Read NQAARIIT NE ROOG A cangatin ale 21 Bible Online

A cangatin ale 21 - NQAARIIT NE ROOG bible

A cangatin ale 21

¹«A soƥangaa yee kam saax le o Yaal oxe Roog nuun a ci’na a nuun nu njegkin, kaa o dal no kiin oxaa wareena a ga’el kam a koƥ ale, too o leng andee oxe waruuna,

²fat maak we fo haahate we nuun a liiƥ ke xotitna no dal ole boo no teeru ke mbiduuna fop.

³Teeru fee na moƴkaa o mat o dal ole koy, fat maak we na teeru faaga a mbaaƭ fi laa ɗooqtafulaandeena.

⁴Fat maak weene a ƥis fi le maa naagaandeena o xooxaa mbaat ta duufeel paam a ƈufnand a ŋiiskeer soo a ngefit maaga o ɗuk ole no fi le.

⁵Maaga, fat saasadax we ndefna xa taan Lewi a matiid, yaam o Yaal oxe Roog nuun jilu a den, ndax da njalanan soo a salanaa xeet fee barke no gon no Yaal oxe, too den na nqafaa qasir ke fo a pi a yednu ke fop.

⁶Fat maak we ngenna na teeru fee moƴna o mat o dal ole a laxadoox took fi le o ɗuk um a gefeena paam a ƈufnand ale

⁷soo a lay ee: ‹Xa ƥay in ƥaxee fo’oy leeke, too a kid in nga’ee ye ta ɓaxeel.

⁸O Yaal oxe, waasani xeet fee watoona. Ba o gadin a Isra’el fee xeet of fo’oy le na jaambuur fene.› Maaga, xan o Yaal oxe a waasan a nuun.

⁹Neene, xan nu mbi kaa faaxna na kid no Yaal oxe, too nu ngadooxkatee fo’oy le na jaambuur feene.»

¹⁰«Yaa nu songikkaa fañ nuun, soo o Yaal oxe Roog nuun a ɓoxot a den na xa ƥay nuun, boo nu ndam na den faɗ,

¹¹xeƈa xan o leng na nuun a ga na den o tew o mosu xaa yulna a ngid um, boo ta heboox o gilgin.

¹²Maaga, fat a ɓisin no mbind um, soo o tew oxe a ruusoox ɓula, a ɗeg paambaañ um.

¹³Fat a supit toki ke ta damit’eena mbaƭ,[8] a gen no mbind um, a loolaa a faap um fa ya um boo o nqool. Cinj kaaga, o koor oxe a waagaan o gilig, a yoon fo ten, soo ta refat o teem.

¹⁴A retangaa koy boo felatiran, fat a xaƴin ta ret muu ta bugna. Waagkatiran o jikoox mbaat ta fi’atinin o paɗ um, yaam ne ta fi’’uuna o teem.»

¹⁵«A soƥangaa yee o koor kaa jeg rew ɗik, a moƴ o bug o leng oxe yee o lakas oxe, soo a rim fo xuu refna no rew weene xa ƥiy xa koor, ndaa o tew oxe moƴaandeena o bug eetu o ñoot,

¹⁶a retangaa boo a xaajanaa xa ƥeem ke da mbarna o lam, waree o coox o ƥiy onqe no tew oxe ta moƴna o bug a las taaw ale, a fañin o coox o ƥiy onqe no tew oxe ta moƴeerna o bug, refna taaw um tigi.

¹⁷Fat a jaɓ ee o ƥiy onqe no xe ta moƴeerna o bug refu taaw um tigi, too fat a cooxin a las a ƭak no lam ne, yaam o ƥiy onqeene eetu no ndet um soo a jeg a las taaw ale.»

¹⁸«A soƥangaa koy ee o koor kaa jeg o ƥiy o ngoor onqaa yarooxaƭarna, a andaƭar too nanankee a faap um fa ya um, a refangaa sax ee kaa da nqawin,

¹⁹fat faap fee fa yaay fee a ndamin, a ƥisin no xeloorand ole mbaambir maak we na teeru fee.

²⁰Fat da lay a den ee: ‹O ƥiy in onqene de, kaa yarooxaƭar soo a andaƭar. A ƭat um yongee no ke i layan, too dara refee o mbaƈ um, a refangee o laawax fo a yer.›

²¹Maaga, fat goor we na teeru fee fop a ndooman a kac boo yaa ta xonna. Neene, xan nu mbatin paaxeer ke a ndeer nuun. Xan Ii-isra’el we fop a yegin soo a njeg caƭar.»

²²«A soƥangaa yee kaa o kiin a fi kaa taxna ta war o warel, boo a warel, soo cinj kaaga ta lokel na teex,

²³o dal oleene waree fe na teex ale. Fat nu ngasin no ñaal naaga sax sax, yaam oxuu lokeena na teex, Roog salooxun. Yetooxyo boog boo ba nu nqoolaƭarand saax le o Yaal oxe Roog nuun a ci’na a nuun nu njegkin.»