Read NQAARIIT NE ROOG A cangatin ale 30 Bible Online

A cangatin ale 30 - NQAARIIT NE ROOG bible

A cangatin ale 30

¹«Yaa tig oo tig keene fop a ndalkaa a nuun, barke fee fo a salax ake doonuuma mbaambir nuun, yaaga xan nu ƥaalaa a den kam a qeeñ nuun a ndeer qeet ke fop o Yaal oxe Roog nuun a pasarkaa a nuun.

²Nu nomtooxiidangaa no Yaal oxe Roog nuun, nuun fo xa ƥiy nuun, nanan o ñuxur um na qeeñ nuun fop fo na xa laaw nuun fop, ndeefandin no fop ke um heblaa a nuun xaye,

³yaaga, xan o Yaal oxe Roog nuun a yirim a nuun, a supit o roxanqol nuun soo a fokattiid a nuun ahin a ndeer qeet ke ta pasar’ina a nuun fop.

⁴Nu ƥisange gilaa saax took o hup doole boo no cat adna sax oo, xan o Yaal oxe Roog nuun a fokattiid a nuun maaga, a xottiid a nuun maaga.

⁵Xan o Yaal oxe Roog nuun a nomtiid a nuun no saax le daan nuun a njeg’ina soo nu njegatin. Xan a fi’an a nuun paax, a mayƭand a nuun boo nu moƴ o may daan nuun.

⁶Xan o Yaal oxe Roog nuun a xuc a qeeñ nuun fo ake na xa taan nuun, too xan nu mbex o Yaal oxe Roog nuun na qeeñ nuun fop fo na xa laaw nuun fop. Neene, xan nu ñoow,

⁷too xan o Yaal oxe Roog nuun a maaf a salax akene fop took no fañ nuun fo we sibna a nuun, a ñagadilaa a nuun.

⁸Nuun o mat, xan nu nomtooxiid no Yaal oxe, nanan o ñuxur um soo ngay kebil ke ten fop um cooxaa a nuun xaye.

⁹Xan o Yaal oxe Roog nuun a mayƭand a nuun fo paax, a faaxin jale nuun fop, a fi bo nu ƥasil, a salin xa siir nuun, a barke ke lanq ke nuun a mbatkaa, yaam xan o Yaal oxe a sawarahin no ɗaaynoor a nuun, ne ta sawarit’ina no ɗaaynoor daan nuun.

¹⁰Kaa koy, boo keene waagaa jeg, nu mbara o nanan o ñuxur ole no Yaal oxe Roog nuun, ndeef kebil ke ten fo bargal ke ten mbindeena no safe lene no kebil ke, nomtooxiid no Yaal oxe Roog nuun na qeeñ nuun fop fo na xa laaw nuun fop.»

¹¹«Fa lay fee no kebil kene um cooxaa a nuun xaye meɗee na nuun too goƭee a nuun.

¹²Refee na asamaan, ndik nu lay ee: ‹An na ŋaayankaa a in na asamaan, a xotankin a in soo a nannoorin a in, ndax i ndeefin?›

¹³Refee kaltaa o maag ole, ndik nu lay ee: ‹An na jootankaa a in o maag ole, a xotankin a in soo a nannoorin a in, ndax i ndeefin?›

¹⁴Fa lay feene kañ oxey ruk paam nuun, too oxey na xa ton nuun sax fo na qeeñ nuun, ndax nu ndeefin.»

¹⁵«Nga’yo, mexe doonaa mbaambir nuun xaye o ñoow ole fo fa nqon fee, paax fo paaxeer.

¹⁶Nu ndeefangaa kebil ke no Yaal oxe Roog nuun um cooxaa a nuun xaye, mbexin, ngay bargal ke ten fo ke ta simitna, ñaaƴ na ƭat um, xan nu ñoow. Xan o Yaal oxe Roog nuun a barke a nuun kam saax le nu ndokkaa ndax nu njegkin, a mayƭand a nuun.

¹⁷Kaa koy, boo a qeeñ nuun a mbesna o Yaal oxe a cinj, nu mbañ o nananin, sooboox no ngungaa mbaambir roog lakas ke, mbaɗooxaa a den,

¹⁸mexe layaa a nuun xaye yee xan nu saŋkoox tigi. Nu nquuɗkee kam saax le refna kaltaa o xuluɓ ole Yordaan me nu ndokkaa ndax nu njegkin.

¹⁹Xaye mexe xotaa asamaan fo lanq, da ndef seede ndeer es fa nuun ee doonaam mbaambir nuun o ñoow ole fo fa nqon fee, barke fo a salax. Njilyo o ñoow ole, ndax nu ñoow, nuun fo xa taan nuun.

²⁰Mbexyo o Yaal oxe Roog nuun, nanan o ñuxur um soo ndamoox no ten, yaam no keene o ñoow nuun fo o xuuɗ-o-ñis nuun a ngaɗooxu, too neene nu mbaagkaa o ngenit kam saax le o Yaal oxe a daaɓooxna fo daan nuun Abraham fa Isaak fa Yakoob ee xan a ci’in a den.»