Read NQAARIIT NE ROOG Lik 3 Bible Online

Lik 3 - NQAARIIT NE ROOG bible

Lik 3

¹No hiid xarɓaxay fo ɓetkandeer olaa no maat ne Kesaar fee ne’eena Tibeer, a jopir Poons Pilaat a refaa gofornoor Yudee, Herood a ref o maad Galile, Filip fee o ndeɓ um a ref o maad no saax laa Iture fa Tarakooni, Lisaañas o maad Abileen,

²Xaan-Koor fa Kayif a ndef saasadax maak, na jamaane faaga, Roog a laya fa Saŋ fee o ƥiy Sakari na koƥ-a-ƥor alaa.

³Saŋ kaa retoogu no caate kaa mbidna o xuluɓ ole Yordaan fop, a waare’aa. Kaa layoogu yee: «Mbesyo pakaad nuun a cinj, mbatiise’el, too xan Roog a waasan a nuun.»

⁴Neene ke bind’eena no safe le no tuleer oxe ne’eena Esayi a fadnoortu, ye ta layna yee: «Keeke refu o ñuxur ole na falalooxaa kam a koƥ-a-ƥor alaa yee: ‹Sexanyo o Yaal oxe a qal, njofandanin a ƭat.

⁵Fat a quuxur aluu refna a uupel, o joong oluu refna fo ñaang luu refna a girdel, a ƭat ake nquƴooxna a njofandel, a ƭat a kasooxu ke a mbodrandel,

⁶too o kiin oo kiin xan a ga a muc ale Roog.› »

⁷Wiin mayu a ngara maa Saŋ, ndax da mbatiise’el. Kaa koy, Saŋ a laya a den ee: «Nuun soo ndef fo nqisiil! An lalgandu a nuun nu ƈuf fuux le Roog na garaa?

⁸Saqyo boog a pi akaa lalitna yee nu mbesa pakaad nuun a cinj. Ba nu layat na yiif nuun ee: ‹Abraham refu o taan in.› Mexe layaa a nuun ee Roog a waaga o fi a kac akeeke xa taan Abraham.

⁹Ndiiki, ɓaax le a sipe na puƭ ake no taxar ke. Ndaxar nuu rimkeerna xa tim xa paax xan a godel, a deɓel kam fiɗel laa.»

¹⁰Yaa wiin waa a nanna kaaga, a laamtoogaan ee: «Ndi xar i mbaru o mbi boog?»

¹¹Saŋ a doona a den ee: «Oxuu jegna toki ƭik, fat a coox teen leng oxe jegeerna, oxe jegna kaa ta ñoowitna, a xaajir fo xe jegeerna.»

¹²Leng-leng no waa ndabdinooxoogna juuti a ngara maa Saŋ, ndax da mbatiise’el, too a laamtaan ee: «O Caajangin oxe, xar i mbaru o mbi?»

¹³A doona a den ee: «Ba nu ndabdinoox kaa hupna ke nu simeena.»

¹⁴Yaa xiixire waa a nanna kaaga, a laamtaan ee: «In o mat, xar i mbaru o mbi?» A doona a den ee: «Ba nu lalit o hup doole, too ba nu nax o kiin, ndaa ndayyo nday no ndabid nuun rek.»

¹⁵Wiin waa fop kaa cungoogu a kar ale no xe regteena, too yaa da nanna ke Saŋ o Paabatiise xe a fi’oogna, kaa layroogu yee: «Ndax Saŋ refee Kiristaa fee, o Muumucil oxe regteena?»

¹⁶Kaa koy, Saŋ a laya a den den fop ee: «Mi, mexe batiise’taa a nuun foofi, ndaa oxe na garaa moƴaxam o jeg doole, too fekit xa ñaaƭ um sax a jombaxam. Ten o mat, xan a batiise’it a nuun Yiif Tedu le fa fiɗel.

¹⁷A saqa o lang no ɓay um, too xan a fees bele fee ten soo a geek pep ke. Xan a dox ñaax le kam fiɗel laa ñufkeerna boo muk.»

¹⁸Neene o mat Saŋ a yegnit’u xeet fee Yegil mbaax ne fo a maƭax a lakas a mayu.

¹⁹Kaa koy, Saŋ o Paabatiise xe kaa ŋañ’u a Herood fee maadooxoogna Galile yaam o sagin Herojas fee o tew no ndeɓ Herood, a ŋañin itam yaam paaxeer lakas ke ta fi’’ina fop.

²⁰Maaga, Herood a ɓeka a Saŋ kaso, a ɓaat paaxeer ke ta fi’oogna.

²¹Ye xeet faa fop a mbatiise’eena, Saŋ a batiise’a a Yeesu itam. Yaa ta xeɗaa a Roog, asamaan fee a wetooxa,

²²too Yiif Tedu le a fudooxiida took um, a saxit nen cer a nuukuur. O ñuxur a nannoorta na asamaan ee: «Wo refu o Ƥees onqe fexuuma fex, na wo felakinoortum.»

²³Yeesu a jeg’a ngap xa kiid qarɓeen tadik, soo a sogkaa o waare’aa. Kaa nand’u wiin we yee Yeesu refu o ƥiy Yoseef, Yoseef a ref o ƥiy Eeli, Eeli a ref o ƥiy Matat,

²⁴Matat a ref o ƥiy Lewi, Lewi a ref o ƥiy Melki, Melki a ref o ƥiy Yaanay, Yaanay a ref o ƥiy Yoseef,

²⁵Yoseef a ref o ƥiy Mataca, Mataca a ref o ƥiy Amos, Amos a ref o ƥiy Nahum, Nahum a ref o ƥiy Hesli, Hesli a ref o ƥiy Nangay,

²⁶Nangay a ref o ƥiy Maat, Maat a ref o ƥiy Mataca, Mataca a ref o ƥiy Semey, Semey a ref o ƥiy Yoseek, Yoseek a ref o ƥiy Yooda,

²⁷Yooda a ref o ƥiy Yowanan, Yowanan a ref o ƥiy Reesa, Reesa a ref o ƥiy Serubabel, Serubabel a ref o ƥiy Se’alti’el, Se’alti’el a ref o ƥiy Neri,

²⁸Neri a ref o ƥiy Melki, Melki a ref o ƥiy Aadi, Aadi a ref o ƥiy Kosam, Kosam a ref o ƥiy Elmaadam, Elmaadam a ref o ƥiy Eer,

²⁹Eer a ref o ƥiy Yosuwe, Yosuwe a ref o ƥiy Eliyeseer, Eliyeseer a ref o ƥiy Yoorim, Yoorim a ref o ƥiy Matat, Matat a ref o ƥiy Lewi,

³⁰Lewi a ref o ƥiy Simewon, Simewon a ref o ƥiy Yudaa, Yudaa a ref o ƥiy Yoseef, Yoseef a ref o ƥiy Yoonam, Yoonam a ref o ƥiy Eliyakim,

³¹Eliyakim a ref o ƥiy Meleya, Meleya a ref o ƥiy Mena, Mena a ref o ƥiy Matata, Matata a ref o ƥiy Natan, Natan a ref o ƥiy Dawid,

³²Dawid a ref o ƥiy Isay, Isay a ref o ƥiy Obed, Obed a ref o ƥiy Bowaas, Bowaas a ref o ƥiy Saala, Saala a ref o ƥiy Naason,

³³Naason a ref o ƥiy Aminadab, Aminadab a ref o ƥiy Admin, Admin a ref o ƥiy Arni, Arni a ref o ƥiy Hesron, Hesron a ref o ƥiy Peres, Peres a ref o ƥiy Yudaa,

³⁴Yudaa a ref o ƥiy Yakoob, Yakoob a ref o ƥiy Isaak, Isaak a ref o ƥiy Abraham, Abraham a ref o ƥiy Teerax, Teerax a ref o ƥiy Nakoor,

³⁵Nakoor a ref o ƥiy Serug, Serug a ref o ƥiy Rexu, Rexu a ref o ƥiy Peleg, Peleg a ref o ƥiy Ebeer, Ebeer a ref o ƥiy Selas,

³⁶Selas a ref o ƥiy Kaynam, Kaynam a ref o ƥiy Arpaksad, Arpaksad a ref o ƥiy Seem, Seem a ref o ƥiy Nowe, Nowe a ref o ƥiy Lemek,

³⁷Lemek a ref o ƥiy Metuseela, Metuseela a ref o ƥiy Henok, Henok a ref o ƥiy Yered, Yered a ref o ƥiy Maxalaleel, Maxalaleel a ref o ƥiy Kenaan,

³⁸Kenaan a ref o ƥiy Enos, Enos a ref o ƥiy Set, Set a ref o ƥiy Aadama, Aadama ref o ƥiy Roog.