Read NQAARIIT NE ROOG A cangatin ale 6 Bible Online

A cangatin ale 6 - NQAARIIT NE ROOG bible

A cangatin ale 6

¹Keeke ndefu kebil ke fo bargal ke fo ke simteena, too o Yaal oxe Roog nuun a heblit um aqatinin a nuun, ndax nu ngay a den kam saax le nu ndokkaa, njegkin.

²Neene, no ñoow o ñis nuun fop, fat nu saɗar o Yaal oxe Roog nuun soo nanan bargal ke fo kebil ke daawnuuma a nuun, nuun fo xa ƥiy nuun fo xa taan nuun, ndax nu nquuɗ.

³Nuun Ii-isra’el we boog, fat nu nan-giloox a den, ngay a den ndax nu ndeef a den. Neene, xan nu ƭaay too siw tigi kam saax le fo sis fo suum a ndaxritaa, ne o Yaal oxe Roog fee no daan nuun a laytuuna a nuun.

⁴«Wo Isra’el, nan-gilooxi! O Yaal oxe Roog in soom refu o Yaal oxe.[5]

⁵Xan o fex o Yaal oxe Roog of no xeeñ of fop, no laaw of fop fo na doole of fop.

⁶Kebil ke um cooxang xaye fat a ngen no xeeñ of.

⁷Fat o jangin a den xa ƥeef, jeepeetaa a den, yaa refoona kam mbind of mbaat a koƥ, yaa wondooxoona mbaat o jalaa.

⁸Fat o hum a den no ɓay of nen o anddiloor, fi a den na tagid of nen betandoor,

⁹bind a den na toodook ake na xa ton-maax axe fo no begax ke no teeru ke wo.»

¹⁰«O Yaal oxe Roog nuun xan a rokin a nuun kam saax le ta daaɓoox’ina fo daan nuun Abraham fa Isaak fa Yakoob ee xan a ci’in a nuun. Xan nu njeg teen teeru maak mosu kaa nu maxeerna

¹¹fo pind kaa naangna muut fo kalal kaa nu mbokateerna fo kas kaa nu mbaqeerna fo taxar biiñ fo taxar oliiw kaa nu njimbeerna. Yaa nu ñaamkaa teen boo naang tem,

¹²fat nu mbootoox o mbeecit o Yaal oxe sutna a nuun no saax laa Misira, maa nu ndeeƭna faɗ.

¹³Fat nu saɗar o Yaal oxe Roog nuun, mbaɗooxan ten doŋ soo ndaaɓooxaa no gon um soom.

¹⁴Nu mbaɗooxkee roog lakas, roog ke no qeet ke na mbidkaa a nuun.

¹⁵Nu mbi’angaan, xan fuux le no Yaal oxe a biltooxan a nuun soo ta moocand a nuun took lanq ke, yaam o Yaal oxe Roog nuun Roog fa naalu a refu a ndeer nuun.

¹⁶Nu ƭeetlooxkee o Yaal oxe Roog nuun, ne nu ƭeetloorit’uuna Maasa,

¹⁷ndaa fat nu ngay a paax kebil ke ten, ke ta dalinna fo bargal ke ta daawinna a nuun.

¹⁸Fat nu mbi’aa ke jofna fo ke faaxna na kid no Yaal oxe, ndax nu ƭaay too ndok no saax faaxaan le o Yaal oxe a daaɓooxna fo daan nuun ee xan a ci’in a nuun

¹⁹soo ndax fañ nuun we ngenna teen fop, ne o Yaal oxe a laytuuna.

²⁰O feet olaa feet, yaa xa ƥiy nuun a laamitkaa a nuun ee: ‹Xar taxu o Yaal oxe Roog in a coox a nuun bargal kene fo kebil kene?›,

²¹fat nu ndoon a den ee: ‹Kaa i ndeeƭu faɗ Firawon fee kam saax laa Misira, soo o Yaal oxe a sutit a in maaga fo o ɓay o jegu doole le ten.

²²I nga’ooda xa anddiloor fo comlaand maak ke o Yaal oxe a xawitna a Firawon fee fo mbind um fop.

²³Cinj kaaga, a suta a in maaga, a ɓisiid a in no saax le ta daaɓoox’ina fo daan in ee xan a ci’in a in.

²⁴O Yaal oxe kaa hebil a in i ngay bargal keene fop too saɗar o Yaal oxe Roog in, ndax i ƭaayaa kili, soo ta xaƴ a in i ñoowaa, ne ta fi’tuuna boo no ñaal roog ne xaye.

²⁵Boo i ngayna kebil keene fop ndax i ndeef a den, ne ta heblituuna a in, xan i njof mbaambir no Yaal oxe Roog in.› »