Read NQAARIIT NE ROOG A cangatin ale 16 Bible Online

A cangatin ale 16 - NQAARIIT NE ROOG bible

A cangatin ale 16

¹«Fat nu ndoofandanaa o Yaal oxe Roog nuun Xew fee na colandax ale no nqool Abiib, yaam teen o Yaal oxe a sutu a nuun Misira, no yeng.

²No mbiñ onqe o Yaal oxe Roog nuun a jilkaa, ndax gon um a ƴufginooreel teen, fat nu sadaxiidan cegel ke na Colandax ale, da inoor na xa siir axe mbaat na ked ake nuun.

³Ba nu ñaam dara kaa foɗaxna yaa fo xew fee, ndaa fat nu ñaamaa puuru canja’e boo ñaal ɓetuu ƭik, yaam a ñofandax a maak nu sutooru saax le Misira. Neene, yaa nu ñaamaa puuru yaxandooxe keene, xan nu mbetandooxaa no ñoow o ñis nuun fop bes fee nu sutooxna a Misira.

⁴Poɗaxnir waratee o jeg no fiisel ole nuun fop no ñaal ɓetuu ƭik keene, too dara na tegeƴ ake no njegel ne nu sadaxitkaa na kid-a-caɓru kaa no ñaal eetaand ne waree o fe boo no feet nqes olaa.

⁵Nu mbaree o sadaxit njegel ne na Colandax ale no mbiñ onquu ta waagna waag o ref no fo mbiñ ne o Yaal oxe Roog nuun a ci’na a nuun ndax nu njegkin.

⁶No mbiñ onqe o Yaal oxe Roog nuun a jilkaa soom, ndax gon um a ƴufginooreel teen, nu sadaxitkan. Fat nu sadaxtin no kirand naa, yaa njeeƈ ne a mudkaa, refna ref waxtu fee na sutax alaa nuun Misira.

⁷No mbiñ onqe o Yaal oxe Roog nuun a jilkaa nu njawitkaa njegel ne soo ñaamtin teen. No feet nqes olaa nu mbaaga o nqaad, oxuu refna no ƭiif um.

⁸Fat nu ñaamaa puuru canja’e boo ñaal ɓetuu fa leng, soo no ñaal ɓetuu ƭikandeer naa, nu ndoofandan teen o Yaal oxe Roog nuun o xet o tedu, too nu njalkee teen dara.»

⁹«No ke xotitna yaa a saxad ale na bele fee a ropkeel, fat nu lim pes takooxiidu ɓetuu ƭik

¹⁰soo sogkaa o ndoofandan o Yaal oxe Roog nuun Xew fee no pes ɓetuu ƭik takooxiidu ke. Fat nu njagand sadax o fud o letu ke, ndeefandin ne o Yaal oxe Roog nuun a barke’itkaa a nuun

¹¹soo mbelakinoox mbaambir no Yaal oxe Roog nuun no mbiñ onqe ta jilkaa ndax gon um a ƴufginooreel teen, nuun fo xa ƥiy nuun xa koor fo xa tew fo surga nuun fo jeefeer nuun fo Leelewi we ndefna no teeru ke nuun fo itam xa kataakoon axe fo xa baan axe fo ñaaw we na ndefkaa a ndeer nuun.

¹²Fat nu mbetandoox ee nu ndeeƭa faɗ kam saax laa Misira. Ten taxu fat nu ngay a paax ndax nu ndeef kebil keene fop.»

¹³«Yaa nu sugkaa bele fee nuun boo ƈut, nol xa tim biiñ axe nuun, fat nu ndoofandaa Xew fee no ƭiif ke boo ñaal ɓetuu ƭik.

¹⁴Fat nu mbelakinoox yaa fa xew feene, nuun fo xa ƥiy nuun xa koor fo xa tew fo surga nuun fo jeefeer nuun fo itam Leelewi we fo xa kataakoon axe fo xa baan axe fo ñaaw we ndefna no teeru ke nuun.

¹⁵Fat nu ndoofandan o Yaal oxe Roog nuun xew feene boo ñaal ɓetuu ƭik no mbiñ onqe ta jilkaa. Fat nu mbelakinoox a paax, yaam xan o Yaal oxe a barke a saxad ale nuun fo ke nu njalkaa fo xa ƥay nuun fop.

¹⁶Goor we na xeet nuun fat a ngaraa a caf a tadak o hiid oluu watna mbaambir no Yaal oxe Roog nuun no mbiñ onqe ta jilkaa, ta ref na Xew fee no puuru canja’e ke fo na Xew fee no pes ɓetuu ƭik takooxiidu ke fo na Xew fee no ƭiif ke. Ba nu ngar mbaambir no Yaal oxe koy fo xa ƥay xa ƥor,

¹⁷ndaa fat oxuu refna a cooxit podu ne doole um a daawna, a reefandin ne o Yaal oxe Roog nuun a barke’tuuna.»

¹⁸«Fat nu ndalin haahate fo kelfa kam teeru ke o Yaal oxe Roog nuun a ci’kaa a nuun fop, da ngate’aa wiin we na carind ake nuun fo o cofel.

¹⁹Ba nu ƭap yaa fa hate, mbañ o mbarit o leng no kate nuun, too ba nu njaɓ o neexleel muk, yaam neexil ke kaa mbuulnaa a kid ake no yaal-o-and we soo a yaqaa fa lay fee no jofu we.

²⁰O cofel rek nu mbaru o ndeef, ndax nu ñoowaa soo njang saax le o Yaal oxe Roog nuun a ci’na a nuun.»

²¹«Ba nu lup o daaƴ o leng mbaat nu njimb taxar tedu paam o sadaxand ole nu maxankaa o Yaal oxe Roog nuun.

²²Nu sipkee itam a ƥil a sexe kaa na mbaɗoorteel no mbiñ onqeene, yaam o Yaal oxe Roog nuun kaa sib a pi a nandu neene.»