Read NQAARIIT NE ROOG Lik 18 Bible Online

Lik 18 - NQAARIIT NE ROOG bible

Lik 18

¹Yeesu a naxooxa a den, ndax ta lal a den ee a mbara o ngen no nqeɗaa, too a mbañ o mbaas.

²A laya yee: «A jeg’a na teeru, o kaahate xaa saɗar’eerna a Roog, too a ƭat um yongee no leng.

³A jeg’a itam na teeru faaga o tew o ñaaw oxaa garoogna, a layan ee: ‹Ngela dimle’aam a ndeer es fo o pañ es!›

⁴Kaa koy, a miña lool, too dimle’iran. O kaahate xe a muj’ata o layaa taa no yiif um ee: ‹Refiim oxaa saɗarna a Roog, too a ƭat es yongee no leng.

⁵Kaa koy, ne o ñaaw oxene a xijlaxam, xam dimle’in, ndax garkatee a gefaa xoox es.› »

⁶O Yaal oxe a doona teen ee: «Nan-gilooxyo ke o kaahate o cofaƭaru xe a layna.

⁷Ndax kaa Roog dimle’kee xeet um, na nqeɗan ñaal fo o yeng? Ndi kaa yapatilkaa a den?

⁸Mexe layaa a nuun ee: Xan a ñof o dimle a den. Kaa koy, ndax xan o Ƥeenqe no kiin oxe a soƥat o ngim na adna, yaa ta garkaa?»

⁹Yeesu a naxooxahina a den no kaa farna no wiin waa mbi’ooxoogna wiin jofu soo a nqeefaa lakas we.

¹⁰A laya yee: «Wiin ɗik a ndet’a no Mbind Roog naa, ndax da nqeɗ. O leng oxe, o Farisiya a reeƭu, o lakas oxe, a ref o taarabdinax juuti.

¹¹O Farisiya xe a inooxa a geenoox, too a xeɗit nene yee: ‹Roog, mexe ɓoxotang tedaanga, yaam ne nandeeruuma fo wiin leng we ndefna guuɗ, a njofaƭar, a seeqaa mbaat nen o taarabdinax juuti xene sax.

¹²Naagaam o hooraa a caf a ƭak bes fa dakooxiidu fuu refna, cooxtaa a seek xarɓaxayandeer ale na halal es.›

¹³O taarabdinax juuti xe a foda a cinj, bug’ee sax o daxaaƴoox na asamaan. Kaa riqooxoogu no ngang, too a layaa yee: ‹Roog, yirmaam mi fee refna o paabakaad!›

¹⁴Mexe layaa a nuun ee: Oxene a xaada, too Roog a ɗeetaan nen o cofu, o lakas oxe koy, ɗeetaand. Yaam oxuu magnandooxna, xan a neewandel, too oxuu neewandooxna, xan a magnandel.»

¹⁵Yeesu a ɓisiide xa qeq, ndax ta duq a den. Kaa koy, yaa daalbe waa a nga’na kaaga, a nqasana waa ƥisiid’ina a den.

¹⁶Maaga, Yeesu a xoya a den, a lay a den ee: «Nqaƴyo xa teɓandoong axe da ngar me mi. Ba nu mbañit a den, yaam we nandna fa den njegu Maat ne Roog.

¹⁷No ndigil, mexe layaa a nuun ee: Oxuu jaɓeerna Maat ne Roog nen o ndeɓandoong, waagkee o rok teen.»

¹⁸O aa-adax a matiida, a laamit a Yeesu yee: «O Caajangin o paax oxe, xar helum o fi, ndax um lam o ñoow o fagkeer ole?»

¹⁹Yeesu a doonaan ee: «Xar taxu o xoyaxam o paaxu xe? O leng soom faaxu, ta ref Roog.

²⁰Ndax kaa andiro kebil kene: Seeqkiro! Warkiro o kiin! Guuɗkiro! Seede’ankiro o kend of na xa maaƥ! Niwi a faap of fa ya of!»

²¹A doonaan ee: «Miñaam o reefaa keene fop no ndeƥandoong es boo ndiik.»

²²Yaa Yeesu a nanna kaaga, a layaan ee: «A yoqahina leng kaa fi’eeroona: Jikooxi ke jegoona fop, lasin rool we, too yaaga xan o jeg halal na asamaan. Cinj kaaga, o gar reefanaam.»

²³Yaa o koor oxaa a nanna kaaga, a gooy’a bo, yaam kaa jeg’u halal fa mayu.

²⁴Yaa Yeesu a ga’na yee kaa gooy, a laya yee: «Xan yaal kalal ke a ƭom o ndok no Maat ne Roog.

²⁵Yaam ngeeleemb a ñoom no yul o fiic moƴu o yooɓ ee o yaal halal a rok no Maat ne Roog.»

²⁶Waa nan-gilooxooguuna a laya yee: «Yaaga boog, an waagu o muc?»

²⁷Yeesu a doona a den ee: «Roog a waaga kaa wiin we a mbaageerna.»

²⁸Maaga, Piyeer a layaan ee: «In de, i nqaƴa ke i njegna fop soo ndeefanong.»

²⁹Kaa koy, Yeesu a layaan ee: «No ndigil, mexe layaa a nuun ee: Jegee o leng oxaa na xaƴkaa mbind um mbaat o teem mbaat maag um mbaat xa teɓ um mbaat we ndimuuna mbaat xa ƥeem yaam Maat ne Roog,

³⁰too daawkee na adna feeke kupu ke ta jeg’ina, soo o ñoow o fagkeer ole a doonoox na jamaane fee na garaa.»

³¹Yeesu a xoya xarɓaxay fo ɗik waa, too a lay a den ee: «In we ndetaa Yeerusaleem, too ke duleer we a mbind’ina no Ƥeenqe no kiin oxe fop xan a fadnoox.

³²Xan a ɓoxotel gimaƭaru we ndax da nqaadnooxin, a mbadin, a nduxid took um,

³³a nqawin xa cap, a mbarin, ndaa no ñaal ndadkandeer naa xan a xontoox.»

³⁴Kaa koy, daalbe we andee dara no kaaga. Kaa reeƭu na den fa lay fa ƭasu faa da mbaageerna o and ke ta tekitna.

³⁵Yaa Yeesu a matiidna teeru faa Yeriko, a soƥ’a o puul a moof paam a ƭat ale, a sadaxnooxaa.

³⁶Yaa ta nanna coow laa no faan laa mbaanoogna, a laamta ke ta refna.

³⁷A jega oxaa layuuna yee: «Yeesu o Naanasaret oxe na waanaa.»

³⁸Maaga, a laya a maak ee: «Yeesu, o Ndaan Dawid! Ngela yirmaam!»

³⁹We njoonoogna paam um a nqasanoogaan, too a layan ee: «Ba o falalooxat, tiimi!» Kaa koy, a moƴa o falaloox ee: «O Ndaan Dawid! Ngela yirmaam!»

⁴⁰Yeesu a dalfooxa o geenoox, too a laya waa mat’uuna yee: «Ƥisiidaamoo o ten!» Yaa ta garna, Yeesu a laamtaan ee:

⁴¹«Xar bugo um fi’anong?» A doonaan ee: «O Yaal oxe, kaam bug o ga’atin.»

⁴²Yeesu a layaan ee: «Ɗeeti, yaam o ngim of a muclaang.»

⁴³Na waxtu faaga sax sax, a waagata a ka, too a reefana a Yeesu, a simataa a Roog. Fop waa nga’ina kaaga a ƥoxota a Roog o ndam.