Read NQAARIIT NE ROOG Lik 17 Bible Online

Lik 17 - NQAARIIT NE ROOG bible

Lik 17

¹Yeesu a laya daalbe we ten ee: «Tolofnoorel ñakkee o jeg, ndaa ndaw sabab took no xe na ɓisiidan!

²Oxeene kiin a rokel ɓil unir no cok soo a deɓel no maag olaa moƴu no ten ee ta tolofnooraa o leng na xa teɓaandoong axeene ngimna na mi.

³Mbootooxyo na qoox nuun. Boo o pog of a bakaadna, xasaneen. A fesangaa pakaad um a cinj, waasaneen.

⁴A tooñangaang boo kaa fadna a caf ɓetaa ƭaq no ñaal leng, soo a gar boo a caf ɓetaa ƭaq a layong ee: ‹Fesaam pakaad es a cinj!› fat o waasanin.»

⁵Apootar we a laya o Yaal oxe yee: «Ɓaatani a in o ngim.»

⁶Maaga, o Yaal oxe a doona a den ee: «Nu njegangaa o ngim onqaa fodna nen o xonq seneew, nu mbaaga o lay ndaxar neeke yee: ‹Yoɗooxi too sipoox no maag ole›, too yaaga a nanankooga a nuun.

⁷O kiin na nuun a jegangaa o paɗ oxaa na jalaa no qol um mbaat ta gayanan, ndax xan a layin yaa ta gatna no qol ee: ‹Ñofi gar too ñaam!›

⁸Ndax laykiran ee: ‹Jawanaam a cu’ax, dagooxaxam boo yaa ñaamuuma, yer boo ƴut, soo a cinj kaaga o sog o ñaam, yer›?

⁹Ndax a saqana o paɗ oxeene o ngidim, yaam ne ta fi’na ke ta simuuna?

¹⁰Neene o mat a reftu na nuun. Nu mbi’angaa ke nu simeena boo ƈut, layyo yee: ‹Faɗ jegee njiriiñ i ndefu, ke i simeel soom i mbi’aa.› »

¹¹Yeesu a retooga Yeerusaleem, too a xaañ kam Samari fa Galile.

¹²Ne ta rok’ina na saate, goor xarɓaxay waa a tik-a-maak ale a damna a nqetooxiidaan. Yaa da maadna o ngoƭaa,

¹³a nqoya a maak ee: «Heey Yeesu, o Caajangin oxe, yirmi a in!»

¹⁴Yaa ta ga’na a den, a laya yee: «Ndetyo maa no saasadax waa, ndax da nga a nuun.» Yaa da ndetaa, a mbodta na ƭat ale.

¹⁵Yaa o leng na den a ga’na yee a woda, a nomtooxiidooga, a gidmaa a Roog a maak.

¹⁶Yaa ta fadiidna maa Yeesu, a diga o gooknoox na caf um, a jookin a njal. Oxeene o Saasamari a reeƭu.

¹⁷Maaga, Yeesu a laya yee: «Ndax xarɓaxay waa fop mbodee? Taa ɓetuu nahuk waa koy?

¹⁸Boo wo fee refna o kenar sax, o nomtooxiid boo waag o ɓoxotaa a Roog o ndam?»

¹⁹Maaga, Yeesu a layaan ee: «Inooxi ret, o ngim of a muclaang.»

²⁰Farisiya we a laamta a Yeesu a mbane Maat ne Roog a fadiidkaa. A doona a den ee: «Yaa Maat ne Roog a garkaa, nu ndoonkiran a ngid.

²¹O leng laykee yee: ‹Oxey mene mbaat maana.› Yaam Maat ne Roog oxey a ndeer nuun.»

²²Cinj kaaga, a laya daalbe waa yee: «Xan a jeg a pe akaa nu mbugkaa o nga ñaal leng no Ƥeenqe no kiin oxe, too nu mbaagkiran o nga.

²³Xan nu layel ee: ‹Oxey mene, oxaay maana.› Ba nu ndet, too ba nu ƈuf ndax nu nga’in.

²⁴Yaam ne o hiiñaand a fiisoortaa fo ne ta meleƈtaa na asamaan, a xotit no saax boo no saax o lakas, neene o mat a refitkaa no Ƥeenqe no kiin oxe a koom.

²⁵Kaa koy, oxeene kaa war o eet o coono mayu, too a sibel na xeet feeke.

²⁶Kaa xew’ina na jamaane Nowe na dakkaa o xew na bes faa no Ƥeenqe no kiin oxe.

²⁷Wiin we kaa ñaamoogu, a yeraa, a ndolniraa, a ci’taa xa ƥiy den a tolax, boo na bes faa Nowe a rok’ina na kaal alaa. O jaɓ ole a gara, too a saŋka a den, den fop.

²⁸Kaa xew’ina na jamaane Lot na dakkaa o xew. Wiin we kaa ñaamoogu, a yeraa, a njikaa, a njikooxaa, a njimbaa taxar soo a maxaa.

²⁹Kaa koy, na bes faa Lot a sutooxna Sodoom, a teƥ fiɗel fo kaa saxitna nen nqeen a yentiida na asamaan, a saŋik a den, den fop.

³⁰Neene o mat a refitkaa na bes faa o Ƥeenqe no kiin oxe a feeñkaa.

³¹Na bes faaga, oxe ta soƥkaa ta ŋaay no dung-took, soo a xaƴ tikoorik um kam a ndok ale, baa fudooxiid ndax ta xot a den, too oxe ta soƥkaa no qol, baa saktoox no mbind naa.

³²Mbetandooxyo o tew Lot.

³³Oxuu bugna o gay o ñis um xan a ñakin, too oxuu ñakna o ñis um xan a geekin.

³⁴Mexe layaa a nuun ee: No yeng olaaga wiin ɗik we ta soƥkaa no njong, xan o leng oxe a jangel, o lakas oxe a xaƴel.

³⁵Rew ɗik we ta soƥkaa da unaa, xan o leng oxe a jangel, o lakas oxe a xaƴel. [

³⁶A koom, goor ɗik we na ndefkaa no qol, xan o leng oxe a jangel, o lakas oxe a xaƴel.]»

³⁷Daalbe we a ndoonaan ee: «O Yaal oxe, mam kaaga a xewitkaa?» Maaga, Yeesu a doona a den ee: «Me o dal a refna, maaga a tud ake a mbokatooraa.»