Read NQAARIIT NE ROOG A cangatin ale 2 Bible Online

A cangatin ale 2 - NQAARIIT NE ROOG bible

A cangatin ale 2

¹«I nquruloox’a, mbaasooxan a koƥ-a-ƥor alaa, nqot a ƭat ale na Kal alaa no xeet laa, ne o Yaal oxe a layit’axama o ten. I mbi’a ñaal mayu kaa i njoqooyooxaa me widna o jegel olaa na xa coong axaa Seyiir.»

²«Maaga, o Yaal oxe a lay’axam ee:

³‹Nu miña na coqooyax no jegel olene na xa coong axe, nqotyo boog farna fo ɓemb-roog o janoon.

⁴Hebli xeet fee kene: Xan nu nqaañ o fiisel ole no fog nuun, ndefna xa taan axe Esawu, ngenna Seyiir. Xan da saɗar a nuun, ndaa fat nu mbootoox a paax

⁵boo ba nu song a den. Ci’kiim a nuun sax kaa fodna nen o jaf no lanq ke no saax le den, yaam o jegel ole na xa coong axe Seyiir kaam las’un xa taan axe Esawu, da njegin.

⁶Ñaamel ke nu ñaamkaa, fat nu njiktin xaaliis na den bo no foofi le nu yerkaa sax.

⁷O Yaal oxe Roog nuun a barke’a a nuun no kuu nu mbi’na, a topatoox a nuun, ye nu nqaañiidaa a koƥ-a-ƥor a maak alene. Xa kiid qarɓeen nahik axey axaa ta refna fa nuun, too nu ñakee tus.›

⁸I nqaƴ’a a teef ale i mbug’ina o ndeef no jegel ole na xa coong axe Seyiir me fog in we xa taan Esawu a ngenna, laqtoox itam a ƭat ale na yulanq ale inoorna no teeru ke Eylat fa Esiyon-Gebeer. Cinj kaaga, i nqurulooxa, ndax i nqaañ a koƥ-a-ƥor ale Mowaab.

⁹O Yaal oxe a lay’axam ee: ‹Ba nu song Moomowaab we, too ba nu nqire fa den. Ci’kiim a nuun dara no saax le den, yaam den we xa taan Lot o mat las’um a Aar[2], da njegin.› »

¹⁰Ee-em we ngenoogu teen yaaga. Kaa ndeeƭu xeet fa njegu doole, a may soo a ndef cool nen Aa-anak we.

¹¹Den fo Aa-anak we fop kaa ƭeet’el nen Reerefa we. Moomowaab we o mat kaa nqoyoogu a den Ee-em we.

¹²O jegel ole Seyiir o mat Hoohori we ngen’u teen yaaga. Xa taan axe Esawu kaa ndax’u a den, a moocand a den soo a ngen na seek den, ne Ii-isra’el we a mbi’tuuna no saax le da njegna, too o Yaal oxe a ci’’un a den.

¹³«O Yaal oxe a lay’axam ee: ‹Ndiiki koy, inooxyo nqaañ a ƈufnand ale Sered.› Maaga, i nqaañaan.

¹⁴Waxtu fee i ñaaƴ’ina no ke xotitna Kades-Barneya boo na qaañ ale na ƈufnand ale Sered a reeƭa xa kiid qarɓeen tadik fo xa kiid ɓetaa tadaq, boo neen we mbaag’ina o ndet na xire no suk ne sutoor’ina Misira a nqonu, ne o Yaal oxe a daaɓoorit’uuna fa den.

¹⁵O ɓay no Yaal oxe a dala took den itam, ndax ta moocand a den bo da nqet a ndeer saŋe ne.

¹⁶Ye suk naaga mbaag’ina o ndet na xire fop a nqonna a ndeer xeet fee,

¹⁷o Yaal oxe a lay’axam ee:

¹⁸‹Xan nu nqaañ ndiiki a Aar kam saax le Mowaab,

¹⁹ndet boo njasnoor fo saax le no Aa-amon we. Kaa koy, ba nu song a den too ba nu nqire fa den. Ci’kiim a nuun dara no saax leene, yaam den we xa taan Lot o mat las’anum, da njegin.› »

²⁰O jegel oleene itam kaa ɗeet’el nen kaa fogna no jeg ole no Reerefa we ngen’uuna yaaga. Aa-amon we kaa nqoyoogu a den Saasamsum we.

²¹Kaa ndeeƭu xeet fa njegu doole, a may soo a ndef cool nen Aa-anak we. Kaa koy, o Yaal oxe a fi’a boo Aa-amon we a ndax a den, a moocand a den soo a ngen na seek den.

²²Neene o Yaal oxe a fi’anit’un itam xa taan axe Esawu ngenna Seyiir, ye ta fi’na boo da ndax Hoohori we, a moocand a den soo a ngen na seek den boo no ñaal roog ne xaye.

²³Aa-awi we koy, ngen’ina no caate ke no jegel ole Gaasa, Kaakaftoor we[3] ngar’u, a moocand a den soo a ngen na seek den.

²⁴«O Yaal oxe a lay’axam ee: ‹Inooxyo ndet, nqaañ o xuluɓ ole Arnon. Xam ɓoxot a Siihon, o Aa-amori xe refna o maad Hesebon fo saax um fop na xa ƥay nuun. Inooxyo nqire fo ten, njang saax le ten.

²⁵No ke xotitna xaye xam fi boo qeet ke na adna fee fop a ndiid, a saɗar a nuun. A nanangaa nu layteel soom, xan da sendaa, a mbiriɓ.› »

²⁶«Heblit’aam duleer na koƥ-a-ƥor alaa Kedemot, da ndet maa Siihon fee o maad Hesebon, ndax da simnantaam o ten jam ee:

²⁷‹Kaa i mbug o nqaañ no saax of. A qal a maak ale rek i ndeefankaa, mbañ o ƭap na ñamaak mbaat na janoon.

²⁸Ñaamel ke fo foofi le i soxla’na kaa o jikoorkan a in xaaliis. Ci’i a in rek i nqaañ no saax of,

²⁹ne xa taan axe Esawu ngenna Seyiir fo Moomowaab we ngenna Aar a ci’it’uuna a in. Neene, xan i mbaag o njoot o xuluɓ ole Yordaan, ndax i ndok no saax le o Yaal oxe Roog in a ci’na a in.›

³⁰Kaa koy, Siihon fee o maad Hesebon jaɓee o xaƴ a in i nqaañ no saax um, yaam o Yaal oxe Roog in kaa riñ’un no saƭik xoox, a ŋajnoorin, ndax ta ɓoxotin na xa ƥay in, ne nu nga’tuuna xaye.

³¹O Yaal oxe a layaxam ee: ‹Ga’angi, mexe ɓoxotaa a Siihon fo saax um na xa ƥay nuun, njaɓyo saax le ten, nu njegkin.›

³²Siihon fo xiixire we ten fop a sutooxaniida a in soo a nqire’it fa in Yahas.

³³Kaa koy, o Yaal oxe Roog in a ɓoxotaan na xa ƥay in, soo i nqawin, ten fo xa ƥeem fo xiixire um fop.

³⁴Na waxtu faaga i njaɓa teeru ke ten fop, ngef a den tuƈ, mbar goor we fo rew we fo xa caaƈ axe, too i nqaƴee o leng ta ñoow.

³⁵Ke i njangal’ina no teeru ke i njaɓna refu cegel ke fo kalal lakas ke i soƥ’ina teen.

³⁶Ke xotitna Aroweer reeƭna na ƥeeraamb ale no xuluɓ ole Arnon fo na teeru fee reeƭna na yulanq ale sax boo a damik Galaad jegee teeru faa xoxna a in. O Yaal oxe Roog in a ɓoxota a den fop na xa ƥay in.

³⁷Kaa koy, i nduq’ee o fiisel ole no Aa-amon we refna xa cegel axe mbidna o xuluɓ ole Yabok fo teeru ke no jegel olaa na xa coong axaa fo fo mbiñ ne o Yaal oxe Roog in a hebil’ina a in, da mbaasel.»