Read NQAARIIT NE ROOG A cangatin ale 20 Bible Online

A cangatin ale 20 - NQAARIIT NE ROOG bible

A cangatin ale 20

¹«Yaa nu nqire’ikkaa fo fañ nuun soo nga pis fo a sareet-xire fo xiixire waa moƴna o may we na nuun, baa tax nu ndiid, yaam o Yaal oxe Roog nuun sutitna a nuun no saax laa Misira oxey fa nuun.

²A yoqangee dara ndax nu songrel, fat o saasadax oxe a fod mbaambir, a lay fo xiixire we.

³Fat a lay a den ee: ‹Nuun xiixire we Isra’el, nan-gilooxyo! Me ta refna koy, o nqire fo fañ nuun yoqu. Nu njasnoorangaa fa den, ba nu ñak njambaar, ba nu ndiid, ba nu mbiriɓ too ba nu send,

⁴yaam o Yaal oxe Roog nuun oxey fa nuun, ndax ta ñoxoran a nuun fo fañ nuun soo a ci a nuun o ndam.›

⁵Cinj kaaga, aa-adax we xan a laamit xiixire we yee: ‹Ndax a jega a ndeer nuun oxaa sogna o maxaa mbind naa ta genafuleerna? A soƥangaa yee a jega, fat a nomtoox no mbind um, yaam ndik ta xonit na xire faa, soo o lakas a genik no mbind naa.

⁶Ndax a jega oxaa jimbna a ƭing taxar biiñ too ñimafulee xa tim axe? A soƥangaa yee a jega, fat a nomtoox no mbind um, yaam ndik ta xonit na xire faa, soo o lakas a ɓoor xa tim biiñ axe.

⁷Ndax a jega oxaa na bugaa too gilgafulee? A soƥangaa yee a jega, fat a nomtoox no mbind um, yaam ndik ta xonit na xire faa, soo o lakas a xot o toog oxe.›

⁸Fat aa-adax we a ndoon teen ee: ‹Ndax a jega a ndeer nuun oxaa ñakna njambaar soo a saɗar? A soƥangaa yee a jega, fat o yaal um a nomtoox no mbind um, yaam ndik ta foosnoor lakas we.›

⁹Aa-adax weene a layangaa boo a ƈut, fat a njil aa-adax na yaj, da adooxan xiixire we.

¹⁰Yaa nu ndetkaa songik teeru, fat nu eet o lay fo wiin we ngenna teen ndax a njaɓa ƥoxotoox na nuun.

¹¹A njaɓangaa o ƥoxotoox na nuun soo a mbetan a nuun xa ton-maax axe, fat we ngenna taaga fop a ndabdaa a nuun a bateer, a njalanaa a nuun.

¹²A soƥangaa koy ee njaɓee ƥoxotoox na nuun, ndax a ngeenoox no nqire fa nuun, maaga fat nu mbid teeru fee o kurul-keƥ.

¹³O Yaal oxe Roog nuun a ɓoxotangaa a den na xa ƥay nuun, fat nu mbarit goor we den fop laƥ.

¹⁴Rew we fo xa caaƈ axe fo cegel ke fo fop ke nu soƥkaa kam teeru fee koy, fat nu njang a den, lukit kalal ke no fañ we nuun, muudoorin, yaam o Yaal oxe Roog nuun ci’un a nuun.

¹⁵Fat nu mbesoor neene fo teeru ke liitooxna too mbogee no saax le nu ndalkaa.

¹⁶Kaa koy, no teeru ke no qeet ke o Yaal oxe Roog nuun a ci’na a nuun nu njegkin, nu nqaƴkee teen dara kaa jegna o ñis, ta ñoowaa.

¹⁷Fat nu ngef tuƈ teeru keene, saŋik we ngenna teen boo tak, ndefna Heeheet we, Aa-amori we, Kaakanaan we, Peeperisi we, Hiihiwi we fo Yeeyebus we, ne o Yaal oxe Roog nuun a heblituuna a nuun.

¹⁸Neene, aqatkee a nuun nu laal cednooxu ke da mbaɗoortaa roog ke den, soo nu mbakaad, tooñ o Yaal oxe Roog nuun.

¹⁹Nu songangaa teeru, mbidin o kurul-keƥ bo ta miñ soo sogkan o njaɓ, ba nu kaf a ƥaax, mbuuɓaa taxar tiirim ke mbiduuna. Fat nu ñaamaa xa tim axe den, mbañ o ngod a den, yaam taxar ke na koƥ ale ndefee wiin boo nu nqire’aa fa den.

²⁰Kaa koy, nu mbaaga o ngod taxar ke xa tim den a ñaamkaandeena, mbi’it a den a uum lanq a songir teeru fee nu nqire’taa, boo yaa ta yenna.»