Read NQAARIIT NE ROOG A cangatin ale 26 Bible Online

A cangatin ale 26 - NQAARIIT NE ROOG bible

A cangatin ale 26

¹«Yaa nu ndokkaa kam saax le o Yaal oxe Roog nuun a ci’na a nuun nu njegkin, boo njangin soo ngenin,

²fat nu nqot ke na eetkaa o foor no ke lanq ke nuun a mbatkaa kam saax le o Yaal oxe Roog nuun a ci’na a nuun, nu yipin na cenjel soo ƥisin no mbiñ onqe o Yaal oxe Roog nuun a jilkaa ndax gon um a ƴufginooreel teen.

³Fat nu ndet maa no saasadax oxaa na fadnaa o far um a koom, nu layin ee: ‹Xaye kaa i mbeejliid o Yaal oxe Roog of ee i ndokiida no saax le ta daaɓoox’ina fo daan in ee xan a ci’in a in.›

⁴Fat o saasadax oxe a jang a cenjel ale soo a diƈin mbaambir o sadaxand ole no Yaal oxe Roog nuun.

⁵Maaga, fat nu layahin mbaambir no Yaal oxe Roog nuun ee: ‹O taan in kaa reeƭu o Aa-araam oxaa na molaa, too wiin leng-leng soom a yoonit’u, ye ta retaa Misira ndax ta ñoow maaga nen o gataakoon. Kaa koy, a ndeeƭata maaga xeet fa maak fa njegu doole too a may.

⁶Miimisira we koy kaa ñagadiloogu a in, a toroxandaa a in soo a seraa a in mbaƭ ƭomu.

⁷Maaga, i ƈufginooxa o Yaal oxe Roog fee no daan in, too a nana xa ñuxur in, a ga ne i toroxandteel fo coono ke in fo o ñaat ole in.

⁸O Yaal oxe a sutta a in Misira fo o ɓay um o jegu doole fo a naax um ale letnooxna, na pexey a pi a saɗarnooxu fo xa anddiloor fo comlaand.

⁹A ɓisiida a in no mbiñ onqene soo a ci a in saax lene fo sis fo suum a ndaxritaa.

¹⁰Ndiiki koy, o Yaal oxe, kaa i ƥisiidong ke eetna o foor no ke lanq ke ci’oona a in a mbatna.› Fat nu ndiƈin mbaambir no Yaal oxe Roog nuun soo ngung mbaambir um, mbaɗooxin.

¹¹Cinj kaaga, fat nu mbelakinoox, nuun fo Leelewi we fo xa kataakoon axe ndefna a ndeer nuun no paax ke o Yaal oxe Roog nuun a ci’na a nuun, nuun fo ƥasil nuun.»

¹²«No hiid o dadkandeer oluu refna, ta ref o hiid ole na seek xarɓaxayandeer ale, yaa nu mbatinkaa a seek xarɓaxayandeer ake no ke nu njegkaa, fat nu cooxin Leelewi we fo xa kataakoon axe fo xa baan axe fo ñaaw we, ndax da njeg kaa da ñaamaa boo a naang tem no fo mbiñ ne nu ngenkaa.

¹³Cinj kaaga, fat nu lay mbaambir no Yaal oxe Roog nuun ee: ‹Ke kes’eena i sutaan no pind in, cooxin Leelewi we fo xa kataakoon axe fo xa baan axe fo ñaaw we, ndeefandin no fop ke hebil’oona a in. I ƭapee too i mbeecee kebil ke wo.

¹⁴I ñaamee dara no keene yaa fo ñaawax too i mbatnee teen dara, a soƥ i nqoolaƭar, too i cooxtee teen dara nen sadax faa na ɓoxoteel o qon. Wo o Yaal oxe Roog in, kaa i nanan kañ o ñuxur of, mbesoor deŋ ne heblitanoona a in.

¹⁵Me fodoona no ngenand tedu of na asamaan, ɗeeti too barke a Isra’el fee xeet of fo lanq ke ci’oona a in, ne daaɓoorit’anoona fo daan in, saax leeke fo sis fo suum a ndaxritaa.› »

¹⁶«Xaye o Yaal oxe Roog nuun kaa hebil a nuun, nu ngay bargal keene fo kebil keene. Fat nu ngay ndax nu ndeef a den na qeeñ nuun fop fo na xa laaw nuun fop.

¹⁷Xaye nu mbeedna yee o Yaal oxe refu Roog nuun, too xan nu ñaaƴ na ƭat um, ndeef ke ta dalinna fo kebil ke ten fo bargal ke ten soo nanan o ñuxur um.

¹⁸Xaye o Yaal oxe kaa lay a nuun ee nuun ndefu xeet fee ta jegoodna, ne ta laytuuna a nuun, too nu mbara ngay kebil ke ten fop.

¹⁹Neene, xan o Yaal oxe Roog nuun a ci a nuun nu ngup qeet ke ta sakna fop, ndax nu simatin, ci’in o jeg gon, ndef qaaƴoor um soo ndef xeet faa ta kesaneena, ne ta laytuuna a nuun.»