Read NQAARIIT NE ROOG Lik 1 Bible Online

Lik 1 - NQAARIIT NE ROOG bible

Lik 1

¹Wiin mayu a mbera o mbind ke xewna a ndeer in,

²a reefandel no ke we seede’uuna no mberaand naa a ndaawinna a in, den we ndefatna we na yegnitaa fa Lay fee Roog.

³Ten taxu, mi yoo, eetaam o ɓaal a paax ne keene fop a xewitna no kaa xotitna no mberaand naa, soo ga ee a faaxa um bindong o ten a qool qac, wo Tewofiil fee o koor o paax,

⁴ndax o and ee ndigil ne na cangin ale daawoona a saƭka.

⁵Na jamaane Herood fee o maad Yudee, a jeg’a o saasadax oxaa ne’eena Sakari a fog na qaaj ale Abiya. O teem Elisabet no kurcala le Aaroon fee o saasadax oxe, a fog’u.

⁶Den ɗik fop a njof’a mbaambir Roog, a ndeefaa kebil ke fo bargal ke no Yaal oxe ne waritna.

⁷Kaa koy, njeg’ee xa ƥiy, yaam Elisabet o tew o timar a reeƭu, too den ɗik fop kaa maak’atu.

⁸Maaga, waxtu fee Sakari a war’ina o fadnik o far um mbaambir Roog a fadiida, yaam a qaaj ale ten yoqit’e.

⁹A mbanjanga ne o mbaax onqe no saasadax we a simtituuna. Neene, Sakari a war’a o ɓoxot cuuraay fee kam Mbind Roog ne.

¹⁰Mbokatax naa fop kaa nqeɗoogu tafil ye ta ɓoxotan.

¹¹Maaga, malaaka no Yaal oxe a feeñooxa a Sakari, a geenoox na ñamaak o sadaxand ole na cuuraay fee.

¹²Yaa ta ga’nooxuuna, Sakari a jomi’’a, a diid lool.

¹³Kaa koy, malaaka fee a layaan ee: «Ba o diid Sakari, yaam Roog a jaɓa a qeƭ of. Xan o teef Elisabet a ñoot o ƥiy o ngoor, too fat o ne’in Saŋ.

¹⁴Xan a ref na wo o ɗaay fo o mbelakinax. Xan mayu a mbelakinoox no rimel um,

¹⁵yaam xan a ref o kiin o maak mbaambir no Yaal oxe. Yerkee biiñ mbaat a yer alaa waagna o way o kiin, too boo ta helko fo rimeel, xan a soƥ ta may fo Yiif Tedu le.

¹⁶Xan a xuriid wiin mayu na xeet fee Isra’el maa no Yaal oxe Roog den.

¹⁷Xan a adooxiid o Yaal oxe, a saq yiif no tuleer le fa katil fee Eliya. Neene, xan a xuriid paap ke da njeg jam na xa ƥiy den. Xan a ɗox jofaƭaru we itam da njegat a qalaat a cofu. Neene, xan a fi’an o Yaal oxe xeet fa njagande.»

¹⁸Sakari a laya malaaka fee yee: «Nam um anditkaa keene? Kaam nogoy, too o tees itam a maaka.»

¹⁹Malaaka fee a doonaan ee: «Mi yoo Gaburi’el, na geenooxaa mbaambir Roog. Kaam luliidel me wo, ndax um layong yegil mbaax neene.

²⁰Ndiiki koy, xan o muum, too waagkatiro fa lay boo na bes faa keene a fadiidkaa, yaam gimiro fa lay es fee na fadnooxkaa na waxtu um.»

²¹Yaa kaaga fop a faafna, xeet fee kaa cungoogu a Sakari, a njaaxiɗ no ke geek’uuna miñu kam Mbind Roog ne.

²²Ye ta sutooxiidna, waag’atee o lay fa den. Neene, wiin we a anda yee kaa feeñoox’el kam Mbind Roog ne. Kaa caxoogu a den, yaam ne ta muum’atna.

²³Yaa a pe akaa ta warna o faɗoox a mbaafna, a xaada no mbind um.

²⁴A cinj a pe a leng a leng, Elisabet fee o teem a roka o fud. Maaga, a ɗasa a qool a ƥetak, a layaa yee:

²⁵«Keene o Yaal oxe fi’un na mi! A naaga jak a kid um took es, ndax ta watin gaci es a ndeer no wiin we.»

²⁶Cinj a qool ɓetaa fo leng, Roog a luliida a Gaburi’el na teeru faa ne’eena Nasaret kam Galile

²⁷maa no toog no koor o ne’e Yoseef, too a fog no kurcala le Dawid. O toog oxe Mari a ne’’e.

²⁸Malaaka fee a roka na ndok um, a lay a Mari yee: «Mexe simnang, wo fee daawna yirmande. O Yaal oxe xe fa wo.»

²⁹Mari a jomi’’a lool na fa lay faaga, too a misiirooga ke kaaga a tekit’ina.

³⁰Malaaka fee a dakooxaan o lay ee: «Ba o saɗar dara Mari, yaam Roog a ci’aang yirmande.

³¹Xan o ref fo fud, too xan o ñoot o ƥiy o ngoor. Fat o ne’in Yeesu[1].

³²Xan a ref o kiin o maak, too xan a xoyeel o Ƥeenqe no xe Took-ee-took. Xan o Yaal oxe Roog a ci’in ta ref o maad nen a Dawid fee o taan um.

³³Xan a maadoox a ndeer xa taan Yakoob bo na moos boo moos, too maat um jegkee muukandoong.»

³⁴Maaga, Mari a laya malaaka fee yee: «Nam keene a waagu o jegit, too andiim adna?»

³⁵Malaaka fee a doonaan ee: «Xan Yiif Tedu le a fudoox took of, too xan katil fee no xe Took-ee-took a muurong fo yook um. Ten taxu, o ƥiy o tedu nqe o ñootkaa xan a xoyeel o Ƥeenqe Roog.

³⁶O pog yaay of Elisabet a fuda ten itam, ke ta maakna maak fop oo, ten fee xoyoogeena o timar oxe. Oxe no nqool ɓetaa fo lengandeer um,

³⁷yaam dara xoxee a Roog.»

³⁸Cinj kaaga, Mari a laya yee: «O paɗ no Yaal oxe refum, fat a jegit ne laytanoona!» Maaga, malaaka fee a riƈatooxaan.

³⁹Na pe akaaga sax sax Mari a inooxa, a ñof o ret farna fo xa coong axe kam teeru fa leng no lanq kaa Yudaa.

⁴⁰Yaa ta fadna, a roka kam mbind Sakari, too a simna a Elisabet.

⁴¹Yaa Elisabet a nanna simin ne Mari, o ƥiy onqe a yo’nooxa kam o fud um. Elisabet a maya fo Yiif Tedu le,

⁴²too a laya a maak ee: «Roog a barke’aang ndeer no rew we fop, too o ƥiy onqe no fud of a barke’e itam.

⁴³Ey waay, nam ya no Yaal oxe mi a jaɓtu o garit a paam es?

⁴⁴Yaam ndak fo ndak ye simin ne wo a nannooxna no nof es, o ƥeenqe a yo’noora no fud es, a may fo o ɗaay.

⁴⁵Oxe gimna yee ke layeena no gon no Yaal oxe xan a fadnoox a ɗaaya.»

⁴⁶Maaga, Mari a xaana yee: «O laaw es oxe simataa o Yaal oxe,

⁴⁷yiif es a felakinooxaa na Roog fee o Muumucil es.

⁴⁸Kaa doon a kid um took es, mi fee o paɗ um o neewu. No ke xotitna ndiiki xan wiin we no camaane ke fop a nqoyaxam o ƭaayu xe.

⁴⁹O Cegu katil oxe a fi’anaxam tig maak. Gon um kaa ted.

⁵⁰Xan a yirim we saɗaruuna na xa taan boo na xa tanaraat.

⁵¹A fi’a a pi katil fo a naax um, a pasar we magnandooxna na qeeñ den.

⁵²A maafa katil no maad we, a yoɗ we neewandooxna.

⁵³A ci’a we nqeexeena da ñaam boo a ngiñ, soo a rax yaal kalal ke o ƥor.

⁵⁴A ƴufga a Isra’el fee o paɗ um, a wetandoox yirmande fee ta regna a den,

⁵⁵ne ta layit’uuna daan we in, ta ref Abraham fo xa taan um boo kili.»

⁵⁶Mari a moofa fa Elisabet boo a qool a tadak, soo a nomtoox no mbind um.

⁵⁷Waxtu fee Elisabet a war’ina o ñoot a fadiida, too a ñoota o ƥiy o ngoor.

⁵⁸Gentand we fo fog we a yega yee o Yaal oxe a yirmaan, too a mbelakinooxa fo ten.

⁵⁹Yaa bes faa a dakooxiidna, wiin we a ngara ndax da nquc o ndeɓandoong onqe. A mbug’a o moolan o nqeq onqe Sakari, refna ref gon faap um.

⁶⁰Kaa koy, ya um a laya a den ee: «Ha’aa, Saŋ a ne’keel.»

⁶¹A ndoonaan ee: «Jegee o leng no kurcala of oxaa ne’eena gon leene.»

⁶²Maaga, a caxa a faap um ndax da and ne ta ne’keel.

⁶³Sakari a laaca a alfa, too a bind ee: «Saŋ a ne’e.» Yaa fop a nanna kaaga, a njaaxiɗ’a.

⁶⁴Ndak fo ndak, o don um a muƥtooxa, ɗelem um a loktoox, ta layataa, a simataa a Roog.

⁶⁵We ngenna paam maaga fop a ndiida, too ke xew’ina kaa laytoogel took xa coong axe Yudee.

⁶⁶We nan’uuna fop kaa ngeek’un kam a qeeñ den, too a layaa yee: «Xar o ndeɓandoong onqene a teki’kaa?» Yaam o Yaal oxe kaa saytoortin o ɓay um.

⁶⁷Sakari fee faap Saŋ a maya fo Yiif Tedu le, too a yegnita yee:

⁶⁸«O Yaal oxe Roog fee Isra’el a hela o simatel, no ke ta fudooxiidna, a watiid xeet um.

⁶⁹A ci’a a in o Muumucil o mayu katil kam mbind Dawid fee o paɗ um,

⁷⁰a reefandin no ke duleer tedu we ten a layna no camaane kaana mbaafna.

⁷¹A yegnita o Muumucil oxaa na watkaa a in no fañ we in fo na xa ƥay no we sibna a in fop.

⁷²Neene o mat a yirmitu daan we in, a wetandoox ngiɓoor tedu ne ten,

⁷³a reefandin no ke ta daaɓoox’ina fa Abraham fee o taan in.

⁷⁴A cinj ye ta watna a in no ɓay no fañ we in, a taxa i mbaɗooxan, too mbañ o mbit dara.

⁷⁵A taxa itam i ñaaƴaa mbaambir um kam o tedel fo kam o cofel bes fuu refna no ñoow in.

⁷⁶Wo o mat o ƥees, xan o xoyeel o tuleer no xe Took-ee-took. Xan o ñaaƴaa mbaambir no Yaal oxe, ndax o jagandanin a ƭat um.

⁷⁷Xan o andnoor xeet um ee xan a mucil a den na pexey a baasan pakaad den. yaa da mbaasnooxna pakaad den.

⁷⁸Roog in kaa may yirmande, too a lewet. Xan a feedin a in a muc ale,

⁷⁹ndax ta xooland we moofna no niɓaan ole fo we ndefna na pelyook fa nqon. Neene koy xan a ɗox a in, i ndeef a ƭat jam.»

⁸⁰Maaga, o ndeɓandoong onqe a maakooga, too a moƴ o jegaa yiif. Kam a koƥ-a-ƥor ale a gen’u, boo na bes faa ta geenooxna mbaambir Isra’el.