Read NQAARIIT NE ROOG Mark 7 Bible Online

Mark 7 - NQAARIIT NE ROOG bible

Mark 7

¹Farisiya we fo leng-leng no jaajangin we no kebil kaa Moyiis a inoora Yeerusaleem, too a ngar maa Yeesu.

²A nga’a leng-leng no daalbe we ten a ñaamaa fo xa ƥay xa qooleer, yaam njapee a den.

³Farisiya we fo Yaawuur we fop ñaamkee muk, too njapee, ne o mbaax onqe no maak we den a heblituuna.

⁴Boo da inoorna na marse faa, ñaamkee a refangeerna kaa ƥogdoox. A naanga o ndeefaa itam lakas mayu kaa o mbaax onqe na ƭat den a hebilna, nen a ƥogid ale na tokol ake fo no qaw ke fo na kaleera ke fo no cong ke.

⁵Yaam keene, Farisiya we fo jaajangin we no kebil ke a laamtaan ee: «Xar taxu daalbe of naangee o ndeefaa o mbaax onqe no maak we in, ndax a ñaamaa fo xa ƥay xa capaand?»

⁶Maaga, Yeesu a doona a den ee: «Yememaar we nu ndefna! Esayi a laya ndigil, ye ta jo’tanna a Roog no kaa farna na nuun. Neene a binda yee: ‹Xeet fene xa ton den soom a niwtaxam, ndaa a qeeñ den kaa ngoƭaam.

⁷Ne da ndeeftaxam jegee o njiriiñ, yaam kaa njangnaa kebil kaa ngatna no wiin we.›

⁸Kaa nu mbes kebil ke Roog a cinj, soo sereƥoox no mbaax onqe no wiin we.»

⁹A layahina a den ee: «Nu anda a paax ne nu mbarna o ñufit kebil ne Roog, ndax nu mbaag o ngeek o mbaax onqe nuun.

¹⁰Moyiis kaa lay ee: ‹Niwi a faap of fa ya of›, a lay itam ee: ‹Oxuu salooxna a faap um mbaat a ya um kaa warel o war.›

¹¹Nuun o mat, kaa nu layaa yee: Boo o kiin a layna a faap um mbaat a ya um ee: Ke war’oonga o dimle’it kaa ref korbaan (ten tektu yee sadaxaanum a Roog),

¹²nu nqaƴkatiran ta fi’an a faap um mbaat a ya um tig nen o ndimle.

¹³Neene nu ñuftaa fa lay fee Roog na pexey o mbaax onqe nuun nu ndalinna. Kaa nu mbi’aa tig lakas mayu nandu neene itam.»

¹⁴Yeesu a dakooxa o xoy wiin mayu waa, a lay a den ee: «Nan-gilooxaamoo nuun fop, too andyo kene:

¹⁵Dara no ke na rokaa no kiin, a inoor tafil, waagiran o roɗgand, ndaa ke na sutooraa no ten refu ke na roɗgandan. [

¹⁶Oxuu jegna nof nanir, fat a nan-giloox!]»

¹⁷Yaa Yeesu a inooxna maa no wiin mayu waa, a rok kam mbind naa, daalbe we ten a laamtaan kaa farna na naxax aleene.

¹⁸A laya a den ee: «Nuun itam, ndax kaa nu ndefkahinaa no ñak-o-and? Ndax kaa nu andee yee dara no ke na rokaa no kiin, a inoor tafil, waagiran o roɗgand?

¹⁹Yaam keene naagee o rokaa no xeeñ um ndaa no fud um, too xan a sutooxel.» Na xa ƭelem axeene, Yeesu kaa layoogu yee ñaamel ke fop a nqoola.

²⁰A layahina yee: «Ke na sutooraa no kiin na roɗgandan.

²¹Yaam a qalaat a paaxeer ake, no xeeñ no kiin a sutooraa, den fo pesanir ke fo kuuƭ ke fo barir ke

²²fo ceeq ke fo bug xaaliis fo coxod ne fo naxir ke fo a pi a parƴu ke no cer ke fo ciisir ke fo a ben ake fo a magnandax ale fo o ñak-xoox ole.

²³Paaxeer keene fop kam fee a sutooraa, too den na ndoɗgandaa o kiin.»

²⁴Yeesu a inoorta maaga, soo a ret no lanq kaa Tiir. A roka no mbind, too bug’ee o leng a and ee oxe meen, ndaa waagee o ɗas.

²⁵O tew oxaa jini a dam’ina o ƥeem o ndew, a nana wiin we a laytan, too a gara a gooknoox na caf um.

²⁶O tew oxeene o Keegeres a reeƭu, a rimel ndeer no Fenisiya we no saax laa Siri. A xeɗooxaan ndax ta rax jini fee reeƭna no ƥeem o ndew onqeene.

²⁷Yeesu a doonaan ee: «Xaƴi kañ xa teɓandoong axe a ñaam boo a ngiñ, yaam faaxee ndax o jang ñaamel ke na xa teɓandoong axe, soo cooxin xa kurik axe.»

²⁸O tew oxe a doonaan ee: «Iyo o Yaal oxe, ndaa xa kurik axe sax ndefna paam o roon ole, kaa ñaamaa ke na samtaa na xa teɓandoong axe.»

²⁹Maaga, Yeesu a layaan ee: «Yaam fa lay feene waagaa o nomtoox no mbind of. Jini fee a sutooxa no ƥeef.»

³⁰Yaa ta xaadna no mbind um, a soƥa o njaaƈ onqaa ta wondoox took njong naa, too jini fee a sutoox’a no ten.

³¹Yeesu a inoorta no lanq kaa Tiir, a reeftiid Sidoŋ, a xaañ no saax laa Dekapol[2], soo a fadiid no Maag olaa Galile.

³²A ɓisiide o koor o tamu xaa waageerna fa lay a paax, too wiin waa a nqeɗaan, ndax ta doonin o ɓay um.

³³Yeesu a riƈatooxa fo ten boo a goƭ wiin mayu waa, a ɓekin qol no nof, a duqin no ɗelem le fo a toxoñ um.

³⁴Cinj kaaga, a daxaaƴooxa na asamaan, a gatandoox, soo a lay ee: «Efata!» (Ten tektu «Wetooxi!»)

³⁵Ndak fo ndak, nof kaa ten a mbetooxa, ɗelem um a loktoox, soo ta layaa a qool qac.

³⁶Yeesu a maƭooxa a den ee baa da layin o leng, ndaa nuu ta moƴ’ina o maƭooraa a den, naaga a moƴ’un o yegnitaa.

³⁷Den fop kaa njaaxiɗ’u lool, too a layooga yee: «No ndigil, ke ta fi’aa fop paax oo, kaa nannooraa ram we, a laynooraa muum we.»