Read NQAARIIT NE ROOG A cangatin ale 3 Bible Online

A cangatin ale 3 - NQAARIIT NE ROOG bible

A cangatin ale 3

¹«Cinj kaaga, i puloox’a soo njang a ƭat ale Basan. Oog fee o maad Basan fo xiixire um fop a sutooxaniida a in soo a nqire’it fa in Edari.

²Maaga, o Yaal oxe a lay’axam ee: ‹Ba o saɗarin, yaam xam ɓoxotin na xa ƥay of, ten fo xiixire um fo saax um fop. Fat o fi’in ne fi’oona a Siihon fee o maad no Aa-amori we, gen’ina Hesebon.›

³O Yaal oxe Roog in a ɓoxota boog a Oog fee o maad Basan fo xiixire um fop na xa ƥay in. I nqawa a den, too i nqaƴee o leng ta ñoow.

⁴Na waxtu faaga i njaɓa teeru ke ten fop. Jeg’ee teeru um fa leng faa i njaɓeerna. A ndeeƭa teeru qarɓeen ɓetuu fa leng no fiisel ole Argob kam Basan me Oog a maadooxoogna.

⁵Teeru keene fop koy kaa njeg’u saŋe ciig, a njeg begax fo a kinglir, fogreerna fo teeru mayu cegee saŋe ke.

⁶I ngefa tuƈ teeru keene fop, mbar goor we fo rew we fo xa caaƈ axe, ne i mbi’it’uuna no saax le Siihon fee o maad Hesebon.

⁷Kaa koy, i njangala cegel ke fo kalal lakas ke i soƥna no teeru keene.»

⁸«Neene i njaɓit’u na jamaane faaga xa piisel axe no maad ɗik weene no Aa-amori we, ngarit’ina no batand ne Yordaan, a ndef ndeer o xuluɓ ole Arnon fo o joong ole Hermon.

⁹Siisidoŋ we kaa nqoyoogu a Hermon Siryoŋ, soo Aa-amori we a nqoyan Seniir.

¹⁰I njaɓa teeru ke na ñaang ake fop fo o fiisel ole Galaad fop fo ole Basan fop boo Salka fa Edari. Teeru keene fop no maat ne Oog kam Basan a mbog’u.

¹¹Oog fee o maad Basan doŋ yoq’u no Reerefa we. Kees njelem ne ta gastik’eena oxaa Raba no saax le no Aa-amon we boo ndiik, too o cigdel um a fi’a xa noonoong ɓetaa nahaq, soo o yaajel ole a fi xa noonoong xa nahaq no noonoong no kiin.

¹²Na jamaane faaga i njaɓ’a saax leene. Coox’aam Ruuruben we fo Gaagaad we o fiisel ole garitna no ɓemb-roog o janoon ole Aroweer paam o xuluɓ olaa Arnon fa genwal fee no jegel ole na xa coong axe Galaad fo teeru ke ten.

¹³Coox’aam genwal fee na carind ale Manaase ke yoqna na Galaad fo maat ne Oog fop kam Basan, refna ref o fiisel ole Argob fop fa Basan fop na nqoyeel saax le no Reerefa we.

¹⁴Ya’iir fee o ndaan Manaase a jaɓ’a o fiisel ole Argob fop boo no ŋat olaa no Geegesuur we fo Maamaaka we. A ne’ta a xoox um o saax oleene na Basan, too xa taland axe Ya’iir a maadu o nqoyeel boo no ñaal roog ne xaye.

¹⁵Coox’aam a Makiir o jegel ole Galaad,

¹⁶Ruuruben we fo Gaagaad we, um coox a den o fiisel ole xotitna Galaad boo no xuluɓ olaa Arnon refna o ŋat ole no ɓemb-roog o ñamaak, a suur boo no xuluɓ olaa Yabok no ɓemb-roog o janoon refna o ŋat ole no Aa-amon we.

¹⁷O ŋat ole den no mudand kaa reefan xa saawit axe Yordaan ndeer o maag o maas ole Genesaret fo o maag o Xanju laa, a ret boo na caf alaa no joong olaa Pisga refna no batand.

¹⁸Na jamaane faaga, lay’aam a nuun ee: ‹O Yaal oxe Roog nuun a ɓoxota a nuun saax lene, ndax nu njegkin. Ndiiki koy, nuun goor we mbaagna o ndet na xire fop, mbapooxanyo a ñoq, njoot a Yordaan soo adooxan fog nuun Ii-isra’el we.

¹⁹Rew we nuun fo xa ƥiy axe nuun fo cegel mayu ke nuun doŋ na yoqkaa no teeru kene ci’uuma a nuun,

²⁰boo yaa o Yaal oxe a ci’kaa fog nuun a ñootnax, ne ta ci’tuuna a nuun, da ndaaw, den itam, saax le o Yaal oxe Roog nuun a ci’na a den no mudand ne Yordaan, cinj kaaga, nu nomtooxiid mene, oxuu refna na nuun no lanq ke ci’anuuma.›

²¹Na jamaane faaga, lay’aam a Yosuwe yee: ‹Ga’oodaa fop ke o Yaal oxe Roog nuun a fi’na maad ɗik weene. Neene mat o Yaal oxe a fi’kaa maat ke o soƥkaa no mudand ne Yordaan fop.

²²Ba nu saɗar a den, yaam o Yaal oxe Roog nuun fa xoox um na ñoxorankaa a nuun.› »

²³«Na jamaane faaga, xeɗoox’aam o Yaal oxe yee:

²⁴‹Wo o Yaal oxe na refkaa boo faw, woxey lalaxam, mi fee o tag of, o magnel of fo o ɓay o jegu katil ole wo. Jegee na asamaan mbaat took lanq ke a Roog faa waagna o fi a pi a maak ake o fi’aa.

²⁵Ci’aam um xaañ o xuluɓ ole, ndax um ga saax faaxu lene no mudand ne Yordaan, xa coong xa mosaan axaaga fo axe Libaŋ.›

²⁶Kaa koy, o Yaal oxe a fuuxanaxam yaam nuun soo a fañaam o nan-giloox. A layaxam ee: ‹A deya, ba o ne’ataam kaa farna no keene!

²⁷Ŋaayi no jul ole no joong ole Pisga, o ɗeet no mudand fo no ɓemb-roog o janoon fo no ɓemb-roog o ñamaak fo no batand. Horooxeen a paax, yaam jootkiro a Yordaan fene.

²⁸Fat o jangin a Yosuwe, saƭakinin soo ɓaatin njambaar, yaam ten na adooxankaa Ii-isra’el we, a xaajrand a den saax le o ga’kaa.›

²⁹No kaa xotitna a koom, i yoqa mene na yulanq ale jasnoorna fa Bet-Pe’oor.»