Read NQAARIIT NE ROOG A cangatin ale 19 Bible Online

A cangatin ale 19 - NQAARIIT NE ROOG bible

A cangatin ale 19

¹«Xan o Yaal oxe Roog nuun a moocand qeet ke na xa piisel axe ta ci’na a nuun. Yaa nu ndaxkaa a den boo ngen no teeru ke den fo no pind den,

²fat nu kesan a qoox nuun teeru tadik no saax le o Yaal oxe Roog nuun a ci’na a nuun, nu njegkin.

³Fat nu nqaaj o fiisel ole o Yaal oxe Roog nuun a ci’na a nuun a qaaj a tadak, teeru ke a ndef ndeer ee ndeer a qaaj akeene, da sexanel a ƭat, ndax oxuu warna o kiin a waag o ƴuf a jaɓnook no teeru keene.

⁴Keeke na taxkaa oxe warna o kiin a waag o jaɓnook na fa leng no teeru keene ndax ta mucil o ñis um: Oxe warna o kiin too diyiran, soƥ’ee ta fañraa fo ten itam,

⁵nen yaa o kiin a yoonna fo o kend um, da ndet na koƥ alaa a ngodik a teex. Oxeene a ɗaayangaa ɓaax le a godiidaa, soo ɓaax le a paloor na kongos ale, a dal o yoon oxe ten bo ta xon, maaga oxe warna fat a jaɓnook na fa leng no teeru keene, ndax ta mucil o ñis um.

⁶A ƭat ale na teeru fa njaɓnooxand fee helee o jigid, ndik oxe warna o rabdinooxan o qon oxe kam fuux um a daaw oxe warna soo a saŋkin, too a soƥa fop oxe warna helaand o saŋik yaam fañroogee fo xe ta warna.

⁷Ten taxu um hebil a nuun, nu kes teeru caɓnooxand tadik.

⁸Xan o Yaal oxe Roog nuun a ɗaay xa ŋat axe no saax nuun, ne ta daaɓoortuuna. Xan a ci a nuun saax le fop ta daaɓoox’ina fo daan nuun ee xan a ci’in a nuun,

⁹yaa nu ngayna ndax nu ndeef kebil kene fop um cooxaa a nuun xaye, mbex o Yaal oxe Roog nuun, ndeefaa a ƭat um. Yaa xa ŋat axe nuun a ƭaaykeel, fat nu ƥaat teeru tadik no tadik eetaand ke.

¹⁰Neene, fo’oy jaambuur ɓaxkaand kam saax le o Yaal oxe Roog nuun a ci’na a nuun nu njegkin, too nu ngadooxkee fo’oy leene.

¹¹A soƥangaa koy ee o kiin kaa saqan o kend um o njaaku kam, a fogan soo a yen took um, a xawin bo ta xon, oxe warna a ƴufangaa na fa leng no teeru keene sax,

¹²maak we na teeru fee ta genna fat a ndamnoorin soo a ƥoxotin na xa ƥay no xe warna o rabdinooxan oxe wareena, ndax ta xon.

¹³Ba nu yirmin, too yaaga xan nu ƥog a Isra’el no fo’oy jaambuur soo ƭaay.»

¹⁴«Yaa nu ngenkaa no lanq ke nu cooxkeel kam saax le o Yaal oxe Roog nuun a ci’na a nuun nu njegkin, ba nu ndiñ a tet ake a ndeer nuun fo gend nuun, daan nuun a mbiisna.»

¹⁵«Seede no kiin o leng soom deyee, ndax o kiin a doonel tig, yaa ta jambeena gaaf mbaat tooñ mbaat bakaad fuu waageena o fi. A waage o doon tig, yaa seede we a ndefna ɗik mbaat daduk.

¹⁶A soƥangaa koy ee o seede maamaaɓ kaa jamb o kiin gaaf,

¹⁷fat wiin ɗik weene a ndet mbaambir no Yaal oxe, a lay ndaawir den mbaambir saasadax we fo haahate we da soƥkaa no far den na waxtu faaga.

¹⁸Fat haahate we a ngoroox a paax. A nga’angaa yee o seede xe kaa maaɓaa, a jambaa o pog um kaa jegeerna,

¹⁹fat nu ndoonin leng kut ke ta xalaatoogna o doon o pog um oxeene. Neene, xan nu mbatin paaxeer ke a ndeer nuun.

²⁰Neene, xan wiin lakas we a yegin soo a njeg caƭar, too a pi a paaxeer a nandu neene fi’kataand a ndeer nuun.

²¹Ba nu yirim muk koy oxe tooñna, ndaa fat a xawel. O ñis na bugko rabdaa o ñis, a ngid a rabdaa a ngid, ñiiñ a rabdaa ñiiñ, o ɓay a rabdaa o ɓay, a caf a rabdaa a caf.»