Read NQAARIIT NE ROOG Mark 2 Bible Online

Mark 2 - NQAARIIT NE ROOG bible

Mark 2

¹Na pe akaa ndoonooxna, Yeesu a nomtooxiida na teeru faa Kapernawum, too wiin waa a nana yee oxaa no mbind naa.

²Wiin mayu a mbokatoora boo o leng jegatee maa ta geenooxna, refee tafil sax mbaambir o don-maax ole. Yeesu kaa waare’oogu a den.

³Wiin leng-leng a mbadiida maa Yeesu, a ƥisiidin o ƥoof, nahuk na den a ndamrin,

⁴ndaa mbaag’iran o ƥoxot a Yeesu yaam wiin mayu we. A ŋaaya took bomb le, a mbombtin me Yeesu a reeƭna, soo a yoorit o ƥoof oxe fo o sar ole ta wondin’eena no gom olaaga.

⁵Yeesu a ga’a o ngim den, too a laya o ƥoof oxe yee: «O ƥees, pakaad of a mbaasante.»

⁶Jaajangin leng-leng no kebil ke Moyiis waa moof’ina maaga a layooga na yiif den ee:

⁷«Ndi nam o kiin oxene a laytaa nene, a wenaa Roog? An waagu o waasanit pakaad? Roog soom waagun.»

⁸Ndak fo ndak, Yeesu a anda ke da nqalaatoogna, too a laya a den ee: «Xar taxu nu njeg a qalaat a nandu neene na yiif nuun?

⁹Xar moƴu yooɓ o layel o ƥoof oxe? ‹Pakaad of a mbaasante›, ndi lay ee: ‹Inooxi, jang o sar of, too ñaaƴ.›

¹⁰Kaa koy, kaam bug nu and ee o Ƥeenqe no kiin oxe a jega sañ-sañ faa ta waasantaa pakaad na adna fee.» Maaga, a geleerooxa, a lay o ƥoof oxe yee:

¹¹«Mexe layang o ten, inooxi jang o sar of too xaad!»

¹²Ndak fo ndak, o koor oxaa a inooxa mbaambir no fop, a jang o sar um, soo a xaad. Den fop a njaaxiɗ’a, a simataa a Roog, too a layaa yee: «I mosee o nga nandu neeke.»

¹³Yeesu a nomtooxa farna fa ƥeeraamb alaa no Maag olaa Galile. Wiin mayu a ngarooga me ten, too a jangnooga a den.

¹⁴Ye ta waanaa, a ga’a a Lewi o ƥiy Alfe, ta moof maa wiin waa a ndabditoogna juuti. Yeesu a layaan ee: «Reefanaam!» Lewi a inooxa, a reefanin.

¹⁵Yaa Yeesu a refna kam mbind Lewi, a yoon fo daalbe we ten, mayu no waa ndabdinooxoogna juuti fo wiin lakas waa ƭeetoogeena nen baabakaad a ngara, a ndeer fo ten, yaam wiin mayu nandu neene kaa ndeefoogun.

¹⁶Yaa jaajangin we no kebil ke Moyiis mbog’ina no Farisiya we a nga’na yee Yeesu kaa ñaamoogu fo baabakaad we fo we ndabdinooxoogna juuti, a laamta daalbe we ten ee: «Xar taxu ta ñaamaa fo we na ndabdinooxaa juuti fo baabakaad we?»

¹⁷Yaa Yeesu a nanuuna, a laya a den ee: «Refee yee we mbodna soxla’u o baawaadin, ndaa jiru we. Xoyiidiim wiin jofu we ndaa baabakaad we.»

¹⁸Bes, daalbe we Saŋ o Paabatiise xe fo Farisiya we a ngoorooga. A jega waa ngarna, a laamit a Yeesu yee: «Xar taxu daalbe we Saŋ o Paabatiise xe fo daalbe we no Farisiya we a ngooraa, too we wo o mat naangee o ngooraa?»

¹⁹Yeesu a doona a den ee: «Ndax nu mbooga yee we na ngulookaa a mbaaga o ngoor yaa o kor-no-kulook oxe a refna fa den? Ha’aa muk! Mbaagee o ngoor yaa o kor-no-kulook oxe a maadna o refaa fa den.

²⁰Ñaal ke o kor-no-kulook oxe a refkateerna fa den owe ngaraa, too a koom xan a ngoor.

²¹O leng kacitkee ndoki nogoyu o seegiit o xas. A fi’angaan, xan o seegiit ole a ɓisloox a seek no ndoki ne, too yaaga xan o quuy ole a ɓaatoox.

²²O leng ñolandkee biiñ fa nqas kam poxos kiid itam, mbaat biiñ fee xan a gef poxos ke, soo den fop da ñakel. Ha’aa kañ, biiñ fa nqas kaa war o ñolandteel kam poxos qas.»

²³Na bes fee na ñootnax ale, Yeesu a xaaña kam xa qol bele. Daalbe we ten a ndalfooxa o ƥol teen, a ƈaxaa a den joona fa ƭat ale.

²⁴Farisiya we a laya a Yeesu yee: «Ga’aano! Xar taxu da mbi’aa ke kebil ke a nqañtaa na bes fee na ñootnax ale?»

²⁵Yeesu a doona a den ee: «Ndax kaa nu mosee o njang kam a Pind a Tedu ke ke Dawid a fi’’ina, a soƥ ta ref na soxla. Kaa xeex’el, ten fo yoon um.

²⁶Ndax kaa nu njangee ne ta rokit’ina no Mbind Roog naa, a ñaam na xa kaf puuru xaa ƥoxot’eena a Roog, soo a coox yoon um itam. Na jamaane faaga, Abiyataar reeƭu o saasadax o maak. Yaag oo toox de, saasadax we soom kebil ke a ci’’u da ñaam puuru keene.»

²⁷Yeesu a layahina a den ee: «Bes fee na ñootnax ale, o kiin taxu ta fi’el, refee yee o kiin fi’e yaam bes fee na ñootnax ale.

²⁸Ten taxu, o Ƥeenqe no kiin oxe refu oxe hame’na bes fee na ñootnax ale.»