Read NQAARIIT NE ROOG A cangatin ale 28 Bible Online

A cangatin ale 28 - NQAARIIT NE ROOG bible

A cangatin ale 28

¹«Boo nu nananna a paax o ñuxur ole no Yaal oxe Roog nuun, ngay ndax nu ndeef kebil ke ten fop um cooxaa a nuun xaye, xan o Yaal oxe Roog nuun a ci a nuun, nu ngup qeet ke no lanq ke fop.

²Neeke nu mbarke’itkeel, ta sax na nuun, yaa nu nananna o ñuxur ole no Yaal oxe Roog nuun:

³Xan nu mbarke’el kam teeru ke, mbarke’el na koƥ ale.

⁴Xan xa ƥiy axe ngatna no laaw nuun fo ke lanq ke nuun a mbatna a mbarke’el. Xan xa siir axe nuun fo a ked ake nuun a mbarke’el, a may fo xa qeel fo fo mbote.

⁵Xan a cenjel ake nuun fo xa qiiwir axe nuun a mbarke’el.

⁶Xan nu mbarke’el a koƥ oo mbind oo.

⁷Xan o Yaal oxe a ci a nuun o ndam, yaa fañ we nuun a songkaa a nuun. A yaj a leng a mbi’kaa, yaa da songiidaa a nuun, soo a pictoor a yaj ɓetaa ƭaq, a ngod o joor.

⁸Xan o Yaal oxe a barke tap ke nuun, a barke a nuun no kuu nu ndokna. Kaam ee xan o Yaal oxe Roog nuun a barke a nuun kam saax le ta ci’na a nuun.

⁹Nu ndeefangaa kebil ke no Yaal oxe Roog nuun, ñaaƴ na ƭat um, xan a fi a nuun xeet faa ta kesaneena, ne ta daaɓoortuuna fa nuun.

¹⁰Xan qeet ke no lanq ke fop a nga ee kaa nu kesanel o Yaal oxe, too xan a saɗar a nuun.

¹¹Xan o Yaal oxe a mayƭand a nuun fo paax ƥor, a ci a nuun xa ƥiy xa mayu, a mayƭand xa siir axe nuun fo ke lanq ke nuun a mbatkaa no saax le ta daaɓooxna fo daan nuun ee xan a ci’in a nuun.

¹²Xan o Yaal oxe a wetan a nuun pand ke ten ndefna na asamaan, a deɓaniid saax le nuun na waxtu um soo a barke fop ke xa ƥay nuun a njalna. Xan nu ndawin qeet mayu too nu ndawkee.

¹³Xan o Yaal oxe a fi a nuun xoox, too nu ndefkee a las muk. Kaa nu yoɗooxkaa took kili, ndaa nu mbudooxkee a lanq muk, yaa nu nananna kebil ke no Yaal oxe Roog nuun um daawnaa a nuun xaye, soo ngay ndax nu ndeef a den.

¹⁴Ba nu ƭap na ñamaak mbaat na janoon no kebil ke fop um cooxaa a nuun xaye, soo sooboox no mbaɗooxaa roog lakas.»

¹⁵«Kaa koy, nu nananangee o ñuxur no Yaal oxe Roog nuun, mbañ o ngay ndax nu ndeef kebil ke fo bargal ke ten fop um cooxaa a nuun xaye, xan a salax akeeke fop a ndal a nuun:

¹⁶Xan nu ngalakoox kam teeru ke, ngalakoox na koƥ ale.

¹⁷Xan a cenjel nuun fo xa qiiwir axe nuun a ngalakoox.

¹⁸Xan xa ƥiy axe ngatna no laaw nuun fo ke lanq ke nuun a mbatna a ngalakoox. Xan xa siir axe nuun fo a ked ake nuun a ngalakoox, a nqat.

¹⁹Xan nu ngalakoox a koƥ oo mbind oo.

²⁰No kuu nu ndokna rek xan o Yaal oxe a hebliid took nuun o halakax fo o jaq fo o njaaxɗataand, boo yaa ta saŋikna a nuun, a moocand a nuun boo tus yaam a pi a paaxeer ake nuun fo ne nu nqaƴuuna.

²¹Xan o Yaal oxe a doon a nuun piste, boo yaa ta moocandkaa a nuun no saax le nu ndokkaa ndax nu njegkin.

²²Xan o Yaal oxe a xawit a nuun jir laa na ŋeesaa, a sumaan fo ɗoy xaral. Xan a hebliid me nuun mbooyo fo o feñ, xa ƥuus fo xa qomb boo yaa nu moockaa.

²³Asamaan fee yoorooxna a nuun xan a naag kaŋ nen xanjar, soo lanq ke nu ndakaa a mbeer koroŋ nen njelem.

²⁴O Yaal oxe deɓaniidkee a nuun lakas, a refangee fo ut fo lanq, da yenaa took nuun boo yaa nu saŋkooxna.

²⁵Xan o Yaal oxe a ci fañ nuun o ndam took nuun. A yaj a leng nu mbi’kaa, yaa nu songkaa a den, soo pictoor a yaj ɓetaa ƭaq, ngod o joor. Xan maat ke no lanq ke fop a njaaxiɗ yaa da nga’kaa ke dalna a nuun.

²⁶Xa tal nuun xan a ndefik ñaamel a tud ake fo ƥaaɓaan ke no lanq ke, too o leng fiiqilkee a den.

²⁷Xan o Yaal oxe a xawit a nuun a ur ake Misira fo xa tul fo a tilaƥaal fo bej kaa mbaageerna o mbod.

²⁸Xan o Yaal oxe a xawit a nuun ƭof fo mbuulaanaq fo o ngulmandaan,

²⁹nu naƥnaa njoloor o mbuc nen yaa ta reeƭna no niɓaan ne o puul a naƥnitaa, too nu ƭaaykee no yuuƥ ke nuun. Xan nu toroxandeel ñaal nuu refna, njangaleel, too o leng ƴufgiidkee a nuun.

³⁰O leng na nuun a jegangaa o toog, xan o koor o lakas a gignin. Xan nu max pind, ndaa nu ngenkee a den. Xan nu njimb taxar biiñ, ndaa nu muudoorkee a den.

³¹Xan qoox ke nuun a mbarel na kid nuun, too nu ñaamkee teen, xa paam nuun a njaɓeel nu ƭeetaa, too nu ndakinkaand a den, a ked ake nuun a ƥoxotel fañ nuun, too o leng ƴufgiidkee a nuun.

³²Xan xa ƥiy nuun xa koor fo xa tew a ƥoxotel na xa ƥay no qeet lakas ke na kid nuun, nu ƈooklooxaa a den ñaal oo ñaal, too nu mbaagkee teen tig.

³³Xeet faa nu andeerna xan a ñaam ke lanq ke nuun a mbatna fo jale le nuun fop, soo nu ngen no toroxandeel, ñaatlandeel.

³⁴Yaa keene fop a dalkaa a nuun, xan ƭof a rok a nuun.

³⁵Xan o Yaal oxe a xawit a nuun a ur akaa mbaagkeerna o mbod no kuɓay nuun fo na ñaal nuun, da nqay no cer nuun fop no ke xotitna no nqol mbangdir ne boo no ƭuf ne.

³⁶Xan o Yaal oxe a ñaaƴnoor a nuun, nuun fo o maad oxe nu ndalnankaa a qoox nuun, farna fa xeet faa nu andeerna, daan nuun and’iran, soo nu mbaɗooxaa maaga roog lakas kaa ndefna a teex fo a ƥil.

³⁷No qeet ke o Yaal oxe a ɓiskaa a nuun fop koy, xan da ndam xa ton no ke na dalkaa a nuun, a naxoortaa a nuun soo a nqaadnooxaa a nuun.

³⁸Xan nu nduuf ax mayu na xa qol nuun, ndaa o ndik rek nu saxadkaa teen, yaam tooroog ke xan a nduudnin.

³⁹Xan nu njimb a ƭing taxar biiñ, nqoox a den, ndaa nu ƥoorkee a den too nu yerkee biiñ fee, yaam xan kusax ke a ñaam a den.

⁴⁰Xan nu njeg taxar oliiw muu refna kam saax le nuun, ndaa nu njegkee o ndiwliin onqaa nu ƭuumooxna, yaam xan a ƥooroox bo da ngelko fo mbooraa.

⁴¹Xan nu njeg xa ƥiy xa koor fo xa tew, ndaa xan nu ñak a den, yaam xan a ƥisel gilaa saax took o hup doole.

⁴²Xan yet ke a yaq taxar ke nuun fop fo ke lanq ke nuun a mbatkaa.

⁴³Xan xa kataakoon axe a ndeer nuun a moƴ a moƴ o ngupaa a nuun, soo nuun o mat, nu moƴ-a-moƴ o neewaa a den.

⁴⁴Xan a ndawnaa a nuun, ndaa nu ndawinkee a den. Den na mbugko ndefaa xoox le, nu ndef a las ale.

⁴⁵Xan a salax akeene fop a ndal took nuun, a ndeef a nuun boo yaa nu moockaa, yaam ne nu nanankeerna o ñuxur no Yaal oxe Roog nuun, ndax nu ndeef kebil ke ten fo bargal ke ten, ta cooxna a nuun.

⁴⁶Yaa keene a dalkaa a nuun, nuun fo xa taan nuun, xan fop a nga ee a salax ake Roog yenu took nuun.

⁴⁷Yaaga boog, nu ndagooxangee o Yaal oxe Roog nuun fo o ɗaay fo xeeñ letu, yaa fop nuun a naatna,

⁴⁸xan nu ndagooxaa fañ nuun we o Yaal oxe a ɓisaniidkaa a nuun. Xan nu nqeexel, ngoɗomel, ƥangdel, ñak fop. Xan o Yaal oxe a gadin a nuun kadoor njelem, boo yaa ta moocandkaa a nuun.

⁴⁹Xan o Yaal oxe a inantiid a nuun koƭu no cat adna xeet faa na dalitkaa took nuun nen a canjiik. Xeet feene xan a ndef xeet faa nu nankeerna lak den,

⁵⁰xeet faa a tagid ake a ngiɓooxkaa, too niwkee o nogoy oxe, yirim o njaaƈ ne’aand.

⁵¹Xan da muudoor xa siir axe nuun fo ke lanq ke nuun a mbatkaa, boo yaa nu moockaa. Nqaƴankee a nuun bele mbaat biiñ fa nqas mbaat diwliin mbaat xa qeel axe mbaat fo mbote ne, boo yaa da moocandkaa a nuun.

⁵²Xan a mbid teeru ke nuun fop o kurul-keƥ, boo yaa saŋe cegu doole ke nuun nu ngoolooxna kam saax le fop a njiƭtooxna. Xan a ƥiikil a nuun kam teeru ke nuun fop, muu refna no saax le o Yaal oxe Roog nuun a ci’na a nuun.

⁵³Kam naqad fee fo o ñaat ole fañ nuun a ƥekkaa a nuun xan nu ñaam xa ƥiy axe na ngatkaa no laaw nuun, ƈax cer na xa ƥiy nuun xa koor fo xa tew axe o Yaal oxe Roog nuun a ci’kaa a nuun.

⁵⁴O koor oxe moƴna o yokoox a ndeer nuun sax, a moƴ o jeg o liir, xan a ɗeetaa a ngid a pariƴ o pog um ŋaƈit mbaat o teem oxe ta fexna fex fo we na yoqkaa na xa ƥeem,

⁵⁵yaam a fañaa o ci o leng na den no cer ke na xa ƥeem ta fi’na ñaamel. Xan a fi keene, yaam jegkatee dara kam naqad fee fo o ñaat ole fañ nuun a ƥekkaa a nuun kam teeru ke nuun fop.

⁵⁶O tew oxe moƴna o yokoox a ndeer nuun, a moƴ o giñ, a ham a xoox um boo bugee dak o jaf um a lanq, xan a ɗeetaa a ngid a pariƴ o kor um oxe ta fexna fex, o ƥeem o ngoor fo o ƥeem o ndew,

⁵⁷yaam a fañaa o ci o leng na den no nqeq onqe ta sogkaa o ñoot fo o yoon oxe, ndax ta ñaamin ten soom na pet. Xan a fi keene yaam naqad fee fo o ñaat ole fañ nuun a ƥekkaa a nuun kam teeru ke nuun fop.

⁵⁸Nu ngayangee ndax nu ndeef fa lay feeke fop no kebil ke mbindeena no safe lene, mbañ o saɗar gon maak saɗarnooxu le no Yaal oxe Roog nuun,

⁵⁹xan o Yaal oxe a xawit a nuun, nuun fo xa taan nuun, taamaala maak kaa na miñkaa fo a cir a ƭomu kaa mbodkeerna.

⁶⁰Xan a ɓisiid took nuun a cir ake Misira fop nu ndiidoogna, too xan a ndam a nuun,

⁶¹too sax xan o Yaal oxe a hebliid took nuun a cir fo taamaala kaa laytaandeena no safe lene no kebil ke, boo yaa nu saŋkooxna.

⁶²Ke nu mayitna nen xa qoor axe na asamaan fop oo, xan nu yoqat o ndik o njaakeer, yaam ne nu nanankeerna o ñuxur ole no Yaal oxe Roog nuun.

⁶³Ne o Yaal oxe a sawaritna no fi’an a nuun paax soo a mayƭand a nuun, neene a sawaritkaa no saŋik a nuun, a moocand a nuun. Saax le nu ndokkaa ndax nu njegkin, xan nu mbuurtel teen,

⁶⁴soo o Yaal oxe a pasar a nuun a ndeer qeet ke fop, xotitna no cat adna boo no cat lakas. Xan nu ndagooxaa maaga roog lakas kaa nu andeerna, daan nuun and’iran, roog kaa ndefna a teex fo a ƥil.

⁶⁵Nu njegkee jam a ndeer qeet keene, too nu njegkee sen maa nu yaadoorna. Xan o Yaal oxe a fagiɗ kam nuun, a kid nuun a niifaar, xa laaw nuun a ndalaƭar.

⁶⁶Xan o ñis nuun a ref no xoƥ nquƭ, nu sendaa ñaal fo yeng, fa nqon a ɓeedaa a nuun.

⁶⁷Kam caƭar ne nu njegkaa na qeeñ nuun yaam ke nu nga’kaa, xan nu layaa nqes ee: ‹A reeƭangaa kirand ne rek!›, soo kirand ne nu lay ee: ‹A reeƭangaa nqes ne rek!›

⁶⁸Xan o Yaal oxe a ɓek a nuun na kaal ake, a nomit a nuun Misira, no saax le ta lay’ina a nuun ee nu nga’katiran muk. Xan nu njikooxaa a qoox nuun maaga, goor fo rew, me no fañ nuun nen faɗ. Kaa koy, nu nga’kee o leng oxaa jikna a nuun.»

⁶⁹Keeke refu xa ƭelem axe no ngiɓoor ne o Yaal oxe a hebil’ina a Moyiis, ta dalnin fo Ii-isra’el we no saax laa Mowaab, fogreerna fo ngiɓoor ne ta dalin’ina fa den no joong olaa Horeb.