Read NQAARIIT NE ROOG A cangatin ale 4 Bible Online

A cangatin ale 4 - NQAARIIT NE ROOG bible

A cangatin ale 4

¹«Ndiiki koy, nuun Ii-isra’el we, nan-gilooxyo ndax nu ngay bargal ke fo kebil ke um jangnaa a nuun. Neene, xan nu ñoowaa soo njang saax le o Yaal oxe Roog fee no daan nuun a ci’na a nuun, nu njegkin.

²Nu ƥaatkee dara na fa lay fee um cooxaa a nuun, too nu mbatinkee teen tig itam, ndaa fat nu ngay kebil ke no Yaal oxe Roog nuun, ne um cooxtan a nuun.

³Nu nga’ooda ke o Yaal oxe Roog nuun a fi’na ye fa Baal-Pe’oor, a moocand na nuun fop we sooboox’ina na paɗax ale na Baal feene.

⁴Nuun we ndamooxna no Yaal oxe Roog nuun o mat, nuun fop nuun wey ñoowaa boo xaye.

⁵Nga’angyo, mexe jangnaa a nuun bargal fo kebil, ne o Yaal oxe Roog es a heblitaxama o ten, ndax nu ndeef a den a paax kam saax le nu ndokkaa, njegkin.

⁶Fat nu ngay a den ndax nu ndeef a den, yaam meene o and nuun fo o jeg-yiif nuun a refkaa na kid no qeet ke na nankaa bargal keene fop. Xan a lay ee: ‹Xeet fa maak fene mbaagee ñak o ndef xeet fa njegu o and too a njeg yiif!›

⁷Xeet fa maak fum njegu roog kaa matna a den, ne o Yaal oxe Roog in a matitna a in a mbanuu i ƈufginooxuuna?

⁸Xeet fa maak fum njegu bargal fo kebil kaa njofitna nen ke um cooxaa a nuun xaye?»

⁹«Kaa rek, mbootooxyo a paax too yetoox, yaam ndik nu mbeecit ke xewna too nu nga’oodin. No ñoow o ñis nuun fop baa keene a sutoox na yiif nuun, too fat nu mbetandooxin xa ƥiy nuun fo xa ƥiy na xa ƥiy nuun.

¹⁰Ba nu mbeecit ñaal ne nu ngeenoox’ina mbaambir no Yaal oxe Roog nuun maaga Horeb, ye o Yaal oxe a layaxama yee: ‹Fokati xeet fee mbaambir es, ndax um daawin a den fa lay es. Neene, xan da niwaam no ñoow den fop too xan a njangnin xa ƥiy den.›

¹¹Nu matiida soo ngeenoox na caf alaa no joong olaa. O joong ole koy kaa kaƥoogu, ƈulfaan ne inoor’ina ndeer ee ndeer o niɓaan ole fo no eel niɓu le a ret boo na asamaan.

¹²O Yaal oxe a layta fa nuun a ndeer fiɗel laa. Nu nana o ñuxur ole, ndaa nu nga’iran. O ñuxur doŋ nannooxoogu.

¹³A daawna a nuun ngiɓoor ne ten, refna kebil xarɓaxay ke nu mbarna o ngay, a bind a den took a alfa ƥil a ƭak.

¹⁴Na jamaane faaga, o Yaal oxe a heblaxam um aqatin a nuun bargal ke fo kebil ke, ndax nu ngay a den kam saax le nu ndokkaa, njegkin.»

¹⁵«Fat nu mbootoox a paax o mbeecit kene: Nu nga’ee a qalmas a leng no ñaal naa o Yaal oxe a layitna fa nuun a ndeer fiɗel laa took o joong olaa Horeb.

¹⁶Ba nu yaq a qoox nuun tee kaa nu mbi’aa nitaal mbaat samandaal naa nu mbaɗooxaa nen a Roog, ta saq o mem no koor mbaat o tew,

¹⁷o mem muumeen nuu ta waagna ref took lanq ke mbaat o mem ndiiƭ nuu ta waagna ref, a yetaa,

¹⁸o mem ƥood nuu ta waagna ref took lanq ke mbaat o mem liƥ nuu ta waagna ref no poofi ke.

¹⁹Nu ndaxaaƴooxangaa na asamaan fee, nga njeeƈ ne fo o nqool onqe fo xa qoor axe, tig oo tig ke na asamaan fop daal, baa riñ a nuun nu ngungaa mbaambir den, mbaɗooxaa a den. O Yaal oxe Roog kaa xaƴan qeet lakas ke fop no lanq ke a pi akeene.

²⁰Nuun o mat, o Yaal oxe kaa dam a nuun o ɓay, a sutit a nuun Misira, o saasnand njelem oleene, ndax nu ndef xeet faa ta jegoodna, ne nu ndeftuuna xaye.

²¹O Yaal oxe a fuuxanaxam yaam nuun, a daaɓoox ee jootkiim a Yordaan too rokkiim no saax faaxaan le o Yaal oxe Roog nuun a ci’na a nuun, nu njegkin.

²²Ten taxu no saax leeke um xonitkaa. Xaañkiim o xuluɓ ole Yordaan, ndaa nuun o mat xan nu nqaañin, njegik saax faaxaan leene.

²³Fat nu mbootoox a paax boog, yaam ndik nu mbeecit ngiɓoor ne o Yaal oxe Roog nuun a dalinna fa nuun, soo mbi nitaal roog, ta jeg o mem no fop ke ta xañitna a nuun,

²⁴yaam o Yaal oxe Roog nuun kaa ref fiɗel laa na raaɓaa, a ref Roog fa naalu.

²⁵Yaa nu ndokkaa no saax le regteena boo miñ teen, njeg teen xa ƥiy fo xa taan, ba nu yen na bakaad tee kaa nu mbi’anaa a qoox nuun nitaal roog kaa njegna o mem no kuu ta waagna waag o ref. Nu mbi’angaan kaa nu mbi’aa kaa faaxeerna na kid no Yaal oxe Roog nuun, mbuuxnooran.

²⁶Boo nu mbi’na bakaad feene, mexe maƭooxaa a nuun xaye, too asamaan fo lanq ndefu seede ke, yee nu ñakkee o sooƴ no saax le nu njegkaa no mudand ne Yordaan. Nu miñkee teen dara, too xan nu moocandel boo nqet.

²⁷Xan o Yaal oxe a pasar a nuun a ndeer qeet ke, nu ndefat o yoqatin o ndutuuñ na saax ake o Yaal oxe a ɓiskaa a nuun.

²⁸Xan nu mbaɗooxaa maaga roog kaa o ɓay no kiin a jalna, ta ref a teex mbaat a ƥil, andoona yee mbaagee o nga mbaat da nan mbaat da ñaam, ne’katiim tig a duñ a den.

²⁹Meene nu mbaaƭitkaa o Yaal oxe Roog nuun, too xan nu nga’in, yaa nu mbaaƭuuna na qeeñ nuun fop fo na xa laaw nuun fop.

³⁰Yaa keene fop a dalkaa a nuun, soo nu ndef na naqad, maaga no paktaand kaa xan nu nomtooxiid no Yaal oxe Roog nuun, nan-giloox o ñuxur um.

³¹O Yaal oxe Roog nuun koy kaa may yirmande too xaƴkee a nuun, moocandkee a nuun, weecitkee ngiɓoor ne ta dalnitna a taaƥ fo daan nuun.»

³²«Laamityo no kaa farna no ñaal peraand kaa, yaaga nu ndimafulaand, no kaa xotitna yaa Roog a sakna o kiin took lanq ke. Ƥaalyo ke xewna na adna fee, a xotit no cat boo no cat lakas. Ndax kaa magnitna neene a mosa o xew? Ndax kaa nandna neene a mose o nan?

³³Ndax a jega xeet faa nanna Roog a lay fa den a ndeer fiɗel, soo da maad o ñoowaa, ne ta xewitna fa nuun?

³⁴Ndax a jega a roog fa lakas faa mosna o jeem o suqit a xeet fa leng a ndeer xeet fa lakas, ne o Yaal oxe Roog nuun a fi’antuuna a nuun? Nu nga’ooda ne o Yaal oxe a sutitna a nuun Misira fo o ɓay um o jegu doole fo a naax um ale letnooxna na pexey a pi a saɗarnooxu kene: ƭeetlax fo xa anddiloor fo comlaand fa xire.

³⁵Nu ci’e boog o nga keene, ndax nu and ee o Yaal oxe doŋ refu Roog, too jegee fa lakas a refangee o ten.

³⁶A foda na asamaan, a nannoorong o ñuxur um, ndax ta jangnong. Took lanq ke, a ga’nooraang ƈulfaan fiɗel um, o nanit fa lay um a ndeer fiɗel le.

³⁷Yaam ne ta fex’ina daan nuun taxu ta jil a nuun we xa taan den a cinj den soo a sutit a nuun Misira fa katil fa maak um.

³⁸Xan a rax mbaambir nuun qeet kaa moƴna o magin a nuun, a moƴ o njeg a nuun doole, ndax ta dalin a nuun na saax den, a ci’in a nuun, nu njegkin, ne nu nga’tuuna xaye.

³⁹Xaye, andyo too ndam na qoox nuun ee o Yaal oxe refu Roog fee na asamaan, maaga took-ee-took fo took lanq ke, too jegee fa lakas.

⁴⁰Fat nu ngay bargal um fo kebil um ke um cooxaa a nuun xaye, ndax nu ƭaay, nuun fo xa taan nuun too nquuɗ no saax le o Yaal oxe Roog nuun a ci’na a nuun boo kili.»

⁴¹Maaga, Moyiis a kesa teeru tadik no saax o lakas ole Yordaan, farna fo batand,

⁴²ndax oxuu warna o kiin took taamaala too fañroogee fo ten a waag o jaɓnook na fa leng no teeru keene soo a mucil o ñis um.

⁴³Teeru keene ndefu Beseer na xa saawit axaa na koƥ-a-ƥor ale, a refan wiin we na carind ale Ruben, fa Ramot kam Galaad, a refan we na carind ale Gaad, fa Golan kam Basan, a refan we na carind ale Manaase.

⁴⁴Keeke refu a cangin ale Moyiis a daawinna Ii-isra’el we.

⁴⁵A daawna a den ke o Yaal oxe a dalinna fo bargal ke ten fo kebil ke ten, a cinj a sutax ale den Misira,

⁴⁶a soƥ da ndef no batand naa Yordaan na yulanq alaa jasnoorna fa Bet-Pe’oor kam saax le Siihon fee o maad no Aa-amori we, gen’ina Hesebon. Moyiis fo Ii-isra’el we kaa nqaw’un a cinj ye da sutooxna Misira.

⁴⁷A njaɓ’a saax um fo saax le Oog fee o maad Basan. Maad ɗik weene no Aa-amori we no batand ne Yordaan a maadooxoogu.

⁴⁸Ii-isra’el we a njaɓa o jegel ole xotitna Aroweer paam o xuluɓ ole Arnon boo no joong olaa Hermon na xoyeel a xoy Siyoŋ[4]

⁴⁹fo o jegel ole waxooxna o saax o lakas ole na xa saawit axe Yordaan fop no batand, a ret boo no maag o Xanju laa na caf alaa no joong olaa Pisga.