Read NQAARIIT NE ROOG A cangatin ale 5 Bible Online

A cangatin ale 5 - NQAARIIT NE ROOG bible

A cangatin ale 5

¹Moyiis a xoyna Ii-isra’el we fop, a lay a den ee: «Nuun Ii-isra’el we, nan-gilooxyo bargal ke fo kebil ke um daawnaa a nuun xaye. Aqatooxyo a den, ngay a den, ndax nu ndeef a den.

²O Yaal oxe Roog in a hiɓoora fa in no joong olaa Horeb.

³Refee yee fo daan in soom o Yaal oxe a dalnitu ngiɓoor neene, ndaa fa in wene itam na ñoowaa mene xaye.

⁴O Yaal oxe a laya fa nuun jaxrañ took o joong olaa, a ndeer fiɗel laa.

⁵Na waxtu faaga, mexe reeƭa ndeer o Yaal oxe fa nuun, ndax um daawin a nuun fa lay fee ten, yaam kaa nu saɗar’u fiɗel laa too nu ŋaayiid’ee took o joong olaa. Kaa lay’u yee:

⁶‹Mi refu o Yaal oxe Roog of, suttoonga no saax le Misira, me reeƭoona o paɗ.

⁷Faɗooxkiro a roog fa lakas faa refeerna mi.

⁸Fi’kiro nitaal mbaat samandaal naa o faɗooxaa nen a Roog of, ta ref ke na asamaan fee mbaat took lanq ke mbaat kam poofi ke ndefna ɗuga lanq ke.

⁹Gungkiro mbaambir den too faɗooxkiro a den, yaam mi o Yaal oxe Roog of, Roog fa naalu refum, faa na rabdinooxaa njofaƭar ne no paap ke took xa ƥiy den boo no suk ndadkandeer mbaat nahkandeer naa no we sibaxama.

¹⁰Kaa koy, naagaam o yirmaa boo no wiin cuni-cuni we mbexaxama, a ngayaa kebil es.

¹¹Ŋasitkiro gon le no Yaal oxe Roog of, yaam o Yaal oxe ñakkee o xaw oxe na ŋastaa gon um.

¹²Gayi bes fee na ñootnax ale, ndax o tedlandin, ne heblitoonga o ten, mi o Yaal oxe Roog of.

¹³Fat o jalaa ñaal ɓetuu fa leng, fi’aa teen calel of fop.

¹⁴Ñaal ɓetuu ƭikandeer ne koy, bes a ñootnax es oo, mi o Yaal oxe Roog of. Wariro jal teen tus, wo fo o ƥeef o ngoor mbaat o ƥeef o ndew mbaat surga of mbaat o mbindaan of mbaat qoox of mbaat o faam of mbaat njegel of nuu ta waagna waag o ref mbaat o gataakoon ole refna no mbind of, ndax surga of fo o mbindaan of a mbaag o ñootnoox nen a wo.

¹⁵Fat o wetandoox ee reeƭaa o paɗ no saax laa Misira, soo mi o Yaal oxe Roog of, um suttong maaga fo o ɓay o jegu doole le mi fo a naax es ale letnooxna. Ten taxu mi o Yaal oxe Roog of um heblong o roofand bes fee na ñootnax ale.

¹⁶Niwi a faap of fa ya of, ne heblitoonga o ten, ndax o xuuɗ too ɗaay kam saax le um ci’kang, mi o Yaal oxe Roog of.

¹⁷Warkiro o kiin.

¹⁹Guuɗkiro.

²⁰Seede’ankiro o kend of na xa maaƥ.

²¹Yaawkiro o tew no kend of mbaat mbind um mbaat o qol um mbaat surga um mbaat o mbindaan um mbaat qoox um mbaat o faam um mbaat tig lakas kaa ta jegna.›

²²Keene refu kebil ke o Yaal oxe a daawinna mbokatax ne nuun fop, a fi’tin o ñuxur o jegu doole took o joong olaa a ndeer fiɗel laa fo eel niɓu fo o niɓaan too ɓaatee teen dara. A binda a den took a alfa ƥil a ƭak soo a ɓoxotaam a den.»

²³«A cinj ye nu nanitna o ñuxur a ndeer o niɓaan ole, a soƥ o joong ole a kaƥaa ne ta fodeena fop, nuun fo aa-adax we na carind ake nuun fo maak we nuun fop nu matiid’axam

²⁴soo lay ee: ‹O Yaal oxe Roog in a lala a in o ndam um fo o magnel um, too i nana o ñuxur um a ndeer fiɗel le. Xaye boog i nga’a yee Roog a waaga o lay fo o kiin, soo oxeene a maad o ñoowaa.

²⁵Ndiiki koy, xar na taxkaa i njikooxaa xa ñis in? Fiɗel lene took o raaɓ a in a jofu. I ƥaatangaa o nan o ñuxur ole no Yaal oxe Roog in, xan i nqon.

²⁶O kiin oxum mosu o nan o ñuxur ole Roog fa ñoow jok fee, ne i nantuuna ta fangooraa a ndeer fiɗel le, soo a maad o ñoowaa?

²⁷Wo na matikkaa boog, o nan-giloox ke o Yaal oxe Roog in a laykaa, cinj kaaga o daawin a in fop ke ta laykang. Maaga, xan i nan-gilooxin soo mbi’in.›

²⁸O Yaal oxe a nana fa lay nuun fee nu layaxama soo a layaam ee: ‹Nanaam ke xeet fene a layoonga, too no ndigil a ndamu.

²⁹Kaa rek, a njeg’angaa xeeñ leene boo kili, a niwaam soo a ngay kebil es fop, a ƭaaykooga boo faw, den fo xa taan den.

³⁰Reti boog o lay a den da nomtoox no ƭiif den.

³¹Wo o mat, yoqi mene fa mi, too xam layong kebil ke fo bargal ke fo ke simtuuma o aqatkaa a den, ndax da ngay a den no saax le ci’uuma a den da njegkin.›

³²Fat nu ngay ndax nu ndeef ke o Yaal oxe Roog nuun a hebilna a nuun, mbañ o ƭap na ñamaak mbaat na janoon.

³³Fat nu ndeef deŋ a ƭat ale o Yaal oxe Roog nuun a fiisanna a nuun, ndax nu ñoow, ƭaay soo nquuɗ kam saax le nu njegkaa.»