Read NQAARIIT NE ROOG Lik 7 Bible Online

Lik 7 - NQAARIIT NE ROOG bible

Lik 7

¹Yaa Yeesu a ƴutna waare faaga mbaambir no wiin mayu waa nan-gilooxooguuna, a reta Kapernawum.

²A jeg’a maaga o aa-adax no xiixire teemeed oxaa fex’ina o tag um bo ta hup, too o tag oxeene a jira boo a mat o xon.

³Yaa o aa-adax oxe a nanna wiin we a laytaa a Yeesu, a lula maak leng-leng no Yaawuur waa, ndax da nqoyin ta gar a wodand o tag oxe ten.

⁴Yaa we luleena a ngarna maa Yeesu, a nqeɗaan, too a lay ee: «O koor o paax oo, fat a fi’antel o ten ne ta bugtuuna,

⁵yaam a fexa xeet in, too o ten maxu mbind a qeƭ naa in.»

⁶Maaga, Yeesu a yoona fa den. Yaa da matiidna mbind naa, o aa-adax no xiixire teemeed oxaa a lula qaariit um, da nqetook a Yeesu, too a layaan ee: «O Yaal oxe, deyee o garaa, jombaa o rok no mbind es.

⁷Ten taxu itam bugiim o gar farna fa wo, mi fa xoox es. Layi o ɗelem o leng rek, too xan o tag es a wod.

⁸Mi o mat, kaam fi’aa ke we kelfa’axama a simaxam. Jegaam itam xiixire waa um lulaa. Kaam layaa o leng ee: ‹Reti!› ta ret, soo um lay o lakas ee: ‹Gari!› ta gar. Kaam layaa surga es itam ee: ‹Fi’i kene!› ta fi’in.»

⁹A ƭelem akaaga Yeesu a nan’ina a mbet’aan lool. Maaga, a geleerooxa a faambir fo faan laa ndeefooguuna, too a lay a den ee: «Mexe layaa a nuun ee: Isra’el boo Isra’el a xet, mosiim o ga o kiin o cegtu nene o ngim.»

¹⁰Maaga, wiin waa o aa-adax no xiixire teemeed oxaa a lul’ina, a nomtooxiida no mbind naa, too a soƥa o tag oxe jir’ina a wod ceŋ.

¹¹Na pe akaaga, Yeesu a reta na saate faa ne’eena Nayin, too daalbe we ten fo wiin mayu a ndeefanaan.

¹²Yaa Yeesu a faambnooxiidna saate faa, a ga’a waa saqna o dal, a ƥisan no poy kaa. O ƥiy o leng no tew oxaa ñaawooxoogna a reeƭu, too wiin mayu waa ngenna na saate faa a ndeeƭa fo ten maaga.

¹³Yeesu a ga’a o tew oxe, ta yuɗin, too a layaan ee: «Ba o lool!»

¹⁴A matiida o dal ole, a duqin, too we saq’uuna a ndalfooxa o ngeenoox. Maaga, Yeesu a laya yee: «O fes ole, mexe layang o ten, inooxi!»

¹⁵Ndak fo ndak, o qon oxe a inooxa a moof, soo a dalfoox o layaa. Yeesu a ɓoxotaan a ya um.

¹⁶Wiin waa fop kaa ndiid’u no kaaga xew’ina, a simataa a Roog. Wene kaa layoogu yee: «O tuleer o maak a feeña a ndeer in», lakas we a ndamtin na «Roog a fudooxiida, ndax ta wat xeet um.»

¹⁷Ke wiin we a layoogna na Yeesu a nannooxa kam Yudee fo no caate kaa mbidna maaga fop.

¹⁸Daalbe we Saŋ a yegnaan ke Yeesu a fi’na fop. Maaga, a xoya ɗik na den,

¹⁹too a lul a den maa no Yaal oxe, ndax da laamtin ee: «Wo refu oxe warna o gar, ndi kaa i mbar o cung o lakas?»

²⁰Ye ngoor kaa a mbadiidna maa Yeesu, a layaan ee: «Saŋ o Paabatiise xe luliidu a in me wo, ndax i laamtong ee: ‹Wo refu oxe warna o gar, ndi kaa i mbar o cung o lakas›?»

²¹Na waxtu faaga sax, Yeesu a reeƭa no wodandaa wiin mayu waa njir’ina fo waa xa ƭomel a ndamna fo waa cini a ndamna, soo a ga’nooraa fuul mayu.

²²Yeesu a doona a den ee: «Ndetyo mbetandoox a Saŋ ke nu nga’na fo ke nu nanna. Fuul we owe nga’aa, ɓoof we a ñaaƴaa, we njegna a tik-a-maak ale a nqoolandeel, ram we a nanaa, xon we a nqontooxaa, soo Yegil mbaax ne a yegneel rool we.

²³Oxuu tolofkeerna yaam mi a ɗaaya.»

²⁴Yaa waa Saŋ a lul’ina a nqaadataa, Yeesu a refa no layaa wiin mayu waa no kaa farna na Saŋ ee: «Xar nu ƭeetik’u na koƥ-a-ƥor alaa? Ndax o siind olaa nqeñ ne a yo’naa nu ƭeetik’u?

²⁵Ndi xar nu ƭeetik’u? Ndax o kiin oxaa rokooxna tikoorik mosu nu ƭeetik’u? Kaa koy de, nuun moƴu o and ee we na ndokooxaa tikoorik mosu, too a ñoowaa na baneex, owe no pind no maad ke.

²⁶Layangaamoo ke nu ƭeetik’ina boog! Ndax o tuleer Roog nu ƭeetik’u? Ii, ndaa mexe layaa a nuun ee oxaa hupna o tuleer Roog sax oo.

²⁷Ten refu oxe ne’oogeena ye ta bindeena yee: ‹Mexe heblaa o tuleer es ta adooxong, a jagandanong a ƭat.›

²⁸Mexe layaa a nuun ee: No we rew a ndimna fop, jegee o leng oxaa hupna a Saŋ, too yaaga fop koy, oxe moƴna o neew no Maat ne Roog hupun.»

²⁹Xeet faa fop fo waa ndabdinooxoogna juuti kaa nan-gilooxoogun, too a njaɓ’ata yee Roog a jofa. Wiin weene koy, Saŋ batiise’’u a den yaaga,

³⁰ndaa Farisiya we fo jaajangin we no kebil ke mat mbatiise’’aand me Saŋ, yaam kaa mbes’u a cinj ke Roog a yuuɓan’ina a den.

³¹Yeesu a dakooxa o lay a den ee: «Yaaga boog, xar um nandanditkaa wiin we na jamaane fee ndiiki? Aniin a nandtu?

³²Kaa nand fo xa teɓandoong axaa ndefna na baayo, too a lay xa kend den ee: ‹I mbakana a nuun, too nu mbecee, i ngiman a nuun a kim a mboy soo nu mbañ o lool.›

³³Saŋ o Paabatiise xe a gara, ñaamee mbuuru, yeree biiñ, soo nu lay ee: ‹Jini damun›,

³⁴o Ƥeenqe no kiin oxe a gar, a ñaamaa a yeraa, soo nu lay ee: ‹O ñaañaam fo o yeeyer oo, a ref xaariit no we na ndabdinooxaa juuti fo no baabakaad we.›

³⁵Kaa koy, Roog a fi’a jam, yaam o jeg-yiif ole a jofandte xa tim um fop.»

³⁶Simoŋ o Farisiya xe a xoya a Yeesu a put no mbind um. Yeesu a roka no mbind um, too a reera fo ten.

³⁷A jeg’a koy na saate faaga o tew o paabakaad. Yaa nof um a naagna xot ee Yeesu oxaa no mbind no Farisiya xaa rek, a ɓisa o moon olaa fi’teena ɓil seeru, a yip ƭuumooxel boo a may.

³⁸Ye ta fadiidna, a fodta a Yeesu a cinj na caf um. Kaa looloogu boo a xuƥandataa a caf ake Yeesu fo xa kooniit um. Cinj kaaga, a fortita a den wiil um, a foon a den, soo a ɗuumanin teen ƭuumooxel.

³⁹Yaa o Farisiya xe xoy’ina a Yeesu a ga’na kaaga, a laya taa no yiif um ee: «O kiin oxene a reeƭangaa o tuleer, a andkooga oxe o tew oxeeke na duqan a refna fo ke ta refna no wiin we. A andkooga yee o paabakaad oo.»

⁴⁰Yeesu a laya o Farisiya xaa yee: «Simoŋ, jegaam kaa waroonga o lay.» Simoŋ a doonaan ee. «O Caajangin oxe, layaam o ten!»

⁴¹Yeesu a layaan ee: «Wiin ɗik a saqan’a oxaa rawnitoogna xaaliis. O leng oxe a saqan’aan xa qanjar teemeed ƥetik xaaliis fa nqoolu, o lakas oxe xa qanjar qarɓeen ƥetik.

⁴²Ne da njeg’eerna kaa da ndabditna, a waasana a den, den ɗik fop o lad olaa. An no wiin ɗik weene na moƴkaa o fex oxe rawin’ina a den?»

⁴³Simoŋ a doonaan ee: «Yaakaaraam ee oxe waasaneena o lad ole moƴna magin.» Yeesu a layaan ee: «Layaa ndigil.»

⁴⁴Maaga, Yeesu a geleerooxa, a faambir fo o tew oxe, too a lay a Simoŋ ee: «Ga’aa o tew oxene? Rokaam no mbind of, too xafaniraamo foofi laa ɓogtuuma a caf. Ten o mat a xuƥanda a caf es fo xa kooniit um, soo a fortit a den wiil um.

⁴⁵Mosiraamo o foon. O ten o mat naa rokiidum kaa foonaa a caf es.

⁴⁶Mosiraamo o ɗuuman diwliin no xoox es, ndaa o ten o mat a yipanaxam ƭuumooxel na caf es.

⁴⁷Ten taxu, mexe layang o ten ee: O mbeq o maak onqe ta feeñilna, a lalta yee pakaad mayu ke ten a mbaasane. Kaa koy, oxe waasaneena o ndik, o ndik rek a fexaa.»

⁴⁸Maaga, Yeesu a laya o tew oxe yee: «Pakaad of a mbaasane.»

⁴⁹We ndeer’ina fo ten a layooga taa na yiif den ee: «An oo xene na waasantaa pakaad sax?»

⁵⁰Kaa koy, Yeesu a laya o tew oxe yee: «O ngim of a muclaang. Reti na jam!»