Read NQAARIIT NE ROOG Mark 16 Bible Online

Mark 16 - NQAARIIT NE ROOG bible

Mark 16

¹Yaa bes faa na ñootnax alaa a faafna, Mari-Magdala fa Mari fee ya Saak fo o tew o ne’e Salome a njika ƭuumooxel, ndax da nqendandtikin o dal ole Yeesu.

²No nqes naa na diiboor faa, yaa njeeƈ ne a leelaa, a ndeta na mboy alaa.

³A layrooga a ndeer den ee: «An na berengankaa a in ɓil le refna no don-maax ole na mboy ale?»

⁴Kaa koy, yaa da yoɗna a kid den, a nga’a yee ɓil maak laaga a bereng’e boo a ƴut.

⁵A ndoka kam a mboy alaa. A nga’a maaga o fes olaa moofna no saax o ñamaak, a rokoox ndoki ndan fur, too a ndiida lool.

⁶Kaa koy, o fes olaa a laya a den ee: «Ba nu ndiid, Yeesu o Naanasaret oxe rengeena na kurwaa nu mbaaƭaa, a xontooxa, refatee mene. Ngaryo nga me ta wondin’eena!

⁷Ndetyo ndiiki, lay daalbe we ten, moƴtaa sax a Piyeer ee: ‹Oxaa adookaa a nuun Galile, maaga nu nga’itkan, ne ta layit’uuna a nuun.› »

⁸A ndalfooxa o sutoox a mboy alaa, soo a ƈuf, a sendaa yaam o laaw den a ret. Kaa ndiid’u boo ta tax mbetandooxiran o leng.

⁹Cinj yaa Yeesu a xontooxna no nqes naa na diiboor faa, a eeta o feeñoox a Mari-Magdala, no xe ta raxit’ina cini ɓetuu ƭik ke.

¹⁰Mari a reta a yegnikin we ndeeƭna fa Yeesu. Wiin weene kaa naqadiloox’u, soo a loolaa.

¹¹Kaa koy, yaa da nanna ke Mari a wetandoox’ina, ye ta layna yee Yeesu oxe ñoowaa, too a ga’aan sax, ngim’iran.

¹²Cinj kaaga, Yeesu a feeñooxa na jemo fa lakas daalbe ɗik waa ndetoogna na koƥ alaa.

¹³Den itam a nomtooxiida, a mbetandooxin lakas we, too waaga ngimahinee.

¹⁴No palakaand ke, Yeesu a feeñooxa daalbe xarɓaxay fo o taalbe leng oxaa, yaa da ndeerna a ñaamaa. Maaga, a xasana a den yaam ngimaƭar den fo o saƭkel a qeeñ den, taxna boo ngimee we nga’uuna a cinj ye ta xontooxna.

¹⁵Yeesu a laya a den ee: «Ndetyo kam adna fee fop, mbaare’ik we mbindeena fop Yegil mbaax ne.

¹⁶Oxuu gimna, a batiise’el, xan a muc. Oxuu gimeerna koy, xan a xawel.

¹⁷We na ngimkaa na mi xan a yoonit xa anddiloor axene: Xan a ndaxaa cini no gon es, a layaa lak qas.

¹⁸Boo da ndamna ƥood na xa ƥay den mbaat da yer kaa jegna daŋat, dara damkee a den. Xan a ndoon xa ƥay den took jiru we, too weene xan a mbod.»

¹⁹Yaa o Yaal oxe Yeesu a layna a den naaga boo a ƴut, Roog a yoɗaan na asamaan, a moofnin na ñamaak um.

²⁰Daalbe waa a ndeta, a mbaare’ik Yegil mbaax ne muu refna. O Yaal oxe a jalooga fa den, a laltaa yee waare den ndigil kak oo na pexey xa anddiloor axe ta yoonandtooguuna.]