Read NQAARIIT NE ROOG Lik 20 Bible Online

Lik 20 - NQAARIIT NE ROOG bible

Lik 20

¹Na bes fa leng, a jopir Yeesu a jangnaa wiin waa kam Mbind Roog naa, soo a waare’aa Yegil mbaax ne, saasadax maak waa fo jaajangin maak waa no kebil kaa Moyiis fo maak waa a ngara maa Yeesu,

²a laamtin ee: «Layangi a in: Sañ-sañ fum o fi’taa kene? An ci’ong sañ-sañ fene?»

³Yeesu a doona a den ee: «Xam laamit a nuun tig itam:

⁴Batiise fee Saŋ o mat, na asamaan a inooru, ndi no wiin we?»

⁵Maaga a ñimatirooga yee: «Boo i ndoonuuna yee: ‹Na asamaan›, yaaga xan a lay ee: ‹Xar taxu boog nu ngimee no ten?›

⁶Too i ndoonangaan ee: ‹No wiin we a inooru›, xan wiin we fop a mbarit a in a kac, yaam a woora a den ee Saŋ o tuleer a reeƭu.»

⁷Maaga, a ndoona yee andee me ta inoorna.

⁸Yeesu a laya a den ee: «Mi yoo, laykiim a nuun sañ-sañ fee um fi’taa kene.»

⁹Yeesu a refa no naxooxaa xeet faa yee: «O yaal mbind a jimba a ƭing taxar biiñ, a doxnin xooxoox ndax da nqaajran fo ten, yaam kaa bug’u o ñaaƴik no saax jan, too a nar’u o miñ.

¹⁰Yaa a saxad alaa a fadna, a lula o tag um maa no xooxoox waa, ndax ta ɓisiidin a las um no ke saxadeena. Kaa koy, xooxoox waa a ndama o tag oxaaga a nqawin, soo a ndaxin ƥay ƥor.

¹¹A lulahina o tag o lakas, soo da nqawin itam, a mbi’in cednooxu, soo a ndaxin ƥay ƥor.

¹²A dakooxa o lul o tadkandeer, da ngaañin, a sutin tafil.

¹³O yaal a ƭing alaa a laya yee: ‹Xar um fi’kaa? Kaam lulkaa o ƥees onqe fexuuma, yaam ñakkiran o niw muk.›

¹⁴Kaa koy, yaa xooxoox waa a nga’uuna, a laya yee: ‹O lam oxe xe garaa. Fat i mbarin, ndax i njang ke ta war’ina o lam fop.›

¹⁵A ndamaan, a ƭooqin boo ta sutoox a ƭing alaa, soo a mbarin. Ii ndiiki koy, nam o yaal a ƭing ale a fi’kaa xooxoox waaga?

¹⁶Xan a gar, a saŋik xooxoox waaga, soo a doxin a ƭing ale wiin lakas.» Yaa wiin waa a nanna a naxax aleene, a laya yee: «Muk!»

¹⁷Maaga, Yeesu a faambra fa den, a lay a den ee: «Xar a Pind akene a tektu koy: ‹Ɓil le maamax we a ndeɓ’ina refatu ɓil faraaj le.›

¹⁸Ten taxu oxuu yenna took ɓil leene xan a ɓoloox, too took no xuu ta yenna xan a feñexoox.»

¹⁹Jaajangin waa no kebil ke Moyiis fo saasadax maak waa a and’a a paax ee den taxu Yeesu a laytaa a naxax alaaga. Ten taxu kaa mbaaƭoogu maa da ndoonitna a Yeesu o ɓay na waxtu faaga sax sax ta layoogna, ndaa kaa saɗar’u xeet faa.

²⁰Kaa ngayoogu a Yeesu. A lula wiin waa mbi’ooxoogna nen jofu, ndax da mbogin. A cungooga ta juum no ɗelem, ndax da mbaagin o ƥoxot haahate waa fo gofornoor faa.

²¹Wiin waaga a laamtaan ee: «O Caajangin oxe, i anda yee kaa o layaa too jangnaa no cofel. Jegiro samtirand leng, yaam kaa o jangnaa a ƭat Roog no ndigil.

²²Ndax i mbara o ndabid a Kesaar fee a bateer ndi nam?»

²³Yeesu a anda o ƴiƴ olaa den, too a doona a den ee:

²⁴«Lalaamoo o xanjar o leng. Nitaal nene fo a pind akene, an jegu a den?» A ndoonaan ee: «Kesaar fee!»

²⁵Maaga, a laya a den ee: «Ƥoxotyo boog a Kesaar fee ke Kesaar fee a jegna, soo ƥoxot a Roog ke Roog a jegna.»

²⁶Njeg’ee dara kaa da maaftuuna no ke ta layna mbaambir faan laa. Ke Yeesu a doon’ina a den a bet’a a den, too a naanga yereŋ, a tiim.

²⁷Leng-leng no Sadusiya waa na layaa yee a qontax jegee, a matiida a Yeesu, soo a laamtin ee:

²⁸«O Caajangin oxe de, Moyiis kaa bindan a in ee: O koor oxuu dolinna o tew, soo a guut a xon too xaƴee fo ten xa ƥiy, o ndeɓ um a wara o lam o ñaaw oxe, a sakan o maag um ƥasil.

²⁹Yaaga fop koy, a jeg’a o maag fo xa teɓ ɓetaa fo leng um. O maag oxe a dolin’a, a xon, too xaƴee fo o teem xa ƥiy,

³⁰o ƭikandeer oxe fo o tadkandeer oxe a lama o tew o ñaaw oxe, a nqon, too nqaƴee fo ten xa ƥiy. Naaga a xewit’u itam, boo ɓetuu ɗik waa fop a nqon, too nqaƴee fo ten xa ƥiy.

³¹

³²A cinj den fop koy, o tew oxaa a xona itam.

³³I laamtang koy ee: Na bes faa na qontax alaa, an no goor weene na jegkaa o tew oxe, yaam ɓetuu ɗik we fop a ndolin’aan?»

³⁴Maaga, Yeesu a doona a den ee: «Wiin we na jamaane fene kaa ngilgaa rew we, soo rew we a ndolooxaa,

³⁵ndaa we njombeerna o njeg a las na jamaane fee na garaa fo na qontax alaa no xon waa ngiligkatee, too rew we ndolooxkatee.

³⁶Mbaagkatee o nqon sax, yaam xan a nandat fo malaaka ke, soo a ndefat xa teɓandoong Roog, yaam ne da ndeefna na qontax ale.

³⁷Kaa farna na qontax ale no xon we koy, Moyiis a andnoor’aan no ngol naa kaƥoogna, ye ta xoyaa o Yaal oxe ‹Roog fee Abraham, Roog fee Isaak fa Roog fee Yakoob.›

³⁸Kaa koy, Roog refee Roog fee no xon we, ndaa Roog fee no ñoow we, yaam no ten fop kaa ñoowaa.»

³⁹Leng-leng no jaajangin waa no kebil ke Moyiis a ndoonaan ee: «O Caajangin oxe, paax soom layo.»

⁴⁰No kaa xotitna na waxtu faaga o leng saɗ’atiran o laamit tig.

⁴¹Yeesu a laya a den ee: «Nam a mbaagu o layit ee Kiristaa fee o Muumucil oxe regteena, o ndaan Dawid oo?

⁴²Dawid fa xoox um sax layun no safe le na Kim a tedu ke, ye ta layna yee: ‹O Yaal oxe a laya o Yaal oxe mi yee: Moofi na ñamaak es,

⁴³boo yaa fi’uuma fañ we wo me o dakaa.›

⁴⁴Dawid fa xoox um sax kaa xoyan o Yaal oxe. Nam a waagu o refit o ndaan um koy?»

⁴⁵Yaa fop a maadna o nan-gilooxaa, Yeesu a laya daalbe waa ten ee:

⁴⁶«Mbootooxyo boog jaajangin we no kebil ke, mbexna o ndokooxaa ndoki maak, too a mbex o simnel no qel ke. Kaa mbaaƭaa maa da mboditna mbaambir kam pind a qeƭ ke fo moofir ke moƴna o niwnoox no qew ke.

⁴⁷Kaa njaɓaa ke ñaaw we a njegna fop, a yoonandtin a qeƭ a ciig, ndax da ƭeetel nen jofu. Weene wiin na moƴkaa o ƭomiɗ hate.»