Read NQAARIIT NE ROOG A cangatin ale 14 Bible Online

A cangatin ale 14 - NQAARIIT NE ROOG bible

A cangatin ale 14

¹«Xa teɓandoong no Yaal oxe Roog nuun nu ndefu! Yaaga boog o xaaraand a jegangaa, ba nu ñaasoox, too ba nu nqanqoox no ƭuf itam.

²Kaa nu ndef xeet faa kesaneena o Yaal oxe Roog nuun. Ten jilu a nuun, ndax nu ndef xeet faa ta jegoodna a ndeer qeet lakas ke no lanq ke fop.»

³«Nu mbaree o ñaam dara kaa o Yaal oxe a ɗeetna nen cednooxu.

⁴Keeke ndefu muumeen ke mbareena o ñaamaa: naak fo mbaal fo fambe,

⁵njaf, mbat, lok, fambe-koƥ, mbiil, naak-a-koƥ, njaq

⁶fo muumeen lakas ke fop njegna xa poxos axaa qaacooxna too a ngaydilooxaa.

⁷Kaa koy, nu mbaree o ñaam muumeen ke njegna xa poxos xa qaacooxu too naangee o ngaydilooxaa mbaat ke na ngaydilooxaa, ndaa njegee xa poxos xa qaacooxu. Neene, fat nu ƭeet nen qoolaƭaru muumeen kene: ngeeleemb, ndol fo damaan[7]. Kaa da ngaydilooxaa, ndaa njegee xa poxos xa qaacooxu.

⁸Ba nu ñaam ruul. A jega xa poxos axaa qaacooxna, ndaa naagee o gaydilooxaa. Fat nu ƭeetin nen qoolaƭaru. Muumeen keene fop, ba nu ñaam a tegeƴ den, too ba nu nduq xa tal den sax.

⁹A ndeer muumeen ke na ñoowaa kam foofi nu mbaaga o ñaam ke njegna xa lafoor fo xa ñaƥ.

¹⁰Kaa koy, ba nu ñaam leng no ke njegeerna xa lafoor fo xa ñaƥ. Fat nu ƭeet a den nen qoolaƭaru.

¹¹Tiiƭ qoolu ke fop, nu mbaaga o ñaam a den.

¹²Keeke ndefu tiiƭ ke nu mbareerna o ñaam: a canjiik, a tud fo a kalkooki,

¹³a maf, a qawooƈ, a tunj fo xa qos den

¹⁴a tooq fo xa qos den fop,

¹⁵a ba, a sambaaƭ, a caakraan fo a maf-o-ngookol fo xa qos den,

¹⁶o riing, a loy fo a bew,

¹⁷a paɓaan, a tud-a-kerees fo o mudin,

¹⁸a caroox, a taanaaw fo xa qos den, o saarnaak-njogoy fo a ƭeem.

¹⁹Yeeyet teɓ ke fop, fat nu ƭeet a den nen qoolaƭaru, too ba nu ñaam a den.

²⁰Kaa koy, nu mbaaga o ñaam tiiƭ ke nqoolna fop.

²¹Ba nu ñaam a tegeƴ muumeen medu. Fat nu cooxin xa kataakoon axe ndefna a ndeer nuun mbaat nu njikooxin wiin jan we. Nuun o mat, kaa nu ndef xeet faa kesaneena o Yaal oxe Roog nuun. Ba nu njawit o mbambe nqe fo sis ya um.»

²²«O hiid oluu refna, fat nu mbatin a seek xarɓaxayandeer ake no saxade le nuun fo ke lanq ke nuun a mbatkaa.

²³Cinj kaaga, fat nu ndet no mbiñ onqe o Yaal oxe Roog nuun a jilkaa ndax gon um a ƴufginooreel teen. Maaga o mat mbaambir no Yaal oxe nu ñaamitkaa a seek xarɓaxayandeer ake na bele fee nuun, na biiñ fa nqas fee nuun, na diwliin fee nuun fo itam taaw ke no naak ke fo paal ke fo pambe ke nuun. Neene, xan nu aqatoox o saɗar o Yaal oxe Roog nuun no ñoow nuun fop.

²⁴Yaa o Yaal oxe Roog nuun a barke’itkaa a nuun ndiig mbaax, xeƈa nu mbaagkee o ƥis a seek xarɓaxayandeer ake boo no mbiñ onqe ta jilkaa ndax gon um a ƴufginooreel teen, yaam a ƭat ale a liitooxkaa na nuun lool.

²⁵A reftangaa neene, sofyo a seek xarɓaxayandeer ale fa xaaliis soo ƥisiidin no mbiñ onqe o Yaal oxe Roog nuun a jilkaa.

²⁶Maaga, fat nu njik ke nu sooɓeena fop, nqoox mbaat mbaal mbaat fambe, biiñ mbaat a yer a qaaɗu lakas, soo nu ñaamin fo o ɗaay, nuun fo ƥasil nuun meene mbaambir no Yaal oxe.

²⁷Ba nu saganit koy Leelewi we ngenna no teeru ke nuun no tig nandu neene, yaam njegee a las, njegee lanq a ndeer nuun.

²⁸Kaa koy, no muukandoong ne no hiid o dadkandeer oluu refna fat nu sut a seek xarɓaxayandeer ale no ke nu mbarke’teena no hiid olaaga, soo nu nqaƴin no teeru ke nuun.

²⁹Maaga, xan Leelewi we njegeerna a las, njegee lanq a ndeer nuun, a ngar a nqotin, den fo xa kataakoon axe fo xa baan axe fo ñaaw we na ngenkaa no teeru ke nuun. Neene, xan da mbaag o ñaamaa boo a ngiñ, too o Yaal oxe Roog nuun xan a barke a nuun no kuu nu ndokna.»