Read NQAARIIT NE ROOG A cangatin ale 13 Bible Online

A cangatin ale 13 - NQAARIIT NE ROOG bible

A cangatin ale 13

¹Ngayyo ndax nu ndeef ke hebluuma a nuun fop. Nu ƥaatkee teen dara, too nu mbatinkee teen tig itam.»

²«Xeƈa na bes fa leng, xan o tuleer mbaat o maɗag a feeñit a ndeer nuun soo a yegin a nuun o anddiloor mbaat com’andtu,

³ndax ta ɗooqloox a nuun nu mbaɗook roog lakas kaa nu and’eerna, njalan a den. Boo o anddiloor ole mbaat com’andtu ke a jegitna ne ta yegnit’uuna a nuun sax oo,

⁴ba nu nan-giloox fa lay um. Fat nu and ee o Yaal oxe Roog nuun na ɗeetloortan a nuun boo a and, ndax nu mbexaan na qeeñ nuun fop fo na xa laaw nuun fop.

⁵O Yaal oxe Roog nuun soom nu mbaɗooxkaa, saɗarin, ngay kebil um, nanan o ñuxur um, njalanin soo ndamoox no ten.

⁶O tuleer oxeene mbaat o maɗag oxeene kaa war o warel, yaam kaa soobaa a nuun nu mbes a cinj o Yaal oxe Roog nuun, sutna a nuun no saax laa Misira, a wat a nuun no mbaƭ naa. Oxeene tuleer kaa bug o ɗapnoor a nuun a ƭat ale o Yaal oxe Roog nuun a fiisanna a nuun, ndax nu ñaaƴaa teen. Neene, xan nu mbatin paaxeer ke a ndeer nuun.

⁷Xeƈa na bes fa leng, xan o leng na nuun a ga o maag um mbaat o ndeɓ um mbaat o ƥeem o ngoor mbaat o ndew mbaat o teem oxe ta fexna fex mbaat xaariit um o ñis o leng, oxaa soobiiduuna na pet, ndax ta faɗook roog lakas kaa nu and’eerna, daan nuun and’ee a den,

⁸ndefna roog ke no qeet ke mbidna a nuun, da mat mbaat da ngoƭ, a xotit no cat adna boo no cat lakas.

⁹Ba o jaɓin, too ba o nan-gilooxin. Yirimkino, yuɗkirang, too ɗasinkiro o pog of oxeene,

¹⁰ndaa kaa o helin o war. Fat o ɓay of a eet o dal took um, ndax ta warel, soo xa ƥay axe no lakas we fop a ndoonooxkaa.

¹¹Fat nu ndooman a kac boo yaa ta xonna, yaam kaa jeemoogu soobong o fes a cinj o Yaal oxe Roog nuun, sutitna a nuun Misira, maa nu ndeeƭna faɗ.

¹²Neene, xan Ii-isra’el we fop a yegin soo a njeg caƭar, too a pi a paaxeer a nandu neene fi’kataand a ndeer nuun.

¹³Nu nanangaa ta layteel na fa leng no teeru ke o Yaal oxe Roog nuun a ci’na a nuun nu ngenkin ee

¹⁴wiin jaree tus a inoora a ndeer nuun, a soob we ngenna na teeru feene yee: ‹Fat i mbaɗook roog lakas›, roog kaa nu and’eerna,

¹⁵maaga, fat nu ƥaal, ngoroox, ƭeetaqin a paax, too nu nga’angaa yee no ndigil a pi a cakalaaru leene a jega,

¹⁶fat nu mbarit we ngenna na teeru feene fop laƥ, ngefin tuƈ fo ke refna teen fop, cegel ke sax, nu mbarit a den laƥ.

¹⁷Fat nu mbokat kalal ke fop na baayo fee na teeru fee, cinj kaaga nu ndaaɓin fa teeru fee fop. Xan a ref nen sadax faa doxaneena o Yaal oxe Roog nuun. Fat o mbiñ onqeene a refat juum kefatin boo kili, too baa maxatinel boo muk.

¹⁸Nu nqotkee dara no ke wareena o yaq, ndax fuux le no Yaal oxe Roog nuun a ɓoos, ta yirim a nuun soo a mayƭand a nuun ne ta daaɓoorit’uuna fo daan nuun,

¹⁹yaa nu nananuuna too ngay kebil ke ten fop um cooxaa a nuun xaye soo mbi kaa jofna na kid um.»