Read NQAARIIT NE ROOG A cangatin ale 22 Bible Online

A cangatin ale 22 - NQAARIIT NE ROOG bible

A cangatin ale 22

¹«Oxuu ga’na naak mbaat mbaal mbaat fambe no kiin o lakas laa mo’na, baa xaƴin maaga, ndaa fat a ɓisin o yaal um.

²A soƥangaa koy ee oxe jeguuna kaa gen koƭu mbaat sax andiran, fat a ɓis njegel ne no mbind um, a saqin boo yaa o yaal um a feeñkaa. Maaga, fat a ɓoxotin o ten.

³Fat a fi leng kut ke, yaa ta ga’na o faam o mo’u mbaat ndoki mbaat tig lakas kuu waagna o mo o yaal um. Wariran o ñak o topatoox muk.

⁴Oxuu ga’na o faam mbaat nqoox no kiin o lakas a yen na ƭat ale, wariran o xaƴ fo o yaal um soom, ndaa fat a dimle’in ta inatinin.»

⁵«O tew waree o rokoox tikoorik no koor mbaat o koor a rokoox tikoorik no tew. We na mbesooraa neene o Yaal oxe Roog nuun kaa ɗeetaa a den nen cednooxu.

⁶Oxuu soƥna na ƭat ale, ta ref took ndaxar mbaat a lanq, ndut ndiiƭ naa yaay fee a ɓopna a ƥoof ake mbaat ta ɓop xa ƥeem, waree xot a yaay fee.

⁷A waaga xot xa ƥiy axe, ndaa fat a xaƴ a yaay fee ta ret. A fi’angaa neene, xan a ɗaay soo a xuuɗ.

⁸Yaa nu maxkaa mbind nqas, fat nu mbi’anin a pang me widna o dung-took ole, ndax nu ngadooxkee fo’oy no xaa yentiidna teen.

⁹Ba nu nduuf na ƭing taxar biiñ nuun tuufe-duufe lakas. Nu mbi’angaan, fat saxade le fop a kesanel o Yaal oxe, ta ref xa tim biiñ axe fo lakas ke fop.

¹⁰Yaa nu nqooxaa, ba nu ngumnandoor nqoox fo o faam.

¹¹Ba nu ndokoox ndoki naa riwteena a ƥiñ mbaal fo njoor.

¹²Fat nu mbi’aa a tup na xa noflax xa nahaq axe no toki ke nuun.»

¹³«A soƥangaa yee o koor kaa gilig o tew, a yoon fo ten boo a ƴut soo bugatiran,

¹⁴a gadnin tooñ, a fuulnaa ƭool um ee: ‹Kaam gilig o tew oxene, ndaa ye yoonuuma fo ten, kaam soƥ ta and adna boo a ƴut›,

¹⁵maaga, fat faap fee fa yaay fee no tew oxeene a ƥis o moote le no xeloorand olaa mbaambir maak we na teeru fee.

¹⁶Fat faap fee no tew oxe a lay maak we yee: ‹Kaam ci o koor oxene o ƥees, too me ta refna bugatiran,

¹⁷a gadnan tooñ, a jamban ee a soƥa o ƥees a and adna, too kene a ref o moote le no ƥees.› Cinj kaaga, fat da letin mbaambir maak we na teeru fee o moote le ta ɓoxotit’eena o kor um.

¹⁸Maaga, fat maak we na teeru fee a ndam o koor oxeene, a yarin.

¹⁹Took kaaga, fat da serin ta rabid a faap fee no tew oxe xa monjong teemeed xaaliis, yaam ne ta layanna o njaaƈ o ndew o Ii-isra’el cegeer. Cinj kaaga, a wara geek o tew oxe, too no ñoow o ñis um fop jegkee sañ-sañ o raxin a tolax.

²⁰A soƥangaa koy ee ke o tew oxe a jambeena kaa jeg, too jegee kaa lalitna yee and’ee adna,

²¹fat ta ɓisel boo na carind alaa no mbind faap um, soo goor we na teeru fee a mbartin a kac. Fat a xon, yaam kaa fi cednooxu kam Isra’el, yaa ta wondooxna fo o koor kam mbind faap um, a soƥ dolooxafulee. Neene, xan nu mbatin paaxeer ke a ndeer nuun.

²²Nu mbetangaa o koor oxaa wondooxna fo o tew o tolooxu, den ɗik fop fat a mbarel, o koor oxe yoo, o tew oxe yoo. Neene, xan nu mbatin paaxeer ke a ndeer nuun.

²³A soƥangaa yee kaa jeg o njaaƈ o ndew onqaa na bugeel, soo o koor o lakas a xet fo ten na teeru fee, a wondoox fo ten,

²⁴fat nu ƥis a den boo no don-maax olaa na teeru fee soo mbarit a den a kac. O tew oxe a wara o xon, yaam ke taxna faɗooxee kam teeru fee, o koor oxe a xon yaam ne ta giginna o toog no kend um. Neene, xan nu mbatin paaxeer ke a ndeer nuun.

²⁵Kaa koy, a soƥangaa yee kam a koƥ ale o koor oxe a xetu fo o njaaƈ o ndew onqe na bugeel, a damin soo a wondoox fo ten, o koor oxe fi’na keene soom na warkeel.

²⁶O njaaƈ o ndew onqe koy fi’kaand dara, yaam fi’ee bakaad faa taxna ta warel. Kaa nand nen o koor oxaa inooxanna o kend um ndax ta xuuf ñoot o ñis um.

²⁷O njaaƈ o ndew onqe o koor oxe a xetitna kam a koƥ ale a waaga o faɗoox, ndaa jegee o leng oxaa ƴufguuna.

²⁸A soƥangaa koy ee o koor oxe kaa xet fo o njaaƈ o ndew onqaa andafuleerna adna too bugafulaand, a ɓoƭin soo a wondoox fo ten, a mbetange,

²⁹fat o koor oxe fi’na keene a coox a faap fee no njaaƈ o ndew onqe xa monjong qarɓeen ƥetik xaaliis fa nqoolu. Ne ta giginna o njaaƈ onqe, fat a xotin, ta refat o teem, too no ñoow o ñis um fop jegkee sañ-sañ o raxin a tolax.