Read NQAARIIT NE ROOG A cangatin ale 23 Bible Online

A cangatin ale 23 - NQAARIIT NE ROOG bible

A cangatin ale 23

¹O leng waree jang o tew faap um, yaam yaaga ta ref o huytin.»

²«Baa o koor oxaa ɓujeena mbaat mbaambir um a ɗegel a fog no mbokatax ne no Yaal oxe.

³Oxuu rimteena na yoon ake nqañteena[9] fogkee no mbokatax ne no Yaal oxe. Xa taan um sax boo no suk xarɓaxayandeer naa mbogkee teen.

⁴Aa-amon we fo Moomowaab we njaɓkaand kam mbokatax ne no Yaal oxe. Xa taan axe den sax boo no suk xarɓaxayandeer naa njaɓkaand teen.

⁵Qeet keene nqetooxiid’ee a nuun fo ñaamel fa foofi, ye nu maad’ina o ndefaa na ƭat, cinj a sutax alaa nuun Misira. Kaa ndet’u Petoor kañ kam Mesopotami, a nqoyaniid a nuun a Balam fee o ƥiy Bewoor, a ndabdin ndax ta saloox a nuun.

⁶Kaa koy, o Yaal oxe Roog nuun nan-gilooxee a Balam, ndaa a suptana a nuun a salax ale, ta refat barke, yaam kaa fex a nuun.[10]

⁷No ñoow o ñis nuun fop, ba a ƭat nuun a yong na jam mbaat no xen no qeet ƭik keene.

⁸Ba nu ndiimb Ee-edoom we, yaam fog nuun a ndefu. Ba nu ndiimb itam Miimisira we, yaam nu ndeeƭa xa kataakoon no saax den.

⁹Xa taan axe no qeet ƭik keene a mbaage o njaɓ kam mbokatax ne no Yaal oxe no ke xotitna no suk ndadkandeer naa.»

¹⁰«Yaa nu nqire’ikkaa fo fañ nuun boo sip saŋe nuun, fat nu mbootoox fop ke waagna o xoolaƭarand a nuun.

¹¹A jegangaa na nuun o koor oxaa xoolaƭarna, yaam mbaambir um a yuur no yeng ole, too keene a betin, fat a sutoox saŋe ne, a fañ o rokiid teen.

¹²Fat a ɓogdoox no kirand ne soo a rokkaa no saŋe ne, yaa njeeƈ ne a mudaa.

¹³Fat nu mbi o mbiñ tafil saŋe ne maa o kiin a waagna o ret tafil mbind.

¹⁴Fat o qiixire xuu refna a ɓonoox kasir, ndax a retangaa tafil mbind, ta gas a lanq soo cinj kaaga ta uup ñaaƈlax ke.

¹⁵O Yaal oxe Roog nuun kaa reefaa a ndeer nuun no saŋe ne, ndax ta saytoox a nuun soo a ɓoxot fañ nuun na xa ƥay nuun. Yaaga boog saŋe ne a wara o ted, ndax o Yaal oxe ga’kee teen dara kaa sednooxna soo a fes a nuun a cinj.»

¹⁶«Boo o paɗ a ƴufitna no mbind no yaal um soo a jaɓnooxiid me nuun, nu ƥoxotkiran o yaal um.

¹⁷Fat a moof me nuun no mbiñ onqe ta jilkaa na fa leng no teeru ke na njofooxkan, too ba nu toroxandin.»

¹⁸«Ba o leng no Ii-isra’el we, ta ref o koor mbaat o tew, a rok no njaga ne ɗeeteena nen tedu.

¹⁹Ba nu njaɓ o kiin a ɓisiid kam Mbind ne no Yaal oxe Roog nuun ndabid naa ta xotitna no tig nandu neene, ndax ta fadnitin a tegit, yaam o Yaal oxe Roog nuun kaa sib a pi a nandu neene.»

²⁰«A soƥangaa yee kaa nu ƥand o pog nuun tig, nen xaaliis mbaat ñaamel mbaat tig lakas, ba nu laacin ndimand.

²¹Nu mbaaga o laac ndimand, yaa ta refna o gataakoon, ndaa baa ta ref no pog nuun. Fat nu ngay kebil neene kam saax le nu njangkaa ndax nu njegkin, too yaaga xan o Yaal oxe Roog nuun a barke a nuun no kuu nu ndokna.»

²²«Boo nu ndegoorna fo o Yaal oxe Roog nuun, ba nu ñakin o mbadin, yaam yaaga xan o Yaal oxe a laamtin a nuun, too nu mbi’angiran, xan nu ngadoox bakaad fee.

²³Ñak o fi a tegit refee bakaad.

²⁴Kaa koy, boo nu nqesna o ndeg o Yaal oxe Roog nuun tig, fat nu mbexey ndax nu mbadin ke nu ndaawna o lay.»

²⁵«Boo nu nqaañna kam a ƭing taxar biiñ alaa nu njegeerna, nu mbaaga o moɗ boo ndeyƭoox na xa tim axe. Kaa koy, nu njegee sañ-sañ o ƥoor, yip no ƥaxañ nuun.

²⁶Leng kut oo itam, yaa nu nqaañna o qol bele no kiin o lakas. Nu mbaaga ƥol teen xa yaƥ xa leng-leng fo o ɓay nuun, ndaa nu njegee sañ-sañ o ngeew.»