Read NQAARIIT NE ROOG Mark 6 Bible Online

Mark 6 - NQAARIIT NE ROOG bible

Mark 6

¹Yeesu a inooxa maaga, soo a ret no mbaafaap um, a yoon fo daalbe we ten.

²Yaa bes fee na ñootnax ale a fadiidna, a refa no jangnaa kam mbind a qeƭ naa. Wiin mayu waa nan-gilooxooguuna a njaaxiɗ’a boo a laamtataa yee: «Mam a daawtu kene? O and olene ta cooxeena xar oo? Nam a waagu o fi’it a pi katil a nandu nene fo xa ƥay um?

³Ndax refee o taadaaƴ oxe, o ƥeenqe Mari, o maag oxe Saak fa Yoose fa Yudaa fa Simoŋ? Ndax jigeen we ten ngenee fa in mene?» Kaaga a yaqan’a a den da ngim no ten.

⁴Maaga, Yeesu a laya a den ee: «O tuleer fañaand sen refangeerna kam mbaafaap um fo ndeer fog um fo kam mbind um.»

⁵Yeesu waag’ee o fi maaga a pi katil a leng, refangeerna a wodand jiru leng-leng, yaa ta doonna a den xa ƥay.

⁶Ngimaƭar den neene a bet’a a Yeesu lool. Yeesu a widooga a saax ake matna maaga, a jangnaa.

⁷Maaga, a xoya xarɓaxay fo ɗik we, a ref no lulaa a den ɗik-ɗik, a coox a den sañ-sañ took cini ke.

⁸A hebla a den ee: «Ba nu ƥisloox dara yaa nu ndetaa, a refangeerna o loq soom. Ba nu ƥisloox ñaamel mbaat o fof mbaat xa monjong no ciba nuun.

⁹Ndokooxyo xa ñaaƭ, mbañ o ndokoox sabadoor ƭik.»

¹⁰A layahina a den ee: «Muu nu mbadna, moofyo kam mbind naa nu nqurkeel boo yaa nu inooxkaa maaga.

¹¹A ngenarangee a nuun mbaat da mbañ o nan-giloox a nuun, fat nu sutoox maaga, yirif fo ut a caf nuun, ndax ta ref seede took den.»

¹²Daalbe we a ndeta, too a mbaare’aa wiin we da mbes pakaad den a cinj.

¹³A ndaxooga cini mayu, a ƭuumaa jiru mayu diwliin, soo a mbodandaa a den.

¹⁴Na pe akaaga, o maad Herood a nana wiin we a laytaa a Yeesu, yaam gon um kaa joot’u a saax ɓetaa ƭaq. Wiin leng-leng kaa layoogu yee: «Saŋ o Paabatiise xe xontooxu a ndeer no xon we, ten taxu ta fi’aa a pi katil.»

¹⁵Kaa koy, lakas kaa layoogu yee: «Eliya yoo!» Weeke yee: «O tuleer oo nen o leng no duleer we yaaga.»

¹⁶Kaa koy, yaa Herood a nanna kaaga, a laya yee: «Saŋ feene ɗegnooruuma xoox um, o ten o mat xontooxu.»

¹⁷Herood fa xoox um kaa lul’u o kiin ta dam a Saŋ, soo a jengin, a ɓekin kaso yaam Herojas, o tew Filip fee o ndeɓ Herood ta dolin’ina,

¹⁸yaam ne Saŋ a layoogna a Herood ee: «Wariro o dolnir fo o tew no ndeɓ of!»

¹⁹Herojas kaa fuuxan’u a Saŋ, too a bug’aan o warnoor, ndaa waag’iran,

²⁰yaam Herood kaa saɗar’u a Saŋ. A and’a xil ee Saŋ o koor o cofu a reeƭu, a ted, ten taxu ta saytooxoogun. Boo ta nan-gilooxooguuna, a jaaxɗooga, ndaa kaa nan-gilooxoogun fo o ɗaay.

²¹Maaga, Herojas a jegata o wooƥ olaa ta warnooritna a Saŋ, a jopir Herood a roofandaa bes fee no rimel um. A xoya we mbogna no maat ne ten fo aa-adax we no xiixire we fo wiin maak we Galile fop, ndax ta fi’an a den a put a maak.

²²O ƥiy o ndew onqe Herojas a roka no lang ole, too a fecaa. Keene a fel’a a Herood fo genar we ten lool. O maad oxe a laya o njaaƈ o ndoog onqe yee: «Xeɗaam kuu bugoona, too xam ci’ong o ten.»

²³A daaɓooxa kene yee: «Kuu xeɗaxamoona, xam cooxong o ten, a refangaa genwal fee no maat ne mi sax.»

²⁴O toog oxaa a sutooxa, too a lay a ya um ee: «Xar um xeɗkaa?» Ya um a doonaan ee: «Xoox le Saŋ o Paabatiise xe.»

²⁵A ñofa o nomtoox ndak fo ndak maa no maad oxe, too a xeɗin ee: «Kaam bug o ɓisiidaam ndiiki xoox le Saŋ o Paabatiise xe no roon.»

²⁶O maad oxe a yogorlooxa lool, ndaa yaam a taaƥ ale ta daaboox’ina fo genar we, bug’iran o xañ o ten.

²⁷Ndak fo ndak, a lula a alkaati, a heblin ta ɓisiid xoox le Saŋ o Paabatiise xe. Alkaati fee a reta kam kaso faa, a ɗeg xoox le Saŋ, a ɓisiidin no roon,

²⁸a cooxin o toog oxaa, soo o toog oxe a cooxin a ya um.

²⁹Yaa daalbe waa Saŋ a nanuuna, a ngara a njang o fimb olaa, soo a ngaskin.

³⁰Apootar we a mbokatoora paam Yeesu, a mbetandooxin ke da mbi’’ina fop fo ke da njangin’ina fop.

³¹Wiin mayu kaa ngaroogu, wene a ndetaa, boo njeg’ee sax o daaw olaa da ñaamitna. Kaaga tax’u Yeesu a lay a den ee: «Ngaryo i ndiƈatoox no mbiñ o mbootu, ndax nu mbaag o ñootnoox o ndik.»

³²A ndeta no suk, den soom, ndax da ndiƈatoox boo no mbiñ o mbootu.

³³Wiin mayu a nga’a a den da ndetaa, too a andda a den. Ten taxu a inoortiida no teeru kaa fop, a siipaa soo a adook a den maaga da njofoogna.

³⁴Yaa Yeesu a sutooxna suk naa, a ga’a wiin mayu. A yuɗ’aan lool, yaam kaa nand’u nen paal kaa njegeerna o kaynaak. A dalfooxa o ref no jangnaa a den mayu.

³⁵Yaa da moofna boo njeeƈ naa a yaarkaa, daalbe we ten a matiidaan, a layin ee: «O mbiñ onqene a woota lool, too tige a yaara.

³⁶Nomti a den, da ndet kam caate ke matna mene, a njikik kaa da ñaamna.»

³⁷Yeesu a doona a den ee: «Cooxyo a den da ñaam nuun fa qoox nuun.» Kaa koy, a ndoonaan ee: «Ndax kaa i njangkaa xa qanjar teemeed ƭik xaaliis fa nqoolu, njiktikin puuru, soo cooxin a den da ñaam?»

³⁸Maaga, a doona a den ee: «Puuru podnum nu njegu? Ndetyo ƭeetik!» A ƭeeta a paax, too a ndoonaan ee: «Puuru ƥetik fo liƥ ƭik itam.»

³⁹Maaga, Yeesu a hebla a den ee: «Moofinyo a den no suuƴin le, den fop, mbi a den a qaaj.»

⁴⁰Wiin we a moofa a nqaajoor, mene teemeed, maana qarɓeen ƥetik.

⁴¹Yeesu a janga puuru ƥetik kaa fo liƥ ƭik kaa, a daxaaƴoox na asamaan, a gidim a Roog. Yaa ta xeɗna boo a ƴut, a xusta puuru kaa, a cooxin daalbe we, ndax da lasin wiin waa. A xaajranda a den liƥ ƭik ke itam.

⁴²Fop a ñaama boo a ngiñ,

⁴³too daalbe we a nqaadta a ƭamba xarɓaxay fo a ƭamba ƭak akaa mayna muut fo xa ƭeg puuru fo kaa yoq’ina no liƥ ke.

⁴⁴No waa ñaam’ina puuru kaa, goor we cuni ƥetik a ndeeƭu.

⁴⁵Cinj kaaga, Yeesu a hebla daalbe waa da ndok no suk naa, a adookin kaltaa o maag olaa, no saax o lakas olaa farna fa saate faa Betsayda, boo ta helko fo nomtaa wiin waa.

⁴⁶Yaa ta nomitna a den, a ŋaaya took o joong olaa, ndax ta xeɗ.

⁴⁷Yaa ta yaarna, suk naa a reeƭa ndeer ee ndeer o maag olaa, too Yeesu soom reeƭatu na ƥeeraamb alaa.

⁴⁸A ga’a yee a laf alaa den a jeg’a coono lool, yaam kaa mbaambir’u fo nqeñ ne. Farna fa siik-a-peraand, Yeesu a daaba a den, a ñaaƴaa took foofi laa no maag ole boo a bug o jol a den.

⁴⁹Yaa daalbe waa a nga’uuna ta ñaaƴaa took o maag ole, a mboog’a yee o qon-o-paaf oo, too a mbaɗooxa.

⁵⁰Den fop a nga’aan, too a ndiida lool. Ndak fo ndak, Yeesu a laya a den ee: «Saƭakinooxyo! Mi yoo, ba nu ndiid.»

⁵¹Cinj kaaga, a roka fa den no suk naa, too nqeñ naa a riima. Daalbe waa a njaaxiɗ’a lool,

⁵²yaam o saƭkel ole na qeeñ den tax’u boo ke xew’ina fo puuru ke sax rokee na qoox den.

⁵³Yaa da nqaañna o maag olaa, a mbadiida no saax laa Genesaret soo a ndangin suk naa.

⁵⁴Yaa da sutooxna suk naa, ndak fo ndak wiin waa a andda a Yeesu.

⁵⁵Muu da nan’ina kam saax laa yee Yeesu oxaay maaga, a ƈufooga, a ƥisiidin jiru waa mbondneena no cong.

⁵⁶Muu Yeesu a rok’ina rok, ta ref saax mbaat teeru mbaat na koƥ ale, jiru we kaa ndoonoogel na baayo fee, too a nqeɗoogaan, ndax da nduq o noflax ndoki um soom. We nduqooguuna fop a mbodooga.