Read NQAARIIT NE ROOG A cangatin ale 31 Bible Online

A cangatin ale 31 - NQAARIIT NE ROOG bible

A cangatin ale 31

¹Moyiis a layahina Ii-isra’el we fop a ƭelem akene:

²«Me ta refna, jegaam xa kiid teemeed fo xa kiid qarɓeen ƭik. Waagatiim o retaa garaa, too o Yaal oxe a layaxam sax ee: ‹Xaañkiro o xuluɓ ole Yordaan.›

³Xan o Yaal oxe Roog nuun fa xoox um a adooxan a nuun, a saŋik qeet ke mbaambir nuun, nu njegat lanq ke den, too xan Yosuwe a ɗox a nuun, ne o Yaal oxe a laytuuna.

⁴Xan o Yaal oxe a fi qeet keene ne ta fi’na a Siihon fa Oog, maad we no Aa-amori we, ta saŋikna, den fo saax den.

⁵Xan o Yaal oxe a ɓoxot a den na xa ƥay nuun, too fat nu mbi a den fop ke hebluuma a nuun.

⁶Saƭakinooxyo too saq njambaar. Ba nu saɗar too ba nu send mbaambir den, yaam xan o Yaal oxe Roog nuun fa xoox um a ñaaƴ fa nuun. Xaƴkee a nuun muk too waaskee a nuun.»

⁷Cinj kaaga, Moyiis a xoya a Yosuwe soo a layin mbaambir Ii-isra’el we fop ee: «Saƭakinooxi too saq njambaar, yaam wo na rokinkaa xeet feeke kam saax le o Yaal oxe a daaɓooxna fo daan in ee xan a ci’in a den, too wo o mat na lasrankan a den.

⁸O Yaal oxe fa xoox um sax xan a adooxanong too xan a ref fa wo. Xaƴkirang muk too deɓkirang. Ba o saɗar boog too ba o send.»

⁹Moyiis a binda kebil keene soo a cooxin saasadax we ndefna xa taan Lewi saqoogna arka ne no ngiɓoor ne no Yaal oxe fo maak we Isra’el fop.

¹⁰Moyiis a hebla a den ee: «Na xa kiid ɓetaa ƭaq axuu ndefna, no hiid ole no baasanit ne na xa lad axe, na Xew fee no ƭiif ke,

¹¹yaa Ii-isra’el we fop a ngarkaa, a ngeenoox mbaambir no Yaal oxe Roog nuun no mbiñ onqe ta jilkaa, fat nu njang kebil keene no nof no Ii-isra’el we fop.

¹²Fat nu mbokat xeet fee, goor we fo rew we fo xa caaƈ axe fo xa kataakoon axe na ndefkaa a ndeer nuun, ndax da nan soo a aqatoox o saɗar o Yaal oxe Roog nuun, a ngay ndax da ndeef fa lay fee no kebil keene fop.

¹³Neene, xa ƥiy nuun axe andkafuleeruuna xan a nanin soo a aqatoox o saɗar o Yaal oxe Roog nuun no ñoow o ñis den fop kam saax le nu njangkaa, yaa nu nqaañna a Yordaan.»

¹⁴O Yaal oxe a laya a Moyiis ee: «Bes fee o xonkaa a matiida. Xoyi a Yosuwe, nu ngeenoox kam Ƭiif ne um xetteel, too xam heblin ke ta warna o fi.» Moyiis fa Yosuwe a ndeta, a ngeenoox no Ƭiif ne o Yaal oxe a xetteel.

¹⁵O Yaal oxe a feeñooxa no Ƭiif naa kam eel laa geenooxna no ndokand ne.

¹⁶O Yaal oxe a laya a Moyiis ee: «Ndiiki, xan o dab daan of, too xan xeet feeke a inoox, a ngore’aƭar na mi, a ƭeg ngiɓoor es fa den. Xan a mbaasaam, a mbaɗooxaa roog lakas ke kam saax le da ndokkaa.

¹⁷A koom, xan fuux es a biltooxan a den, um waas a den soo ɗasin a den mukit es. Xan a ndefik muud no qeet lakas ke, coono fo naqad a sagoox a den. Maaga, xan da lay ee: ‹Ndax ne Roog in a refateerna a ndeer in taxu coono kene fop a ndalaa a in?›

¹⁸Mi o mat, xam ɗasin mukit es a koom yaam paaxeer ke da mbi’kaa fop, yaa da mbaɗooxaa roog lakas ke.

¹⁹Ndiiki koy, fat a kim alene a bindel, soo wo Moyiis, o aqatin Ii-isra’el we, fexey bo da moknin, too xan a kim alene a ref seede a ndeer es fo Ii-isra’el we.

²⁰Xam ɓis xeet feeke kam saax le daaɓooxuuma fo daan den ee xam ci’in a den, saax le fo sis fo suum a ndaxritaa. Xan da ñaam maaga boo a naang tem, a magin, cinj kaaga da nquruloox farna fo roog lakas, a mbaɗooxaa a den. Xan a nqeefaam soo a ƭeg ngiɓoor es fa den.

²¹Maaga, yaa coono fo naqad mayu a ndalkaa a den, a kim aleene xa taan den a mbeeckeerna muk xan a ref seede na den, yaam andaam sax ke da nqalaataa xaye bo um helko fo roknaa a den kam saax le reguuma a den fo a taaƥ.»

²²A koom, Moyiis a binda a kim alaaga soo a aqatin Ii-isra’el we.

²³O Yaal oxe a hebla a Yosuwe fee o ƥiy Nun ke ta warna o fi soo a layin ee: «Saƭakinooxi too saq njambaar, yaam wo na rokinkaa Ii-isra’el we no saax le daaɓooxuuma o ci’in a den. Mi fa xoox es xam ref fa wo.»

²⁴Ye Moyiis a ƴutna a pind ale no kebil keene kam safe,

²⁵a hebla Leelewi we na saqaa arka ne no ngiɓoor ne no Yaal oxe yee:

²⁶«Njangyo safe lene no kebil ke, nu ndoonin paam arka ne no ngiɓoor ne no Yaal oxe Roog nuun, too xan a ref meene na nuun nen seede.

²⁷Andaam o ɓoow nuun fo o saƭik xoox nuun. Nu siiknoorangaa fo o Yaal oxe kañ, ye maaduuma o ñoowaa a ndeer nuun, nam nu moƴkeerun o mbi’it, yaa xonuuma!

²⁸Mbokatyo mbaambir es maak we na carind ake nuun fop fo kelfa ke nuun. Xam lay a ƭelem akene no nof den, soo asamaan fo lanq a ndef seede es fa den.

²⁹Andaam o mat ee a cinj fa nqon es xan nu laawoox, ƭap a ƭat ale jooxuuma a nuun. No camaane ke na ngaraa xan sabab a song xa log nuun, yaam paaxeer ke nu mbi’kaa na kid no Yaal oxe, mbuuxnoortin ke xa ƥay nuun a njalna.»

³⁰Moyiis a laya no nof no Ii-isra’el we fop xa ƭelem axe na kim aleeke bo ta xet: