Read NQAARIIT NE ROOG A cangatin ale 12 Bible Online

A cangatin ale 12 - NQAARIIT NE ROOG bible

A cangatin ale 12

¹«Keeke ndefu bargal ke fo kebil ke nu mbarna ngay ndax nu ndeef a den no ñoow o ñis nuun fop kam saax le o Yaal oxe Roog fee no daan nuun a ci’na a nuun ndax nu njegkin.»

²«Fat nu moocand fo mbiñ ne qeet ke nu ndaxkaa a mbaɗoortoogna roog ke den, ta ref took xa cul axe na xa coong axe, took a ñaang ake fo yoora ndaxar saqtu nuu refna.

³Fat nu njiƭit xa sadaxand axe den, ngef a ƥil ake da mbaɗooxaa, xa taaƴ xa lupe xe Asera fee da mbi’na roog den, nu ndox a den bo dee riw, yaq nitaal roog sexe ke den soo ñuf a kon ake no roog keene.

⁴Ba nu mbaɗoor koy o Yaal oxe Roog nuun ne da mbaɗoortaa roog ke den.

⁵Fat nu mbaɗoortikan soom no mbiñ onqe ta jilkaa na xa piisel axe na carind ake nuun fop, ndax ta gen teen, gon um a ƴufginooreel teen.

⁶Meene nu mbugko ƥisiidaa sadax toxel ke nuun fo sadax camsa’oor ke nuun fo a seek xarɓaxayandeer ake nuun fo ci’it ke nuun fo sadax ke na mbadniteel a tegit fo ke na mbi’eel no fud o letu fo itam taaw ke na xa siir axe fo ke na ked ake nuun.

⁷Meene itam nu mbugko ñaamtaa a den mbaambir no Yaal oxe Roog nuun, soo mbelakinooxaa, nuun fo ƥasil nuun, no ke nu njalna fop, too o Yaal oxe Roog nuun a barke’tin a nuun.

⁸Nu mbesoorkee boog ne i mbesooraa mene ndiiki, andoona yee oxuu refna kaa fi’aa ke jofooxuuna,

⁹yaam ne nu mbadafuleerna me nu ñootnoorkaa, no lanq ke o Yaal oxe Roog nuun a ci’na a nuun.

¹⁰Kaa koy, xan nu nqaañ a Yordaan soo ngenik no saax le o Yaal oxe Roog nuun a ci’na a nuun. Xan a ñootin a nuun, yaa ta watna a nuun no fañ we mbidna a nuun fop, soo nu ngen no woor.

¹¹Maaga, no mbiñ onqe o Yaal oxe Roog nuun a jilkaa ndax gon um a ƴufginooreel teen, fat nu ƥisiid fop ke hebluuma a nuun: sadax toxel ke nuun fo sadax camsa’oor ke nuun fo a seek xarɓaxayandeer ake nuun fo ci’it ke nuun fo sadax fa mbadnir a tegit nuun no Yaal oxe.

¹²Fat nu mbelakinoox mbaambir no Yaal oxe Roog nuun, nuun fo xa ƥiy nuun xa koor fo xa tew, surga nuun fo jeefeer nuun, fo itam Leelewi we ndefna a ndeer nuun, andoona yee njegee a las, ne’atiim lam nen a nuun.

¹³Fat nu mbootoox boog o ƥoxotaa sadax toxel ke nuun no fo mbiñ nuu nu ndaawna ndaaw.

¹⁴O mbiñ onqe o Yaal oxe a jilkaa kam o fiisel ole na leng na carind ake nuun soom nu mbugko ƥoxottaa sadax toxel ke nuun, mbi’aa fop ke hebluuma a nuun.

¹⁵Muu nu ngenkaa, no ke o Yaal oxe Roog nuun a barke’itkaa a nuun, nu mbaaga o mbar njegel a mbanuu nu mbugna, ndax nu ñaam a tegeƴ ake. Oxuu refna, ta xool mbaat ta ñak o xool, a waaga o ñaam teen, nen yaa ta reeƭna mbat mbaat njaf.

¹⁶Kaa rek, ba nu ñaam fo’oy. Fat nu ƥaxan a lanq nen yaa ta reeƭna foofi.

¹⁷Nu mbaree ñaamit no pind nuun a seek xarɓaxayandeer ake na bele fee fo ake na biiñ fa nqas fee fo ake na diwliin fee mbaat taaw ke na xa siir axe fo na ked ake nuun mbaat sadax fuu ta waagna waag o ref, yaa ta refna fa mbadnir a tegit mbaat ci’it o fud o letu.

¹⁸Mbaambir no Yaal oxe Roog nuun nu ñaamitkaa a den no mbiñ onqe ta jilkaa, nuun fo xa ƥiy nuun xa koor fo xa tew, surga nuun fo jeefeer nuun fo Leelewi we ndefna a ndeer nuun, soo mbelakinooxaa mbaambir no Yaal oxe Roog nuun no ke nu njalna fop.

¹⁹Fat nu mbootoox o saganit Leelewi we no ñoow o ñis nuun fop kam saax nuun.

²⁰Yaa o Yaal oxe Roog nuun a ɗaaykaa xa ŋat axe nuun, ne ta regtuuna a nuun, soo o sooɓel a tegeƴ a tax nu lay ee: ‹Kaa i sooɓel a tegeƴ.› Xan nu mbaag o ñaam a tegeƴ, ne nu sooɓteena o ten.

²¹A soƥangaa yee o mbiñ onqe o Yaal oxe Roog nuun a jilkaa, ndax gon um a ƴufginooreel teen, kaa goƭ a nuun, nu mbaaga mbar na xa siir axe mbaat na ked ake nuun o Yaal oxe a ci’na a nuun, ne heblitanuuma a nuun, soo nu ñaamtin me nu ngenna ne nu mbugitna.

²²Fat nu ñaamin ne mbat mbaat njaf a ñaamteel. Oxe xoolaƭarna a waagaan o ñaam nen oxe xoolna.

²³Kaa koy, mbootooxyo a paax o ñaam fo’oy, yaam fo’oy na ñoownaa njer. Ba nu ñaam boog keene na ñoownaa fo a tegeƴ ake.

²⁴Nu ñaamkiran, ndaa fat nu ƥaxan a lanq nen foofi.

²⁵Nu ñaamangiran, xan nu ƭaay, nuun fo xa taan nuun, yaam nu mbi’a kaa jofna na kid no Yaal oxe.

²⁶Kaa koy, ci’it tedu ke nuun fo sadax fa mbadnir a tegit ake nuun, fat nu ƥis a den no mbiñ onqe o Yaal oxe a jilkaa.

²⁷Fat nu ƥoxot took o sadaxand ole no Yaal oxe Roog nuun a tegeƴ ake fo fo’oy le no sadax toxel ke nuun, soo no sadax camsa’oor ke nuun, nu ƥoxot teen fo’oy le, ñaam a tegeƴ ake.

²⁸Ngayyo ndax nu ndeef bargal kene fop um cooxaa a nuun. Nu mbi’angaa ke faaxna fo ke jofna na kid no Yaal oxe Roog nuun, yaaga xan nu ƭaayaa kili, nuun fo xa taan nuun.»

²⁹«O Yaal oxe Roog nuun xan a moocand mbaambir nuun qeet ke nu ndaxkaa. Yaa nu ndaxkaa a den boo ngen no saax den,

³⁰fat nu mbootoox a paax, yaam ndik nu yen no mbog, tee kaa nu laalaa a den, a cinj yaa da moocandeena mbaambir nuun. Ba nu ƥaal kaa jofna no roog ke den fo ne da mbaɗoortaa a den took o mbug o mbaɗoox a den.

³¹Nu mbesoorkee nen a den, yaa nu mbaɗooxaa o Yaal oxe Roog nuun, yaam kaa da mbi’aa na paɗax ale no roog ke den cednooxu kuu ndefna kaa o Yaal oxe a sibna. A ndeta sax boo a ndoxanaa roog ke den xa ƥiy den xa koor fo xa tew.