Read NQAARIIT NE ROOG A cangatin ale 17 Bible Online

A cangatin ale 17 - NQAARIIT NE ROOG bible

A cangatin ale 17

¹Nu sadaxkee o Yaal oxe Roog nuun naak mbaat mbaal mbaat fambe laa jegna sik mbaat ta xar, yaam cednooxu yoo no Yaal oxe Roog nuun.

²Xeƈa na bes fa leng xan a jeg a ndeer nuun no leng no teeru ke o Yaal oxe Roog nuun a ci’kaa a nuun o koor mbaat o tew oxaa na fi’aa kaa faaxeerna na kid no Yaal oxe, a ɗeg ngiɓoor ne ten,

³yaa ta faɗookna roog lakas, a gungaa mbaambir den mbaat mbaambir njeeƈ ne mbaat o nqool onqe mbaat xa qoor axe na asamaan fop, ta guutatir fo ke o Yaal oxe a heblitna.

⁴Nu nanangaa tig nandu neene a layteel, fat nu ngoroox a paax, too nu nga’angaa yee no ndigil a pi a cednooxu leene a jega kam Isra’el,

⁵fat nu ƥis oxe fi’uuna, ta ref o koor mbaat o tew, no don-maax ole na teeru fee soo mbartin a kac.

⁶Oxe jambeena a waage war, yaa ɗik mbaat daduk a seede’na took um. Seede no kiin o leng soom koy deyee.

⁷Fat seede we a eet o ndoomin a kac, ndax ta warel, soo xa ƥay axe no lakas we fop a ndoonooxkaa. Neene, xan nu mbatin paaxeer ke a ndeer nuun.»

⁸«A soƥangaa yee no teeru ke nuun kaa jeg a bar mbaat nqasir mbaat ngaañ kaa ɗomeena o hate na nuun, fat nu ƥisin no mbiñ onqe o Yaal oxe a jilkaa.

⁹Fat nu ndet laamtik maaga saasadax we ndefna ndef Leelewi we fo o kaahate xe na fadnaa o far um a koom, too yaaga xan da ƭegan a nuun hate fee.

¹⁰Fat nu mbadin hate fee da ƭegankaa a nuun no mbiñ onqe o Yaal oxe a jilkaa, ndeef a ƭat ale da nqalankaa a nuun deŋ.

¹¹Fat nu mbesoor deŋ ne da ngeblituuna, mbañ o ƭap na ñamaak mbaat na janoon no kate ne da ƭegankaa a nuun.

¹²A jegangaa koy oxaa magnandooxna boo a fañ o nan-giloox fa lay fee no kaahate xe mbaat o saasadax oxe na jalanaa o Yaal oxe Roog nuun, oxeene kiin fat a warel. Neene, xan nu mbatin paaxeer ke a ndeer Isra’el.

¹³Neene, xan xeet fee fop a yegin soo a njeg caƭar, too o leng fesoorkatee a magnandax a nandu neene.»

¹⁴«Yaa nu ndokkaa no saax le o Yaal oxe Roog nuun a ci’na a nuun boo njegatin soo ngenin, xeƈa xan nu mbug o ndalnan a qoox nuun o maad, ndax nu nand fo qeet lakas ke mbidna a nuun.

¹⁵Maaga, fat nu ndod o kiin oxe o Yaal oxe Roog nuun fa xoox um a jilankaa a nuun. O maad oxeene o Ii-isra’el a refkaa, too ba nu njaɓ muk oxaa fogeerna na nuun a maadooxan a nuun.

¹⁶O maad oxe nuun waree o jeg pis mayu mbaat ta hebil wiin um da njikantikin Misira, yaam o Yaal oxe a laya a nuun ee nu mbaratee o nomtoox no saax leene.

¹⁷Waree o jeg rew mayu, yaam yaaga xan a fes o Yaal oxe a cinj. Waree itam o fokatanoox xaaliis fa wurus fa mayu.

¹⁸Yaa o maad oxe a moofkaa no uum-maamaad le, fat a bindanel yiƥadax no safe le no kebil keene saasadax we ndefna ndef Leelewi we a ngeekna.

¹⁹A wara o saq yiƥadax neene no mbind um, a jangan no ñaal ke no ñoow o ñis um fop. Neene, xan a aqatoox o saɗar o Yaal oxe Roog um, a gayaa fa lay fee fo bargal ke no kebil keene fop, a reefin,

²⁰ndax xalaatkee yee ten gartu xeet um took too ɗapkee kebil keene na ñamaak mbaat na janoon. Neene, xan a xuuɗ no maat um, ten fo xa ƥeem a ndeer no Ii-isra’el lakas we.»