Read NQAARIIT NE ROOG A cangatin ale 18 Bible Online

A cangatin ale 18 - NQAARIIT NE ROOG bible

A cangatin ale 18

¹«Saasadax we ndefna ndef Leelewi we fo Leelewi lakas we fop njegkee a las mbaat lanq nen fog den Ii-isra’el we. Xan da ñoowtaa sadax ke fo ci’it ke ƥoxoteena o Yaal oxe.

²Njegkee lanq a ndeer no Ii-isra’el we, yaam a las den refu yee da njalanaa o Yaal oxe, ne ta laytuuna a den.

³Boo xeet fee a ɓoxotaa o Yaal oxe sadax nqoox mbaat mbaal mbaat fambe, saasadax we a njega sañ-sañ o njeg teen a caf a leng fo a kaaɓaaɓ ake fo o fud ole.

⁴Fat nu cooxaa a den itam ke eetna o foor na bele fee nuun fo na biiñ fa nqas fee fo na diwliin fee boo na ƥiñ ake no paal ke fo pambe ke nu eetkaa o nduus,

⁵yaam a carind ale Lewi refu we o Yaal oxe Roog nuun a jilna ndeer a carind ake Isra’el fop, ndax da njalanaa o Yaal oxe boo kili.

⁶A soƥangaa yee o Leelewi kaa heboox o inoor na teeru fee ta genna kam Isra’el, a waaga o retan a xoox um no mbiñ onqe o Yaal oxe a jilkaa.

⁷Maaga, xan a waag o jalanaa o Yaal oxe Roog um nen Leelewi lakas we fog um fop ndefna maaga mbaambir no Yaal oxe.

⁸Xan a daawaa wargal no ñoowir um, ta ref a las alaa fodirna fo ake no lakas we, fogirkeerna fo ke a cikax ale no halal um a ɓisiidkan.»

⁹«Yaa nu ndokkaa kam saax le o Yaal oxe Roog nuun a ci’na a nuun, ba nu ndef no laalaa a pi a cednooxu ke no qeet ke ngenna teen ndiiki.

¹⁰Ba o leng na nuun a dox o ƥeem o ngoor mbaat o ndew nen sadax mbaat ta rok no ƭeet mbaat no ƥogid mbaat no pan mbaat no ñango

¹¹mbaat ta xuutaa mbaat ta roknaa no taxar mbaat ta maɗagaa mbaat ta ƴufginooxaa xon we.

¹²We na mbesooraa neene o Yaal oxe Roog nuun kaa ɗeetaa a den nen cednooxu, too keene sax sax taxu ta raxkaa qeet keene mbaambir nuun.

¹³Nuun o mat, fat nu ndamoox no Yaal oxe Roog nuun soom.

¹⁴Qeet ke nu ndaxkaa kaa nan-gilooxaa xa as axe no fan we fo axe no ɗeet we. O Yaal oxe Roog nuun koy kaa xañit a nuun nu mbesoor neene.

¹⁵O Yaal oxe Roog nuun xan a sutan a nuun a ndeer no fog nuun o tuleer oxaa nandna fa mi, too fat nu nan-gilooxin.

¹⁶Keene deŋ refu ke nu nqeɗ’ina o Yaal oxe Roog nuun no ñaal naa nu mbokatoorna no joong olaa Horeb. Kaa nu lay’u yee: ‹I mbugatee o nan o Yaal oxe Roog in a layoodaa fa in mbaat i nga fiɗel fa saasu lene, ndik i nqon.›

¹⁷Maaga, o Yaal oxe a layaxam ee: ‹Xeet fene ƥuru a lay keene.

¹⁸Xam sutan a den a ndeer no fog den o tuleer oxaa nandna fa wo. Xam daawnin nduleer es, soo ta andnoor a den fop ke um hebilkan.

¹⁹Oxuu nan-gilooxeerna koy fa lay es fee ta daawnitkaa no gon es, mi fo ten a refkaa.

²⁰Kaa koy, boo o tuleer a sedeerna o lay no gon es a ƭelem akaa hebleeranuuma mbaat ta layaa no gon no roog lakas, fat a warel.›

²¹Xeƈa xan nu laamtoox ee nam o kiin a waagu o andit ee nduleer neeke inooree no Yaal oxe.

²²A soƥangaa yee kaa o tuleer a yegin a nuun tig no gon no Yaal oxe, too keene fadnooxee, fat nu and ee nduleer um naaga inooree no Yaal oxe. O nga’atinax um soom taxun o yegnit keene, too ba nu saɗarin.»