Read NQAARIIT NE ROOG Lik 2 Bible Online

Lik 2 - NQAARIIT NE ROOG bible

Lik 2

¹Na jamaane faaga, Kesaar fee ne’’eena Ogist a hebla yee fat we mbogna no maat um fop a mbindook.

²Kaaga reeƭu a pindax a eetaand alaa na jamaane Kiriñus, gofornoor Siri.

³Wiin we fop a mbindookooga, oxuu refna no mbaafaap um.

⁴Yoseef itam a inoora na teeru faa Nasaret no jegel olaa Galile, ndax ta ret na teeru faa Dawid, ne’eena Betleheem, no jegel olaa Yudee. Ten fa xoox um no kurcala le Dawid a fog’u.

⁵Maaga, a mbindooka, ten fa Mari fee o toog um, reeƭna o bodeer.

⁶Yaa da ndefna Betleheem, Mari a reeƭata na xa yeng um, too gaaj laa a roomaan.

⁷A ñoota a taaw um, ta ref o ƥiy o ngoor. A laxasaan ƭapax, a wondnin no mbalka, yaam nqeƈ’ee maa genar waa a ndaloogna.

⁸No jegel olaaga, a jeg’a gaynaak waa mbe’oogna na xa siir paal axaa, too a yetooxaa.

⁹Malaaka no Yaal oxe a feeñooxa a den, a qoolaand ale no ndam onqe no Yaal oxe a muur a den, too a ndiida ƭomu.

¹⁰Kaa koy, malaaka fee a laya a den ee: «Ba nu ndiid, yaam kaam ɓisiid a nuun Yegil mbaax ne na ɗaayandkaa xeet fee fop.

¹¹Kam o yeng olene, na teeru faa Dawid, nu ndimane o Muumucil. Ten refu Kiristaa, o Yaal oxe.

¹²Nene nu andditkan: Xan nu soƥ o nqeq onqaa laxaseena ƭapax, too a wondnel no mbalka.»

¹³Ndak fo ndak, malaaka mayu a mbeeña suungaan na asamaan paam malaaka faaga. A simatooga a Roog, a layaa yee:

¹⁴«Tedaanga a hela Roog took asamaan fa jam na adna, took no wiin we ta fexna.»

¹⁵Yaa malaaka kaa a inooxna maa den, too a nomtoox na asamaan, gaynaak waa a layrooga yee: «Fat i ndet boo Betleheem, ndax i nga ke xewna maaga, ke o Yaal oxe a yeginna a in.»

¹⁶A ñofa o ndet, too a soƥa maaga a Mari fa Yoseef fo o nqeq onqe wondneena no mbalka ne.

¹⁷Yaa da nga’na keene, a mbetandooxa a Mari fa Yoseef ke lay’eena no kaa farna no ndeɓandoong onqeene.

¹⁸Ke gaynaak we a lay’ina a beta we nanuuna fop,

¹⁹ndaa Mari a geeka kaaga fop no xeeñ um, a xalaatan.

²⁰Cinj kaaga, gaynaak waa a nomtooxa, a simataa a Roog, a ngidman, yaam ke da nan’ina fo ke da nga’’ina a refit’a ne da yegnit’eena o ten.

²¹Yaa bes faa a dakooxiidna, o nqeq onqaa a war’a o xucel. A moolane Yeesu, refna gon le malaaka faa a cooxit’ina yaaga ferooxafulee no fud ya um.

²²Yaa pes kaa no ƥogdinax naa a mbaafna, ne kebil ke Moyiis a simtituuna, Yoseef fa Mari a ƥisa o nqeq onqe Yeerusaleem. A mbi’a keene, ndax da ƥoxotin o Yaal oxe,

²³ne ta bindteena no kebil ke no Yaal oxe yee: «Taaw fa ngoor fuu refna a wara o kesanel o Yaal oxe.»

²⁴Kebil ke no Yaal oxe a simta itam ee da sadaxit a qoɗoxoñ a ƭak mbaat a nuukuur a teɓ a ƭak.

²⁵A jeg’a Yeerusaleem o koor o ne’e Simewon. O kiin oxaaga a jof’a, too a saɗar’a a Roog. A cungooga Isra’el a yaalel. Yiif Tedu le a reeƭa fo ten,

²⁶too a yegin’aan ee xonkee muk, too ga’ee a Kiristaa fee refna o Muumucil oxe o Yaal oxe a regitna.

²⁷Maaga, Yiif Tedu le a ɓakandaan no Mbind Roog naa. Yaa we ndimna a Yeesu o nqeq onqe a ƥisiiduuna, ndax da mbadin ke kebil ke a simitna,

²⁸Simewon a deegooxaan, a gidim a Roog, a lay ee:

²⁹«Ndiiki koy o Yaal oxe, xaƴaam mi fee o paɗ of, um mooc na jam ne regtitanoona,

³⁰yaam a kid es a nga’a a muc ale wo.

³¹A muc aleene jagand’oona mbaambir qeet ke fop,

³²refna a qoolaand ale feeñna kam a saax ake, a ref o ndam Isra’el fee xeet of.»

³³Ke Simewon a lay’ina no nqeq onqe a bet’a we ndimuuna.

³⁴Simewon a barke’a a den, too a laya a Mari fee ya Yeesu yee: «O ƥiy onqene kaa maafiid too a yoɗiid wiin mayu na Isra’el. Xan a ref o anddiloor olaa na ɓisiidkaa njuumoor.

³⁵A qalaat na qeeñ a mayu xan a mbeeñ, too wo fa xoox of sax, xan laƥ a fand o laaw of.»

³⁶A jeg’a o tuleer o tew o nogoyu xaa ne’’eena Xaan, a ref o ƥiy Fanwel, a fog no kurcala le Aseer. O toog oxaa andeerna adna a reeƭu boo neen a gilge. Ye ta gilgeena, a moofa fo o kor um boo xa kiid ɓetaa ƭaq,

³⁷ndaa cinj kaaga o ñaaw a reeƭatu. A jeg’a xa kiid qarɓeen ɓetuu tadik fo xa kiid xa nahaq. Inooxoogee no Mbind Roog naa, too a dagooxooga a Roog ñaal fo o yeng, a xeɗaa, a hooraa.

³⁸Yaa ta fadiidna ten itam na waxtu faaga, a simatooga a Roog, too a layaa kaa farna na Yeesu paam wiin we cungoogna a bat ale Yeerusaleem.

³⁹Yaa Mari fa Yoseef a ndeefna ke kebil ke no Yaal oxe a simitna fop, a nomtooxa Galile na teeru den refna Nasaret.

⁴⁰Maaga, o ndeɓandoong onqe a maak’a, too a saƭakinooxooga. A may’a fo o and, too yirmande fee Roog a reeƭa fo ten.

⁴¹O hiid oluu fad’ina, we ndimna a Yeesu kaa ndetoogu Yeerusaleem na Xew fee na colandax ale.

⁴²Yaa Yeesu a jegna xa kiid xarɓaxay fo xa kiid xa ƭaq, a ndeta ne da mer’ina o mbi’aa, too Yeesu a yoona fa den.

⁴³Yaa pes kaaga a mbaafna boo da nomtooxaa, Yeesu o ndeɓandoong onqe, a yoqa Yeerusaleem, too faap um fa ya um nqalatoox’iran.

⁴⁴Kaa saf’u a den ee fo we da yoonit’ina a reeƭu, too a yonga na ñaaƈ, cinj kaaga a ndefa no mbaaƭan ndeer no fog den fo we da andna.

⁴⁵Kaa koy, ye da nga’eeruuna, a nomtooxa Yeerusaleem, a mbaaƭkin.

⁴⁶Yaa da njegna ñaal tadik, a ngara a soƥin ta moof kam Mbind Roog ne a ndeer no jaajangin we no kebil ke, a nan-gilooxaa, too a laamtaa a den.

⁴⁷We nan-gilooxooguuna fop kaa njaaxiɗ’u yaam ne ta ƴiƴ’ina fo ne ta doontoogna.

⁴⁸Yaa faap umiin a nga’uuna, kaaga a bet’a a den. Maaga, ya um a layaan ee: «O ƥees, xar taxu o fi a in kene? Mi fa faap of kaa i mbaaƭong boo nof in a mboɗaxat.»

⁴⁹Yeesu a laya a den ee: «Xar taxu nu mbaaƭaxam? Ndax kaa nu andee yee waraam o ref no mbind Faap es?»

⁵⁰Kaa koy, and’ee ke ta layoogna a den.

⁵¹Maaga, Yeesu a yoona fa den boo Nasaret, too a nanan’a a den. Ya um a geek’a kaaga fop no xeeñ um.

⁵²Yeesu a maak’ata fo o and, a dey o koor, too a may yirmande paam Roog fo paam no wiin we.