Read NQAARIIT NE ROOG A cangatin ale 29 Bible Online

A cangatin ale 29 - NQAARIIT NE ROOG bible

A cangatin ale 29

¹Moyiis a xoya Ii-isra’el we fop, a lay a den ee: «Nu nga’ooda fop ke o Yaal oxe a fi’na kam saax laa Misira, ke ta fi’na a Firawon fee fo dag um fo saax um fop.

²Nu nga’a coono ƭomu keene fo xa anddiloor axeene fo comlaand maak keene.

³Kaa koy, boo fa ndiik o Yaal oxe ci’afulee a nuun yiif laa nu anditna mbaat a kid akaa nu nga’itna mbaat nof kaa nu nanitna.

⁴Ɗoxaam a nuun boo xa kiid qarɓeen nahik kam a koƥ-a-ƥor ale, too ñirax ke nu ndokooxna siɗooxee, xa ñaaƭ axe na caf nuun ñaamooxee.

⁵Nu ñaamee o mbuuru, too nu yeree biiñ mbaat a yer a qaaɗu lakas, ndaa koy o Yaal oxe a topatooxa a nuun, ndax nu and ee ten refu Roog nuun.

⁶Ye i mbadiidna no mbiñ onqene, Siihon fee o maad Hesebon fa Oog fee o maad Basan a sutooxaniida a in, ndax da ñoxor fa in, ndaa i nqawa a den.

⁷I njaɓa saax le den, cooxin Ruuruben we fo Gaagaad we fa genwal a carind ale Manaase, da njegkin.

⁸Fat nu ngay boog ndax nu ndeef fa lay fee no ngiɓoor neeke. Neene, xan nu suur no kuu nu ndokna.»

⁹«Xaye, nuun wey mbaambir no Yaal oxe Roog nuun, nuun fop, aa-adax we nuun, a carind ake nuun, maak we nuun, kelfa ke nuun, goor we Isra’el fop daal,

¹⁰xa teɓandoong axe nuun, rew we nuun fo xa kataakoon axe na ñoowaa a ndeer nuun me nu ndalna, a xotit no seeseɓ we nuun boo no we na ƈeewanaa a nuun.

¹¹Nuun wey ngeenooxa, ndax nu ndok no ngiɓoor fo o Yaal oxe Roog nuun, ngiɓoor naa saƭkinteena a taaƥ, too o Yaal oxe Roog nuun a hiɓan fa nuun xaye.

¹²Xan a dalin a nuun xaye, nu ndef xeet um, soo ta ref Roog nuun, ne ta regtuuna a nuun fo ne ta daaɓoortuuna fo daan nuun Abraham fa Isaak fa Yakoob.

¹³Refee yee fa nuun doŋ ngiɓoor nene a dalinkeel.

¹⁴Xan a dalnel fo we ndefna meeke fop xaye, a ngeenoox mbaambir no Yaal oxe Roog in, a dalnel itam fo xa taan axe in ndimafulaandeena.

¹⁵Nu anda ne i ngenit’ina kam saax le Misira fo ne i nqaañitna a ndeer no qeet ke boo mbadiid mene.

¹⁶Nu nga’a pangool cakalaaru ke den mbi’teena a teex fo a ƥil, xaaliis fa wurus.

¹⁷Baa ta jeg a ndeer nuun we ndefna mene xaye o koor mbaat o tew mbaat a qaw mbaat a carind alaa xeeñ um a fesna o Yaal oxe Roog in a cinj, ndax ta faɗook roog ke no qeet keene. A jegangaa a ndeer nuun, xan a ref nen a paƴ alaa na saxaa, a rim xa tim ndali, a ref nen ndoxar.

¹⁸Ba o leng boog a nan fa lay feeke boo a ƴut no ngiɓoor ne saƭkandteena a taaƥ soo a magnandooxaa no xeeñ um ee: ‹Xam ref na jam kañ, a soƥangaa sax ee kaam reefaa ke xeeñ es a yuxmaa.› Keene xan a garit a saŋkax no fop, faax oo, faaxeer oo.

¹⁹O Yaal oxe bugkee waasan oxeene kiin, ndaa fuux le fo naal ne ten xan a mbiltooxanin, too a salax ake fop mbindeena no safe lene xan a ndal took um, soo o Yaal oxe a ñuf gon um took lanq ke.

²⁰Xan o Yaal oxe a xaajin fo a carind ake Isra’el fop, a doonin naqad, a reefandin na salax ake fop no ngiɓoor ne bindeena kam safe lene no kebil ke.»

²¹«Suk ke na ngaraa, xa taan nuun axe na ndimkeel a cinj nuun fo xa kataakoon axe na inoorkaa no saax goƭu xan a nga taamaala ke fo a cir ake o Yaal oxe a xawitkaa saax leeke,

²²a nga suufur[12] fo fo jem ole fo fiɗel le raaɓna saax le fop. Dara waagaand o duuf teen, o saxin teen tig ne’aand, daaƭ leng sax waagaand o ga teen. Xan a muukoor nen a Sodoom fa Gomoor fa Adma fa Seboyiim ndefna teeru ke o Yaal oxe a gef’ina tuƈ kam fuux um fo ngañak um.

²³Maaga, xan qeet ke fop a lay ee: ‹Xar taxu o Yaal oxe a fi neeke saax lene? Xar gartu fuux maak ɗomu lene?›

²⁴Xan a ndoonel ee: ‹Ke taxuuna refu yee kaa ndeɓ ngiɓoor ne o Yaal oxe Roog fee no daan den a dalin’ina fa den a cinj ye ta sutna a den no saax le Misira,

²⁵a mbaɗook roog lakas, a ngungaa mbaambir den, roog kaa da and’eerna, too o Yaal oxe a xañit’u a den, da mbaɗooxaa a den.

²⁶Ten taxu fuux le no Yaal oxe a biltooxan saax lene, soo ta doonin a salax ake mbindeena kam safe lene fop.

²⁷O Yaal oxe kaa fuurit a den no saax den yaam fuux ɗomu um fo ngañak um soo a deɓ a den no saax lakas, ne i nga’tuuna xaye.›

²⁸O Yaal oxe Roog in jegu ke ɗasna, i njeg ke i mbeeñleena, refna fa lay fee no kebil kene i mbarna o ngay, in fo xa ƥiy in boo kili.»