kam xew fee, yaam ndik ta jeg combol-combol a ndeer no wiin we.»

³Yaa Yeesu a refna Betani, kam mbind no yaal a tik-a-maak o ne’e Simoŋ, o tew a rokiida, a soƥ ta ñaamaa. A saq’a o njaq onqaa fi’teena ɓil seeru laa ne’eena albaatar, a yip ƭuumooxel cafeñu kaa ne’eena naar. A gefa o njaq onqe, soo a ɓax ƭuumooxel ke fop took xoox le Yeesu.

⁴Leng-leng no waa ndeeƭna maaga a mbuux’a, too a layra a ndeer den ee: «Ndi xar ƭuumooxel kene na yaqeel a ɗaxkaa?

⁵Mee ndax a waag’e o jikoor kaa hupna xa qanjar teemeed tadik xaaliis fa nqoolu, soo a dimle’tel rool we!» Maaga, a nqasana o tew oxeene,

⁶ndaa Yeesu a laya yee: «Nqaƴeenoo fo njaambuur um. Xar taxu nu njom’andan? Tig paax a fi’anaxam.

⁷Rool we, owe fa nuun bes fuu refna, too nu mbaaga mbi’an a den paax a mbanuu nu mbugna, ndaa mi, refkiim a ndeer nuun boo faw.

⁸A fi’a ke ta waagna, a yipanaxam ƭuumooxel no cer es boo a ƴut, too a mboy es a fi’anun.

⁹No ndigil, mexe layaa a nuun ee: Muu Yegil mbaax ne a waare’eena kam adna fee fop, xan a betandax no ke o tew oxene a fi’na a laytel maaga itam.»

¹⁰Maaga, Yudaa o Iskariyot oxe reeƭna o leng no xarɓaxay fo ɗik waa, a reta a lay fo saasadax maak waa, ndax ta ɓoxot a den a Yeesu.

¹¹A sawar’a lool ye da nanuuna, too a ndegaan ee xan a ndabdin xaaliis. Naaga, Yudaa a waaƭoogata maa ta ɓoxotitna a Yeesu.

¹²No ñaal mberaand naa na Xew faa no puuru canja’e ke, bes fee mbaal ne a sadaxtoogeena, daalbe we Yeesu a laamtaan ee: «Mam bugo i njawantikong a cu’ax ale na bes fee na Colandax ale?»

¹³Maaga, Yeesu a lula ɗik no daalbe we ten, a lay a den ee: «Ndetyo na teeru faa, too xan nu nqetit o koor oxaa roxondooxna nqaw foofi. Ndeefaneenoo,

¹⁴too muu ta rokna, layyo o yaal mbind naaga yee: ‹O Caajangin oxe kaa tee: Taa a ndok ale waruuma o ñaamit a cu’ax ale na bes fee na Colandax ale, mi fo daalbe es?›

¹⁵Xan a lal a nuun a ndok a maak took taax-took naa fo moofir ke mbarna fop. Maaga nu njawanitkaa a in a cu’ax ale.»

¹⁶Daalbe waa a ndeta, a mbadiid na teeru fee, a soƥ fop ne Yeesu a layit’uuna a den, too a ndalfooxa o njaw a cu’ax ale.

¹⁷Yaa tigaa yaarna, Yeesu a fadiida fo xarɓaxay fo ɗik waa.

¹⁸Yaa da ndeerna a ñaamaa, Yeesu a laya yee: «No ndigil, mexe layaa a nuun ee: Nuun we na ñaamaa fa mi, xan o leng na nuun a ɓoxotaam.»

¹⁹Daalbe we a naqadiloox’a lool, too oxuu refna na den a laamtoogaan ee: «Mbaar refee mi?»

²⁰Yeesu a doona a den ee: «O leng na nuun, nuun xarɓaxay fo ɗik we yoo, oxe ɓekna o ɓay fa mi no roon ole.

²¹O Ƥeenqe no kiin oxe xan a xon, ne a Pind a Tedu ke a laytuuna no ten. Kaa koy, ndaw sabab took no xe na ɓoxotkaa o Ƥeenqe no kiin oxe. Ñak’el o rim sax moƴ’u no ten.»

²²Yaa da ñaamaa, Yeesu a janga mbuuru, a barke’in, a xustin, a cooxin a den, soo a lay a den ee: «Njangyo teen! Kene refu cer es.»

²³A janga o kaas biiñ itam, a gidim a Roog, a cooxin a den, soo da yer taaga den fop.

²⁴Yeesu a laya a den ee: «Kene refu fo’oy es no ngiɓoor ne ɓaxeena yaam mayu.

²⁵No ndigil, mexe layaa a nuun ee: Yerkatiim kaa inoorna no ndaxar biiñ a refangeerna na bes faa um dakooxkaa o yer fa nuun biiñ fa nqas faa refna kam Maat naa Roog.»

²⁶Cinj kaaga, a ngima a kim a tedu boo a ƈut, soo a ndet no Joong olaa no taxar oliiw kaa.

²⁷Yeesu a laya daalbe we ten ee: «Xan nu mbesaam a cinj, nuun fop, yaam a Pind a Tedu ke kaa lay ee: ‹Xam war o kaynaak oxe, too xan paal ke a pictoor.› »

²⁸Kaa koy, a doona teen ee: «Cinj a qontax es, xam adook a nuun Galile.»

²⁹Piyeer a layaan ee: «Lakas we fop a tolofangaa boo a yen sax, mi fa xoox es yenkiim.»

³⁰Maaga, Yeesu a doonaan ee: «No ndigil, mexe layang ee: No yeng olene sax, a siik laykee, a yengit, too layiro boo a caf a tadak ee andiraamo.»

³¹Kaa koy, Piyeer a moƴa o lay a maak ee: «Um narangaa o xon fa wo sax, xañkiroong muk.» Lakas waa fop a laya leng kut ke.

³²A mbadiida no mbiñ onqaa ne’eena Getsemane, too Yeesu a laya daalbe we ten ee: «Moofyo mene, boo um xeɗik!»

³³A ɓislooxa a Piyeer fa Saak fa Saŋ. A dalfooxa o naqadiloox, a jaaxiɗ,

³⁴too a laya a den ee: «Xeeñ es kaa gooy boo na fa nqon. Yoqyo mene, yetoox!»

³⁵Yaa ta retna boo a goƭ o ndik, a gooknooxa a lanq, too a xeɗ a Roog ndax waxtu feeke a riƈatooxin, a waagangaa o jeg.

³⁶Kaa layoogu yee: «Aba[6], Faap, dara xoxirang! Riƈatanaam o kaas coono olene. Kaa koy, baa jegit ne bugtanuuma, ndaa ne bugtanoona.»

³⁷A nomtooxiida me no daalbe daduk we, a soƥ da ƭaanaa. A laya a Piyeer ee: «Simoŋ, kaa o ɗaanaa? Waagiro o yetoox waxtu fa leng sax?

³⁸Yetooxyo, too nqeɗ, ndax nu yenkee no mbog. Yiif le a jagandooxa, ndaa cer ke kaa ngees.»

³⁹A dakooxa o riƈatoox, soo a xeɗ leng kut ke ta fer’ina o xeɗ.

⁴⁰A nomtooxiidahina, too a soƥa a den da ƭaanaa. A kid den kaa nqaaɗ’u. And’ee kaa da ndoonuuna.

⁴¹Yaa ta nomtooxiidna jaf dadkandeer le, a laya a den ee: «Kaa nu maad o ƭaanaa, ñootnooxaa? Ndiiki koy, a deya! Waxtu fee a fadiida. Nga’yo, o Ƥeenqe no kiin oxe xan a ɓoxotel ndeer xa ƥay axe no baabakaad we.

⁴²Inooxyo i ndet, oxe na ɓoxotkaxam oxe matiidaa.»

⁴³Yaa Yeesu a maadna o layaa, ndak fo ndak Yudaa fee reeƭna o leng no xarɓaxay fo ɗik waa a fadiida, a yoon fo faan maak laa saqna laƥ fo xa ƭong. Saasadax maak we fo jaajangin we no kebil ke Moyiis fo maak we ngebil’u a den.

⁴⁴Oxe nar’uuna o ɓoxot a coox’a a den o anddiloor olene: «Oxe um foonkaa yoo. Fat nu ndamin boo ɓostooxkee, ƥisin.»

⁴⁵Yaa Yudaa a fadiidna, a matiida a Yeesu, soo a layin ee: «O Caajangin oxe!» Cinj kaaga, a foona a Yeesu.

⁴⁶Wiin waa ta yoonit’ina a ndama a Yeesu.

⁴⁷O leng no we ndeeƭna maaga a woosa laƥ um, a facin o tag oxe no saasadax o maak oxaa boo nof naa a ɗeg.

⁴⁸Yeesu a laya a den ee: «Kaa nu ngaraa, mbi nen waa na mbelaa o kuuɗ, saq laƥ fo xa ƭong ndax nu ndamaam.

⁴⁹Yaag oo toox de, bes fuu refna, a ndeer nuun refoogum, jangnaa kam Mbind Roog ne, too nu ndamiraam. Kaa koy, fat a Pind a Tedu ke a mbadnoox.»

⁵⁰Maaga, fop a nqaƴaan, a ƈuf.

⁵¹A jeg’a o fes olaa reefanoogna a Yeesu, a lipoox pay. A ndaalandooxaan ndax da ndamin,

⁵²ndaa a xaƴa fa den pay naa, a ƴuf o ƥor.

⁵³We ndam’ina a Yeesu a ƥisaan maa no saasadax o maak oxaa, maa saasadax maak waa fop fo maak waa fo jaajangin waa no kebil ke a mbokatoor’ina.

⁵⁴Piyeer a reefana a Yeesu, a danganin o ndik boo no maax olaa no saasadax o maak oxaa. Maaga, a moofa fo yeeyetax waa, too a raƭooxooga paam fiɗel laa.

⁵⁵Saasadax maak we fo Mal maak ne fop kaa mbaaƭanoogu a Yeesu a nox, ndax da mbarin, ndaa nga’ee dara.

⁵⁶Wiin mayu a mberanoogaan, ndaa xa peranqol den yoon’ee.

⁵⁷Leng-leng a inooxa, a mberanin ee:

⁵⁸«I nana ta layaa yee: ‹Xam gef Mbind Roog nene, xa ƥay no kiin a maxna, too no ñaal tadik xam max lakas naa o ɓay no kiin a fi’keerna.› »

⁵⁹Too no kaaga sax, xa peranqol den yoon’ee.

⁶⁰Maaga, o saasadax o maak oxaa a inooxa a ndeer mbokatax naa, soo a laamit a Yeesu yee: «Ndax kaa doonkiro dara no ke wiin wene a njambang?»

⁶¹Yeesu kaa tiimoogu, too doon’iran dara. O saasadax o maak oxaa a dakooxaan o laamit ee: «Ndax wo refu Kiristaa fee o Muumucil oxe regteena, o Ƥeenqe no xe i simataa?»

⁶²Yeesu a doonaan ee: «Mi refun moos, too xan nu nga o Ƥeenqe no kiin oxe a moof na ñamaak no Cegu katil oxe, soo a garaa took a eel ake, a inoortiid na asamaan.»

⁶³Maaga, o saasadax o maak oxaa a dalfooxa o faar toki[7] kaa ten, soo a lay ee: «Xar i soxla’atu seede?

⁶⁴Nu nana wen le ta wenna a Roog. Nam a nandu a nuun?» Fop a laya yee fa nqon soom waru no ten.

⁶⁵Leng-leng a ndalfooxa o nduxdaa took um. A ngumaan o mbuul-ee-mbuul, soo a mbadan tiq, too a layaa yee: «Gapi oxe fadoonga!» Yeeyetax waa a cukatiraan fo paƭ itam.

⁶⁶Piyeer a maad’a o refaa a lanq no maax olaa, ye o leng na xa pindaand axe no saasadax o maak oxaa a garna.

⁶⁷Yaa ta ga’na a Piyeer a raƭooxaa, a naagaan jak a kid, soo a layin ee: «Wo itam, reeƭaa fa Yeesu o Naanasaret oxe.»

⁶⁸Kaa koy, a xaña, too a lay ee: «Naniim, too andiim ke o ne’aa.» Cinj kaaga, a xota farna fo a carind alaa, [too a siik a laya].

⁶⁹Kaa koy, o mbindaand onqaa a ga’aan, soo a dakoox o lay waa ndeeƭna maaga yee: «Oxeeke, na den a fogu.»

⁷⁰A ɓaata o xañatiloox. Ɓaatnee dara, waa ndeeƭna maaga a layahina a Piyeer ee: «Ga’na rek na den fogo, yaam wo itam, o Kaagalile refo.»

⁷¹Maaga, Piyeer a dalfooxa o daaɓoox, too a gaañ ee: «Ndeer es fa Roog, andiim o kiin oxeene nu ne’aa.»

⁷²Na waxtu faaga sax sax, a siik a yengta, too Piyeer a wetandooxa ke Yeesu a lay’uuna yee: «A siik laykee, a yengit, too layiro boo a caf a tadak ee andiraamo.» Maaga, a naaga ciic a lool.