Read NQAARIIT NE ROOG A cangatin ale 1 Bible Online

A cangatin ale 1 - NQAARIIT NE ROOG bible

A cangatin ale 1

¹Keeke ndefu xa ƭelem axe Moyiis a layna Ii-isra’el we fop, a soƥ da maad o ndefaa no batand ne Yordaan kam a koƥ-a-ƥor alaa, na xa saawit axe, a njasnoor fa Suuf ndeer Paaraan fa Tofel fa Laban fa Haseroot fa Di-Sahab.

²Ñaal xarɓaxay fo ñaal leng na ñaaƴeel no kaa xotitna no joong olaa Horeb boo Kades-Barneya, o xotangaa a ƭat ale na xa coong axaa Seyiir.

³No hiid qarɓeen nahkandeer ole, no ñaal eetaand ne no nqool xarɓaxay fo nqool o lengandeer onqe, Moyiis a laya Ii-isra’el we fop ke o Yaal oxe a hebil’uuna ta lay a den.

⁴Keene a xewa a cinj ye ta xawna a Siihon fee o maad no Aa-amori we, gen’ina Hesebon, fa Oog fee o maad oxe Basan maadooxanoogna teeru ke Astarot fa Edari.

⁵No batand naa Yordaan, kam saax laa Mowaab, Moyiis a refa no tektaa kebil kene. Keeke refu ke ta layna:

⁶«O Yaal oxe Roog in a lay’a fa in no joong olaa Horeb ee: ‹Nu miñata lool paam o joong olene.

⁷Ndiiki koy, nqotyo a ƭat, ndet na xa coong axaa no Aa-amori we fo xa piisel axe mbidna a den Kaakanaan we a ngenna, ndefna xa saawit axe Yordaan fo o jegel ole na ñaang ake fo le na yulanq ake fo me farna no ɓemb-roog o ñamaak fo na ƥeeraamb ale no maag ole Mediterane. Fat nu suur sax boo na xa coong axaa Libaŋ fo no xuluɓ o maak olaa Ofrat.

⁸Keene refu saax le ci’uuma a nuun. Ndetyo njang saax le reg’uuma a Abraham fa Isaak fa Yakoob, mi o Yaal oxe, daaɓoox o ci’in a den, da njegkin, den fo xa taan den.› »

⁹«Na jamaane faaga, lay’aam a nuun ee: ‹Waagiim o gadoox a nuun mi doŋ.

¹⁰O Yaal oxe Roog nuun a mayƭanda a nuun boo nu mayit xaye nen xa qoor axe na asamaan.

¹¹Yaasam o Yaal oxe Roog fee no daan nuun a moƴ o mayƭand a nuun boo a caf juni too a barke a nuun ne ta laytuuna a nuun.

¹²Nam boog mi doŋ um waagkaa o gadoor o xafaa qasir ke fo taawir ke a ndeer nuun?

¹³Mbaaƭyo ndeer a carind ake nuun wiin jegu o and, a njeg yiif too a andel a paax, um dalin a den da adooxan a nuun.›

¹⁴Maaga, nu ndoonaxam ee: ‹Yiif laaga yiif faax a refu.›

¹⁵Maaga, xotaam we adooxan’ina a carind ake nuun, da ndef wiin jegu o and too a andel. Dalnaam a den, da adooxan a nuun, wene a adooxan wiin juni, wene wiin teemeed, wene wiin xarɓaxay, da ndef kelfa na carind ake nuun.

¹⁶Na jamaane faaga, heblaam haahate we nuun ee: ‹Fat nu nan-gilooxaa a paax ndeer o kiin fo kend um soo ngate’it oxuu refna o cofel, mbañ o ƭeet ee o pog um a daawru mbaat o gataakoon.

¹⁷Ba nu mbarit o leng koy, yaa nu ngate’aa. Fat nu nan-giloox o mboƭomsogor onqe nen o kiin o maak oxe, too nu saɗarkee o leng, yaam Roog o mat jegu hate. A soƥangaa koy ee kaa nu njeg kaa ɗomeena o hate, fat nu ƥisiidaam o ten boo um horooxin.›

¹⁸Neene mat bindanit’um a nuun na jamaane faaga fop ke nu mbar’ina o mbi.»

¹⁹«Cinj kaaga, i inoor’a no joong olaa Horeb, nqaañ a koƥ-a-ƥor a muum a maak a saɗarnooxu le nu andna, nqot a ƭat ale no joong ole no Aa-amori we, ne o Yaal oxe Roog in a heblit’uuna a in. Ye i mbadiidna Kades-Barneya,

²⁰layaam a nuun ee: ‹I mbadiida no joong ole no Aa-amori we, o Yaal oxe Roog in a ci’na a in.

²¹Nga’angyo! O Yaal oxe Roog nuun xan a ci a nuun saax lene. Ndetyo njangin, ne o Yaal oxe Roog fee no daan nuun a laytuuna a nuun. Ba nu ndiid too ba nu saɗar.›

²²Nuun fop, kaa nu ngar’u me mi, layaam ee: ‹Fat i lul goor, da ngorook saax le soo a lay a in a ƭat ale i mbarna o ndeef fo teeru ke i ndaawkaa.›

²³Yiif laaga a jofoox’axam, soo um xot goor xarɓaxay fo goor ɗik a ndeer nuun, o leng na carind aluu refna.

²⁴Waaga a ndeta, a nqot farna fo xa coong axaa too a mbadiida na yulanq alaa no Tuunq biiñ kaa soo a ngorooxin.

²⁵A ƥisiida na xa tim axe no saax le, a lalin a in soo a mbetandoox a in ee: ‹Saax le o Yaal oxe Roog in a ci’na a in saax faax oo.›

²⁶Kaa koy, nu mbug’ee o ndet, too neene nu siiknoora fo kebil ne no Yaal oxe Roog nuun.

²⁷Nu ñuxmatilooxa kam ƭiif ke nuun, lay ee: ‹O Yaal oxe Roog in kaa bugee bug a in, ten taxu ta sut a in no saax laa Misira, ndax ta ɓoxot a in na xa ƥay no Aa-amori we soo a moocand a in.

²⁸Ndiiki koy, xar i mbaaƭkaa maaga? Fog in a ƥutanda njambaar in, ye da layna yee: Xeet faaga moƴu o may a in soo a ngup a in took. Teeru ke den kaa magin soo a saŋe’el boo na eel akaa, too i nga’a maaga sax xa taan axe Anak.[1]›

²⁹Lay’aam a nuun ee: ‹Ba nu ndiid too ba nu saɗar a den.

³⁰O Yaal oxe Roog nuun o mat fee na ñaaƴaa mbaambir nuun na ñoxorankaa a nuun, ne ta fi’antuuna a nuun Misira na kid nuun

³¹fo na koƥ-a-ƥor alaa. Nu nga’a yee ne faap a meeɓtaa o ƥeem, neene o Yaal oxe Roog nuun a meeɓtu a nuun na ƭat ale nu ñaaƴna, boo neen nu mbadiidu no mbiñ onqene.›

³²Keene fop koy taxee nu njeg a koolax no Yaal oxe Roog nuun

³³fee ñaaƴoogna mbaambir nuun na ƭat ale, ndax ta waaƭan a nuun maa nu ndalna. No yeng ole aal fiɗel a fi’oogu, soo no ñaal ne ta fi eel, ndax ta lal a nuun a ƭat ale nu mbarna o ndeef.

³⁴Ye o Yaal oxe a nanna o nqasax onqe nuun, a fuux’a soo a daaɓoox ee:

³⁵‹O leng no wiin we no suk mbaaxaƭaru neeke ga’kee saax faax le daaɓoox’uuma fo daan den ee xam ci’in a den,

³⁶bo ta yoqaa Kaleb fee o ƥiy Yefune. Xam ci’in, ten fo xa taan um, saax le ta dakna o jaf um, yaam a reefaxam fo ngor.›

³⁷O Yaal oxe a fuuxan’axam itam yaam nuun soo a layaam ee: ‹Wo oo rokkiro teen.

³⁸Yosuwe fee o ƥiy Nun refna o tiidimle of xan a rok teen. Saƭakineen, yaam ten na ɗoxkaa Ii-isra’el we no saax leeke refna lam den.

³⁹Xa teɓandoong nuun axe nu layna koy ee xan a njaɓel, xa ƥiy nuun axe anddirandafuleerna paax fo paaxeer na ndokkaa no saax leene. Den o mat um ci’kan, da njegkin.

⁴⁰Nuun o mat nomtooxyo, nqotatin na koƥ-a-ƥor alaa, njagin na Kal alaa no xeet laa.›

⁴¹Maaga, nu ndoon’axam ee: ‹I tooña o Yaal oxe, ndaa ndiiki koy, xan i ndet ñoxorel, ne o Yaal oxe Roog in a heblituuna a in.› Oxuu refna na nuun a xota ƥonax um, yaam nu nqalaataa yee o jaɓ o jegel ole na xa coong axe a yooɓa.

⁴²Maaga, o Yaal oxe a layaxam ee: ‹Layi a den da mbañ o ndet too baa ñoxorkel, yaam refiim a ndeer den. Baa mbarnoorik a qoox den maa no fañ den.›

⁴³Lay’aanum a nuun, ndaa nu nan-gilooxiraam. Kaa nu siiknoor’u fo kebil ne no Yaal oxe, mbool a mbool ndet na xa coong axaa.

⁴⁴Maaga, Aa-amori we ngen’ina na xa coong axeene a sutooxaniida a nuun, a nqawit a nuun Seyiir, a ndaabaa a nuun boo Horma, ne fomb quuraand a ndaxtaa o kiin.

⁴⁵Ye nu nomtooxiidna, nu loola mbaambir no Yaal oxe, ndaa nan-gilooxee o ñuxur nuun, rungee nof um na nuun.

⁴⁶Ten taxu yoo nu moofa Kades boo ñaal podne nu njegna maaga.