Read NQAARIIT NE ROOG Lik 12 Bible Online

Lik 12 - NQAARIIT NE ROOG bible

Lik 12

¹Na waxtu faaga, wiin cuni-cuni a mbokatoora, a ndakraa. Yeesu a fera o maƭoox daalbe we ten, too a lay a den ee: «Mbootooxyo poɗaxnir ke no Farisiya we! Kaa tekit yememaar.

²Ke singeena fop xan a singtel soo ke ɗasneena fop a ñuqtel.

³Ten taxu ke nu laykaa no niɓaan ole fop, xan a nanel ñaal ne, too ke nu nde’irkaa kam a ndok, xan a yegnitel no qel ke.»

⁴«Kaam layan a nuun, nuun we ndefna qaariit es: Ba nu mbit we mbaagna o mbar cer, too cinj kaaga mbaagee o mbi kaa hupuuna.

⁵Xam lay a nuun oxe jarna o fitel. Mbityo a Roog fee waagna o war, soo a jeg sañ-sañ faa ta ɓekitna kam fiɗel laa ñufkeerna. Iyo, mexe layan a nuun, oxeene o mat refu oxe nu mbarna o mbit.

⁶Ndax nu naangee o njikooraa xa ñere-ñere xa ƥetaq xa terem xa ƭaq? Yaaga fop toox de, Roog weecee o ndiiƭ onqe moƴna o neew na den.

⁷Wiil le na qoox ake nuun sax kaa limel. Ba nu saɗarat boog! Nuun ngupu giiraand xa ñere-ñere o njiriiñ.»

⁸«Mexe layan a nuun, oxuu layna mbaambir no wiin we yee a andaxam, xan o Ƥeenqe no kiin oxe a lay mbaambir malaaka ke Roog ee a andaan.

⁹Kaa koy, oxuu layna mbaambir no wiin we yee andiraam, too a andaam, xam lay mbaambir no malaaka kaa Roog ee andinum.

¹⁰Oxuu wenna o Ƥeenqe no kiin oxe, a waage o waasan. Kaa koy, oxuu wenna Yiif Tedu le, waasankaand.

¹¹Boo nu ƥiseena na hate no pind a qeƭ ke mbaat mbaambir no haahate we mbaat mbaambir no wiin maak we, ba nu nqalam ke nu ndoonkaa mbaat ne nu layitkaa,

¹²yaam na waxtu faaga sax sax xan Yiif Tedu le a jangin a nuun ke nu mbarna o lay.»

¹³O leng ndeer no wiin mayu waa a laya a Yeesu yee: «O Yaal oxe, layi o maag es ta xaajir fa mi ke i mbarna o lam.»

¹⁴Yeesu a doonaan ee: «Koor oxe, an ɓekaxam no tig nuun boo um xaajanaa a nuun halal nuun?»

¹⁵Yeesu a laya a den ee: «Yetooxyo too mbootoox o mbeq halal, yaam o ñoow no kiin refee no jeg halal, kuu ta mayna may halal oo.»

¹⁶Maaga, Yeesu a naxooxa a den ee: «Xa qol no fes o mayu halal a mbat’a mayu.

¹⁷A xalaata taa no yiif um ee: ‹Xar warum o fi, yaam jegiim maa geekuuma saxade le mi?›

¹⁸Kaa koy, a laya na xoox um ee: ‹Kene warum o fi. Xam yaq tap ke mi, riwatin kaa moƴna o magin. Xam geer teen kaaf es fop fo o jeg es fop.

¹⁹Cinj kaaga, xam lay na xoox es ee: Wo o laaw es, jegaa paax mayu kaa geekanoona a xoox of boo xa kiid xa mayu. Naagi ñootnooxaa, ñaamaa, yeraa, felakinooxaa!›

²⁰Kaa koy, Roog a layaan ee: ‹Nawtul fene! O yeng oleeke sax sax xan o ñis of a xuufel, too yaaga boog an na jegkaa ke geeroona?›

²¹Neene deŋ a nandu no xe na fokatanooxanaa a xoox um halal, too jegee a Roog ta ref halal um.»

²²Cinj kaaga, Yeesu a laya daalbe we ten ee: «Ten taxu mexe layaa a nuun ee: Ba o ñoow mbaat ñaamel mbaat ñirax a njaaxɗand a nuun.

²³Mee ndax o ñoow ole moƴu a ñaam ale, soo cer ke a moƴ ñirax ke?

²⁴Mbetandooxyo a tooq ake andoona yee nduufkee, saxadkee, too njegee a semb mbaat tap, too Roog a ñoownaa a den. Ndax kaa nu andee yee nuun ngupu tiiƭ ke o njiriiñ?

²⁵An na nuun, na pexey a qalam um, waagu o ɓaat poye no saqit mbaambaañ na xa kiid um?

²⁶Yaaga boog, nu mbaaganangee a qoox nuun keene no ke moƴna o yooɓ, xar taxu nu njaaxɗaa no yoq ke?

²⁷Ƭeetaqinyo ne sufar-naak le a maaktaa, too jalkee, forolkee. Mexe layaa a nuun ee: O maad Salomo sax, ke ta jeg’ina jeg o ndam fop oo, mosee o ñiroor nen leng na den.

²⁸Roog a ñirtangaa neene daaƭ le na xa saawit axe, andoona yee a refangaa xaye, o feet ta deɓel no ngañ, ndax moƴkee o ñir a nuun? Nuun soo neew o ngim!

²⁹Ba nu ndef no mbaaƭaa boog kaa nu ñaamna mbaat kaa nu yerna mbaat kaa nu ñirooxna.

³⁰Keene fop koy, yeefar ke na adna fee fop na mbaaƭan. Kaa koy, Roog Faap nuun fee na asamaan a anda yee nu soxla’aan.

³¹Mbaaƭyo kañ Maat ne Roog, too keene fop xan nu ndoonanel o ten.»

³²«Ba nu mbit dara, o njiir onqe nu ndefna ndef! Yaam a fela a Faap nuun boo ta ci a nuun Maat um.

³³Njikooxyo ke nu njegna fop, soo ndimle’tin rool we. Mbaaƭanyo a qoox nuun o geekand o yaqukeer muk, ndax halal nuun a miñ na asamaan maa guuɗ we a matiidkeerna fo maa max ke a naangeerna o yaqtaa tus.

³⁴Yaam me kalal nuun a ndefna, maaga a yiif nuun a ndefkaa itam.»

³⁵«Njagandooxyo, too ngen no ngumnooxaa no ndet, ngeƥand xa lampa nuun.

³⁶Nuun boog, nandyo nen wiin waa na cungaa o yaal mbind den a nomtooxiid no ngulook ne, ndax da mbaagin o mbetan yaa ta fadiidna boo a koŋ-koŋin.

³⁷Faɗ we o yaal den a soƥkaa da yetooxaa a ƭaaya! No ndigil, mexe layaa a nuun ee: Xan a humnoox boo yee ŋaƭ, a diƈ a den, soo a matiid ndax ta dagoox a den.

³⁸A garangaa ndeer o yeng ole mbaat farna fa siik-a-peraand, we ta soƥkaa da yetooxaa, xan a ƭaay lool!

³⁹Andyo kene a paax: Boo o yaal mbind a and’ina waxtu fee o kuuɗ oxe a garkaa, xaƴkoogee mbind um a gefel.

⁴⁰Njagandooxyo nuun itam, yaam o Ƥeenqe no kiin oxe xan a gar na waxtu faa nu mboogooxkeeruuna.»

⁴¹Maaga, Piyeer a layaan ee: «O Yaal oxe, ndax in soom o naxooxaa keene ndi lakas we fop?»

⁴²O Yaal oxe a doonaan ee: «Jawdiin fum gore’u too a ƴiƴ boog, ndax o yaal mbind um a xaƴin fo wiin mbind um, ta cooxaa a den ñaamel, oxuu refna a las um, yaa waxtu fee a fadna?

⁴³O paɗ oxe o yaal mbind um a soƥkaa ta fi’aa ne warna, a ɗaaya!

⁴⁴No ndigil, mexe layaa a nuun ee: Xan a hooloox o doxnin o jeg um fop.

⁴⁵Kaa koy, boo ta refna o paɗ oxaa na layaa taa no yiif um ee: ‹O yaal mbind es oxe miñaa a koƥ›, soo a refat no xawaa faɗ we ta doxneena, goor fo rew, a ñaamaa, a yeraa wayaa,

⁴⁶xan o yaal mbind no paɗ oxaaga a gar no ñaal naa ta cungoogeeruuna fo na waxtu faa ta andeerna. Xan a ɗegin teɓ-reɓ, a fokat a las um fo gimaƭaru we.

⁴⁷O paɗ oxe andna ke o yaal mbind um a bugna, soo a fañ o jagandoox mbaat ta fañ o fi ke o yaal mbind um a bugna, na moƴkeel o xaw.

⁴⁸Kaa koy, o paɗ oxe andeerna ke o yaal mbind um a bugna, soo a fi’aa kaa waagna o tax ta xawel, oxeene o ndik rek a xawkeel. Xan oxe cooxeena mayu a laamtel mayu, soo oxe doxneena mayu a laamtel kupu.»

⁴⁹«Fiɗel kaƥniidum na adna fee, too bugaam tigi ta fi ƈulfaan.

⁵⁰Kaam war o jaɓ batiise fa ƭomu, ndaa bug’iim o ñaam jamaane es too fadninum.

⁵¹Ndax kaa nu mboog ee jam ɓisiidum na adna fee? Ha’aa, mexe layan a nuun, kaam xaajiid.

⁵²Ndiiki boog, wiin ɓetuk we ngenna no mbind xan a nqaajel. Xan ɗik we a yoonaƭar fo daduk we, soo daduk we a yoonaƭar fo ɗik we.

⁵³Xan faap a xaajoor fo o ƥeem o ngoor, too xan o ƥiy o ngoor a xaajoor fa faap um. Xan yaay a xaajoor fo o ƥeem o ndew, too xan o ƥiy o ndew a xaajoor fa ya um. Xan o seemir o tew oxe a xaajoor fo o tew o tolooxiidu xe, too xan o tew o tolooxiidu xe a xaajoor fo o seemir um o tew.»

⁵⁴Yeesu a layahina wiin waa yee: «Nu nga’angaa garinj no mudand, kaa nu layaa yee ndiik ta deɓ, too keene a naaga o jegaa.

⁵⁵Pooyo ke a mbadangaa, kaa nu layaa yee xan a sum, too keene a naaga o jegaa.

⁵⁶Yememaar we nu ndefna! Xar taxu nu mbaag o njekit ke na xewkaa a lanq fo na asamaan, too nu mbaagee o njekit jamaane fene sax?»

⁵⁷«Xar taxu nu ngorooxankee a qoox nuun muk, ndax nu nga ke jofna?

⁵⁸Boo nu ndetaa no maad, wo fo o pañ of, ñofi o xendandoor fo ten yaa nu ndefna na ƭat, yaam ndik nu ndet no kaahate xaa, soo ta ɓurong. O ɓurange, xan o kaahate xaa a ɓoxotong alkaati faa, too xan a ɓekong kaso.

⁵⁹Mexe layang o ten ee: Sutooxkiro maaga, too rabdiro o fiftin o falakaand ole.»