Read NQAARIIT NE ROOG Mark 5 Bible Online

Mark 5 - NQAARIIT NE ROOG bible

Mark 5

¹Yeesu fo daalbe waa ten a mbadiida no saax o lakas olaa na ƥeeraamb alaa no Maag olaa Galile, no saax laa no Geegerasin waa.

²Ndak fo ndak, yaa Yeesu a fudooxna suk naa, o koor oxaa jini a damna a sutoora no poy kaa, a gar mbaambir um.

³Kam poy kaa a gen’u, too o leng waag’iran o hum, a refangaa fo ceen sax oo,

⁴yaam leek-leek kaa jengoogel fo a celem na caf, a humel fo ceen, ndaa kaa ɗegoogu ceen ke, a daƈtaa a celem ake. O leng jeg’ee doole faa ta harnituuna.

⁵Ñaal oo yeng oo kaa refoogu kam poy ke fo took xa coong axe, a wuuqaa, too a xawooxaa a kac.

⁶A ƴookta a Yeesu koƭu, a ƴuf a xetooxiidin, a gung mbaambir um,

⁷too a wuuq a maak ee: «Wo fee refna o Ƥeenqe no xe Took-ee-took, xar i nqetu? Waay waay, ɗeeti a Roog, fañaam o xijil.»

⁸A laya keene, yaam ne Yeesu a hebil’ina jini fee ta sutoox no kiin oxeene.

⁹Yeesu a laamtaan ee: «Nam ne’ee?» A doonaan ee: «Suungaan ne’eem, yaam kaa i may!»

¹⁰Naaga, jini fee a xeɗooxoogaan ndax sutkee a den saax le.

¹¹A jeg’a maaga paam o joong olaa o siir o maak a tuul olaa suufoogna.

¹²Maaga, cini kaa a nqeɗooxa a Yeesu yee: «Ɓakandi a in kam a tuul akene, ndax i ndok kam den.»

¹³A ci’aan a den. Naaga, cini kaa a sutooxa no koor oxaa, a ndok kam a tuul akaa. O siir olaa a dalfooxa o eetatir a pudnand alaa, kam o maag olaa. A jeg’a ngap a tuul cuni ƭik, too fop a meka kam o maag olaa.

¹⁴Waa ngayoogna a den a ƈufa kam teeru faa fo kam a saax akaa matna maaga, a mbetandook ke xew’ina. Wiin waa a ndalfooxa o ndet a ƭeetik ke xew’ina.

¹⁵A mbadiida me Yeesu, too a nga’a o koor oxe cini a ndam’ina, ta moof, a rokoox tikoorik, too a dakoox’a na sagu um. Maaga, wiin we a ndiida lool.

¹⁶We nga’’ina keene, a mbetandooxa ke xew’ina no xe cini ke a ndam’ina fo ke dal’ina a tuul ake itam.

¹⁷Maaga, a ndalfooxa o ndef no nqeɗooxaa a Yeesu, ndax ta sutoox saax den.

¹⁸Ye Yeesu a rokaa no suk naa, oxe cini ke a ndam’ina a xeɗooxaan, ndax ta yoon fa Yeesu.

¹⁹Yeesu ci’iran o ten, ndaa a layaan ee: «Reti no mbind of, farna fo fog of, too wetandoox a den ke o Yaal oxe a fi’anoonga fop fo ne ta yirmitoonga.»

²⁰A reta, too a dalfooxa o ref no yegnitaa kam saax laa xoyoogeena Dekapol[1] ke Yeesu a fi’anuuna fop. Keene a bet’a waa nan’uuna fop.

²¹Yeesu a roka kam suk naa, a laqtoox no saax o lakas olaa no maag olaa, too wiin mayu a ndakooxa o ngar, a mbokatoor a paam um. Na ƥeeraamb alaa no maag olaa a reeƭu.

²²Maaga, Yayrus fee reeƭna o leng no kelfa ke no mbind a qeƭ naa a gara, a gooknoox na caf um,

²³too a ref no xeɗan ee: «O ƥees o ndew onqaay a meeñaa. Gari doonin xa ƥay of, ndax ta wod, too a ñoowatin!»

²⁴Yeesu a yoona fo ten, too wiin mayu a ndeefanaan, soo a ƥiiklan.

²⁵A jeg’a maaga koy o tew oxaa jir’ina. Kaa ga’oogu tap, too ɗegroogee boo xa kiid xarɓaxay fo xa kiid xa ƭaq.

²⁶A xij’a lool ndeer xa ƥay no waawaadin mayu. A su’nit’a ke ta jeg’ina fop, too taxee ta moƴan sax, kaa fi’’u nen kaa moƴ o ɓaatooxaa.

²⁷Yaa ta nanna wiin we a laytaa a Yeesu, a gara kam wiin mayu waa, a laqtoox a cinj um, soo a duq ndoki ne Yeesu,

²⁸yaam kaa de’ooxoogu yee: «Um waag’angaa o duq toki ke ten rek, xam wod.»

²⁹Na waxtu faaga sax sax tap ne ten a ɗega, too a yega no cer um ee a woda no ƭomel ole ten.

³⁰Yeesu a yega ndak fo ndak na xoox um ee doole a sutoora no ten. A wiƈaqilooxa ndeer no wiin mayu waa, too a laamit ee: «An duqaxam no ndoki?»

³¹Daalbe we ten a ndoonaan ee: «O ga wiin mayu we na ƥiiklang boo ƴut, soo o laamtaa yee: ‹An duqaxam›?»

³²Cinj kaaga, Yeesu a ɗeetooga me widuuna, ndax ta ga oxe fi’’ina keene.

³³O tew oxaa a diid’a boo a sendaa, yaam ne ta andna ke xew’ina fo ten. A gooknooxa na caf um, too a layin ndigil ne fop.

³⁴Kaa koy, Yeesu a layaan ee: «O ƥees, o ngim of a muclaang. Reti na jam, too jeg o wod-fo-ɓaal no ƭomel of.»

³⁵Yaa ta maadna o layaa, wiin a inoortiida no mbind no kelfa faa no mbind a qeƭ naa, a layin ee: «O ƥeef o ndew a ñaka ndiiki. Jaratee o inaa o Caajangin oxe.»

³⁶Kaa koy, Yeesu nan-giloox’ee a ƭelem akeene, too a laya kelfa fee no mbind a qeƭ naa yee: «Ba o diid, gimi rek!»

³⁷Yeesu ci’ee o leng ta yoonin, a refangeerna Piyeer fa Saak fa Saŋ fee o ndeɓ Saak.

³⁸A mbadiida no mbind no kelfa faa no mbind a qeƭ naa, too Yeesu a ga’a yee a jeg’a combol-combol fo wiin waa looloogna, a mbaɗooxaa.

³⁹A roka, too a lay a den ee: «Xar taxu combol lene fo xa lool axene? O njaaƈ onqe xonee, ndaa kaa ɗaanaa soom.»

⁴⁰Waa ndeeƭna maaga fop a nqaadnooxoogaan. Maaga, a suta a den den fop, a xot a faap fee fa yaay fee no njaaƈ onqe fo we yoon’ina fo ten itam, soo a rok me o njaaƈ onqe a reeƭna.

⁴¹A dama o njaaƈ onqe no ɓay, too a layin ee: «Talita kuum!» (Ten tektu: O ndoog onqe, inooxi! Mi layong o ten!)

⁴²Ndak fo ndak, o ndoog onqaa a inooxa, soo a ñaaƴaa, yaam a jeg’a xa kiid xarɓaxay fo xa kiid xa ƭaq. Waa ndeeƭna maaga fop a njaaxiɗ’a lool,

⁴³ndaa Yeesu a maƭooxa a den ee baa layin o leng. Cinj kaaga, a laya a den ee: «Cooxeenoo kaa ta ñaamna.»