Read NQAARIIT NE ROOG Lik 10 Bible Online

Lik 10 - NQAARIIT NE ROOG bible

Lik 10

¹Cinj kaaga, o Yaal oxe a jila daalbe qarɓeen ɓetuu ɗik [fo daalbe ɗik], soo a lul a den ɗik-ɗik, da adookin no teeru ke fo fop me ta narna o ret ten fa xoox um.

²Maaga, a laya a den ee: «A saxad ale a magna, ndaa jaajal we mayee. Nqeɗyo o Yaal a saxad ale boog, ndax ta luliid jaajal na saxad ale ten.

³Ndetyo! Mexe lulaa a nuun nen fo mbaal kam xa moon.

⁴Ba nu saq nafa mbaat o fof mbaat xa ñaaƭ, too ba nu simnireel rek yaa nu ndefna na ƭat.

⁵Boo nu ndokaa no mbind, fat nu eet o lay ee: ‹Yaasam mbind nuun a jeg jam!›

⁶O kiin jam a refangaa no mbind naaga, xan jam nuun a fudoox took um, ndaa a jegangee, xan jam nuun a nomtooxiid took nuun.

⁷Ndalyo no mbind naaga, ñaamaa yeraa ke nu mbugko cooxeel boo yaa a tet nuun a fadkaa, yaam oxe na jalaa a wara o rabdel. Ba nu ndalaa ndeer mbind fo mbind.

⁸Na teeru fuu nu ndokna, too ngenarel, ñaamyo ke nu cooxkeel.

⁹Mbodandyo jiru we nu soƥkaa maaga, too mbaare a den ee: ‹Maat ne Roog a matiida a nuun.›

¹⁰Kaa koy, na teeru fuu nu ndokna, too ngenaree a nuun, sutooxyo no ped ke, too lay ee:

¹¹‹In we yirfaa a nuun fo ut ole na teeru nuun taƥna na caf in. Yaag oo toox de fat nu and ee Maat ne Roog a matiida.›

¹²Mexe layaa a nuun ee: Na bes faa na hate faa Roog, teeru faa Sodoom na moƴkaa o yooɓiɗ hate teeru faaga.»

¹³«Ndaw sabab took of, wo Korasiin, ndaw sabab took of, wo Betsayda, yaam a pi katil ake mbi’eena me nuun a mbi’’ange kam Tiir fa Sidoŋ, a mbeskooga pakaad den a cinj yaaga, a nderoox xa saaku, a moof no ndaw, ndax da lalit ee a ndicooxa.

¹⁴Ten taxu, no nqel naa Roog, Tiir fa Sidoŋ na moƴkaa o yooɓiɗ a nuun hate.

¹⁵Wo Kapernawum o mat, ndax xan o yoɗel boo na asamaan? Ha’aa! Xan o fudnel boo kam jaaniif.»

¹⁶Yeesu a dakooxa o lay daalbe um ee: «Oxuu nan-gilooxna a nuun, mi a nan-gilooxu, oxuu fañna a nuun, mi a fañu, too oxuu fañaxama, Faap es fee luliidaxama a fañu.»

¹⁷Daalbe qarɓeen ɓetuu ɗik we [fo daalbe ɗik we] a nomtooxiida fo o ɗaay, too a lay ee: «O Yaal oxe, cini ke sax a nanana a in yaam gon of.»

¹⁸Yeesu a laya a den ee: «Ga’aam a Saytaane ta yentiidaa na asamaan nen o hiiñ.

¹⁹Nan-gilooxyo: Ci’aam a nuun sañ-sañ faa nu ñaaƴtaa took ƥood ke fo a beex ake fa katil ke no pañ oxe fop, too dara waagkee o gaañ a nuun.

²⁰Ndiiki boog, ba nu mbelakinoox yaam ne cini ke a nananaa a nuun, ndaa mbelakinooxyo yaam ne a kon nuun a mbindeena na asamaan.»

²¹Na waxtu faaga sax, Yeesu a maya fo o ɗaay no Yiif Tedu le, too a lay ee: «Faap, mexe gidmang, wo o Yaal asamaan fo lanq, yaam ɗasnaa kene yaal-o-and we fo jegu yiif we, soo feeñlin we moƴna o neew. Iyo Faap, neene mat a waagu refit, yaam ten felong.

²²Faap es a cooxaxam fop, too o leng andee o Ƥeenqe a refangeerna Faap fee. O leng andee a Faap fee itam, a refangeerna o Ƥeenqe fo xaa ta buguuna o feeñil.»

²³Maaga, Yeesu a geleerooxa, a faambir fo daalbe we ten, too a lay a den, den doŋ ee: «A kid ake na nga’aa ke nu nga’aa, a ƭaaya.

²⁴Yaam mexe layaa a nuun ee: Duleer mayu fo maad mayu a mbug’a o nga ke nu nga’aa, too nga’iran, a mbug o nan ke nu nanaa, too naniran.»

²⁵O caajangin o maak no kebil ke a bug’a o ɗeetloox a Yeesu. A inooxa, a laamtin ee: «O Caajangin oxe, xar warum o fi ndax um jeg o ñoow o fagkeer ole?»

²⁶Yeesu a doonaan ee: «Xar binde no Safe le no kebil ke? Xar jango teen?»

²⁷A doona a Yeesu yee: «Xan o fex o Yaal oxe Roog of no xeeñ of fop, no laaw of fop, na doole of fop, fo na qalaat of fop, too xan o fex o kend of nen a xoox of.»

²⁸Maaga, Yeesu a layaan ee: «Ndigil kak layo. Fi’i keene, too xan o ñoow.»

²⁹Kaa koy, o koor oxaaga a bug’a o ɓur, too a laamta a Yeesu yee: «An refu o kend es?»

³⁰Maaga, Yeesu a doonaan ee: «O koor a inoor’a Yeerusaleem, a retaa Yeriko. Yaa ta retaa boo na ƭat ale, guuɗ a songaan, a njaɓ tikoorik um. A nqawaan boo a ngaañin soo a ndet, a nqaƴin maaga ta meeñaa.

³¹A soƥa o saasadax a reef a ƭat alaaga. Yaa ta ga’na o koor oxaaga, a joona, a waan.

³²O Leelewi a fadiida maaga itam. Yaa ta ga’na o koor oxaa, a fi’a nen o eetaand oxaa, a joon, a waan.

³³Yaa oxaaga a waanna boo a ɓaatin, o Saasamari a fadiida. Yaa ta ga’uuna, a yuɗaan lool.

³⁴A matiidaan, a ɗuumanin diwliin fa biiñ no kaañax ke, a laxasanin o ten, soo a ŋaaynin no faam um, a ɓisin no mbind naa genar we a ndalnoogeena, soo a topatooxin a paax.

³⁵No feet olaa, a suta xa qanjar xa ƭaq, refna ndabid calel ñaal ƭik, a cooxin o yaal mbind naa, soo a layin ee: ‹Topatooxi o koor oxene ne waritna. Boo nomtooxiiduuma, xam rabdong ke na foolkaa teen.› »

³⁶Maaga, Yeesu a laamtaan ee: «Oxum no daduk weene laltu yee o kend no xe guuɗ we a song’ina a refu?»

³⁷O caajangin oxaa no kebil ke a doonaan ee: «Oxe yirim’uuna.» Maaga, Yeesu a layaan ee: «Reti, too fi naaga!»

³⁸Yaa Yeesu fo daalbe waa ten a ndefna na ƭat, a ndoka na saate, too o tew oxaa ne’eena Marta a dalna a Yeesu no mbind um.

³⁹O ndeɓ um onqaa ne’eena Mari, kaa moof’u paam Yeesu, soo a nan-gilooxaa a cangin um.

⁴⁰Marta a topatooxooga mayu yaam genar we. A gara, too a lay a Yeesu yee: «O Yaal oxe, ndax keeke ɗomirang, o ndeɓ es a moof, a xaƴaam fo calel ke, mi soom? Layeen boog ta dimle’aam!»

⁴¹Yeesu a doonaan ee: «Wo kañ Marta, kaa o roxondoox mayu, too may kaŋ-kaŋ,

⁴²ndaa tig leng kut jegu o njiriiñ. Ɗeeti, Mari a jila a las a paax ale o leng a jaɓkeerna no ten.»