Read NQAARIIT NE ROOG Lik 23 Bible Online

Lik 23 - NQAARIIT NE ROOG bible

Lik 23

¹Den fop a mbufooxa, a ƥis a Yeesu, ndax da ƥoxotin a Pilaat.

²Maaga, den fop a ndefa no njamban ee: «Kaa i soƥ o koor oxene a hoƥatrandaa xeet in, a yaqanaa wiin we da ndabid a Kesaar fee a bateer, kaa layooxaa yee ten refu Kiristaa fee, o maad oxe.»

³Pilaat a laamtaan ee: «Wo refu o maad oxe no Yaawuur we?» Yeesu a doonaan ee: «Wo ne’un!»

⁴Pilaat a laya saasadax maak waa fo faan laa yee: «Ga’iim sik fa leng no kiin oxene.»

⁵Kaa koy, a mbeera na: «Kaa hoƥatrandaa xeet fee, a jangnitaa kaa xotitna Galile boo Yudee fop, a gar meeke sax.»

⁶Yaa Pilaat a nanna wiin we a laytaa kaa farna na Galile, a laamta ndax o qoye o Kaagalile a reeƭu.

⁷Yaa ta nanna yee Yeesu no jegel Herood a fogu, a lultaan a Herood, reeƭna Yeerusaleem na pe akaaga.

⁸Yaa Herood a ga’uuna, a sawar’a lool, yaam kaa nanoogu wiin we a laytaa a Yeesu. A bug’aan o ga yaaga, too a cungooga ta fi o anddiloor.

⁹A laamtaan laamit mayu, ndaa Yeesu dooniran o ɗelem o leng sax.

¹⁰Saasadax maak waa fo jaajangin maak waa no kebil kaa Moyiis a ndeeƭa maaga, too kaa moƴ’un o njambaa rek.

¹¹Herood fo xiixire we ten kaa njeeroogu a Yeesu, a nqaadnooxan, a ndokanin ndoki mosu, soo a nomtin maa Pilaat.

¹²Na bes faaga sax sax Herood fa Pilaat a tipru qaariit, yaam kaa mbañroogu yaaga.

¹³Yaa Pilaat a fokatna saasadax maak waa fo aa-adax waa fo waa na xeet faa fop, a laya a den ee:

¹⁴«Nu ƥisiidaxam o kiin oxene nu layna yee kaa hoƥatrandaa xeet nuun. Ƭeetyo! Laamtaanum mbaambir nuun, too ga’iim no ten sik fa leng no ke nu njamban.

¹⁵Herood itam ga’ee no ten sik, yaam a nomtiidaan a in. O kiin oxene jegee sik fa leng faa waagna o tax ta warel.

¹⁶Xam xawnoorin xa loq boog, soo woktanin a nuun.» [

¹⁷Yaam mbanuu bes fee na Colandax ale a fadna gofornoor fee kaa sutanaa a den o leng no we mbegeena kaso.]

¹⁸A mbuuqa den fop ee: «Fat oxeeke a warel, too o woktan a in a Barabaas.»

¹⁹O koor oxaaga kaa dam’el, a ɓekel kaso yaam mbiraam ne ta fi’’ina kam teeru faa, a doon teen a war o kiin.

²⁰Pilaat a dakooxa o lay fa den, yaam kaa bug’u o wokit a Yeesu,

²¹ndaa a moƴa o mbuuq ee: «Fat a rengel, fat a rengel na kurwaa!»

²²Pilaat a laamtahina a den jaf dadkandeer ee: «Paaxeer kum a fi’u? Ga’iim sik fa leng no ten faa waagna o tax ta warel. Xam xawnoorin xa loq boog, soo woktin.»

²³Kaa koy, a moƴa o mbuuq a maak, too a mbeer na: «Fat a rengel na kurwaa!» Maaga xa buuq axaa den a ƥislooxa a Pilaat,

²⁴boo ta lay ee: «Fat a mbi’antel o ten ne da mbugtuuna.»

²⁵A wokta oxe ɓek’eena kaso, too a jeg gon yaam ne ta waroogna, a fi’aa mbiraam. Cinj kaaga, a ɓoxota a den a Yeesu, ne da mbugtuuna.

²⁶Yaa da ƥisaa a Yeesu, a nqeta fo o koor oxaa gen’ina Kireen, too a ne’el Simoŋ, a jopir ta inoortiid na koƥ alaa. A ngadnaan a kurwaa le Yeesu, a serin ta reefaa took um.

²⁷Wiin mayu a ndeefan’aan fo itam rew waa looloogna soo a ƭomatooxaa yaam o ten.

²⁸Yeesu a geleerooxa, a faambir fa den, too a lay ee: «Nuun rew we Yeerusaleem, ba nu loolat yaam mi. Loolanyo a qoox nuun fo xa ƥiy nuun.

²⁹Xan a jeg a pe akaa wiin we a laykaa yee: ‹Rew rimar we fo we moseerna o ngaajoox fo we moseerna o numin a ƭaaya.›

³⁰A koom, xan wiin we a layataa xa coong axe yee: ‹Ngirdooxyo took in!› Xan a layaa a ñaang ake itam ee: ‹Muuryo a in!›

³¹Yaam kene a fi’ange ndaxar ñoow, xar beeru ne a cungtateel?»

³²Na waxtu faaga, saasaay ƭik kaa mbar’eena o ndengandoor fa Yeesu a ƥisiide maaga itam.

³³Yaa da mbadiidna no mbiñ onqaa ne’eena «Nqolof ne», a ndengaan na kurwaa, ten fo saasaay ƭik, oxene na ñamaak, o lakas oxe na janoon.

³⁴Yeesu a laya yee: «Faap, waasani a den, yaam andee ke da mbi’aa.» A mbanjanga tikoorik kaa ten, soo a nqaajir a den.

³⁵Xeet faa maaga a ndeeƭu a ƭeetaa. Aa-adax we a nqaadnooxooga a Yeesu, too a layaa yee: «A mucla wiin lakas we. Fat a mucil a xoox um, a soƥangaa yee o ten refu Kiristaa fee o Muumucil oxe regteena, Roog a jilna!»

³⁶Xiixire we itam a nqaadnooxoogaan. A matiidaan, a luuxnin bineegar.

³⁷Kaa layoogu yee: «O refangaa o maad oxe no Yaawuur we, mucli a xoox of!»

³⁸Keeke bind’e took a kurwaa le, a yoorooxin: «Oxene refu o maad oxe no Yaawuur we.»

³⁹O leng no saasaay kaa ndeng’eena a wenooga a Yeesu, too a layaa yee: «Ndax refiro Kiristaa fee? Mucli a xoox of, mucil a in!»

⁴⁰Kaa koy, o lakas oxe a xasanaan, too a layin ee: «Ndax kaa saɗariro a Roog, wo fee a qaw a leng kut ale a dalna took of.

⁴¹Na in kaa war, yaam ndabid in i ndaawu. Ten o mat fi’ee paaxeer leng.»

⁴²Maaga, a laya a Yeesu yee: «Yeesu, ngela wetandooxaam yaa o rokkaa no maat of!»

⁴³Yeesu a doonaan ee: «No ndigil, mexe layang ee: Xaye fee xaye sax o rok fa mi kam arjana.»

⁴⁴No kaa xotitna na waxtu njeeƈ ndeer xoox boo na waxtu a kirandax, a jeg’a o niɓaan took lanq ke fop.

⁴⁵Njeeƈ ne a dalfooxa o nuk, too mbaƴ naa fegit’eena o Mbiñ o tedu nqaa no Mbind Roog naa, a naagta faceet took boo a sipoox a lanq.

⁴⁶Yeesu a dakooxa wuuq a maak, soo a lay ee: «Faap, mexe ɓoxotaa o laaw es na xa ƥay of.» Yaa ta layna kaaga, a saaya.

⁴⁷Yaa o aa-adax oxaa no xiixire waa a ga’na kaa xew’ina fop, a simata a Roog, soo a lay ee: «O kiin oxene a jof’a de!»

⁴⁸Waa mbuudiid’ina fop a nga’a kaa xew’ina, too ye da nqaadaa, a mbadooxooga no kang.

⁴⁹We and’ina a Yeesu fop fo rew we yoontiid’ina fo ten Galile a mbod’a o ndeendeer onqe, a ƭeetaa ke xewoogna.

⁵⁰A jeg’a oxaa fog’ina no Mal maak ne, a ne’el Yoseef, a gen na teeru faa Arimate kam Yudee. O koor o paax a reeƭu, too a jof. A cungooga Maat ne Roog. Jaɓ’ee ke wiin lakas we no Mal maak ne a mbexey’ina fo ke da mbi’’ina.

⁵¹

⁵²O koor oxaaga a reta maa Pilaat, too a xeɗin o dal ole Yeesu.

⁵³A fudnaan na kurwaa le, a laxasin fo njoor, soo a ɓekin kam a mboy alaa sexeena no ɓil, maa o leng a ɓek’afulaandeena.

⁵⁴Keene na bes fee da njagandooxanoogna Xew fee na colandax ale a reeƭu, soo bes fee na ñootnax ale a rokeel.

⁵⁵Rew we inoortiid’ina Galile fa Yeesu, a yooniid a Yoseef, a nga’a a mboy ale fo ne o dal ole Yeesu wondnit’eena.

⁵⁶Maaga, a nomtooxa a mbaaƭik ƭuumooxel fo miir, ndax da nqendandtin o dal ole. No feet olaa, na bes fee na ñootnax ale, a ñootnooxa ne kebil ke a simtituuna.