Read NQAARIIT NE ROOG A cangatin ale 7 Bible Online

A cangatin ale 7 - NQAARIIT NE ROOG bible

A cangatin ale 7

¹«Yaa o Yaal oxe Roog nuun a rokinkaa a nuun no saax le nu njangkaa ndax nu njegkin, xan a rax mbaambir nuun qeet mayu keeke: Heeheet we, Giigirgasi we, Aa-amori we, Kaakanaan we, Peeperisi we, Hiihiwi we fo Yeeyebus we, da ndef qeet ɓetuu ƭik kaa moƴna o may a nuun, a moƴ o njeg a nuun doole.

²Yaa o Yaal oxe Roog nuun a ɓoxotkaa a den na xa ƥay nuun boo nu nqaw a den, fat nu kesanin a den. Nu ngiɓoorkee fa den too nu yirimkee a den.

³Nu ndolnirkee fo qeet keene, too nu ci’kee xa ƥiy xa tew axe nuun xa ƥiy xa koor axe den mbaat nu ngilgan xa ƥiy xa koor axe nuun na xa ƥiy xa tew axe den.

⁴Nu mbi’angaan, xan da tax xa ƥiy nuun a mbes o Yaal oxe a cinj, a mbaɗook roog lakas, too yaaga xan fuux le no Yaal oxe a biltooxan a nuun, soo ta moocand a nuun no ñofu.

⁵Neeke kañ nu mbaru o mbesoor fa den: Fat nu njiƭit xa sadaxand axe den, ngef a ƥil ake da mbaɗooxaa, yaq xa taaƴ xa lupe xe Asera fee da mbi’na roog den soo ndox nitaal roog sexe ke den bo dee riw.

⁶Kaa nu ndef xeet faa kesaneena o Yaal oxe Roog nuun. Ten jilu a nuun, ndax nu ndef xeet faa ta jegoodna a ndeer qeet lakas ke no lanq ke fop.»

⁷«O ga’angaa o Yaal oxe a damoox na nuun, a doon teen a jil a nuun, refee yee yaam kaa nu moƴ’u o may qeet lakas ke. O ɗeetangaan fo qeet lakas ke sax, nuun moƴu o neew a den.

⁸Kaa koy, o Yaal oxe kaa fex a nuun too a fadnana a nuun ke ta daaɓoox’ina fo daan nuun. Ten taxu a sutta a nuun o ɓay o jegu doole le ten no saax le nu ndeeƭna faɗ, a jaɓit a nuun na xa ƥay Firawon fee o maad Misira.

⁹Fat nu and boog ee o Yaal oxe Roog nuun soom refu Roog. Kaa gore too a gayaa ngiɓoor um fo o paaxel um boo no suk cuni-cuni no we mbexuuna, a ngayaa kebil um.

¹⁰Kaa koy, a naaga o rabdinooxaa took no we sibuuna soo a saŋik a den. Kaam ee kaa rabdaa no ñofu we sibuuna.

¹¹Fat nu ngay boog kebil ke fo bargal ke um cooxaa a nuun xaye, ndax nu ndeef a den.

¹²Nu nananangaa bargal ke ten, ndeef a den a paax, yaaga xan o Yaal oxe Roog nuun a gay ngiɓoor um fa nuun fo o paaxel um na nuun, ne ta daaɓoorit’uuna fo daan nuun.

¹³Xan o Yaal oxe a fex a nuun, a barke a nuun soo a mayƭand a nuun, xa ƥiy axe ngatna no laaw nuun a naang gañ. Xan a barke ke lanq ke nuun a mbatkaa, bele fee fa biiñ fa nqas fee fa diwliin fee. Xan a barke itam xa siir axe nuun, da may fo xa qeel fo a ked ake nuun, da may xa pote. Xan a ci a nuun barke feene fop kam saax le ta daaɓooxna yee xan a ci’in daan nuun.

¹⁴Nuun na moƴkeel o mbarke qeet lakas ke fop. O koor o yoomu mbaat o tew o timar jegkee na nuun mbaat njegel nqatu ndeer cegel ke nuun.

¹⁵Xan o Yaal oxe a guutatirand a nuun fo a cir ake fop too doonkee a nuun a leng na seel ake nu anditna Misira, ndaa xan a ɓakand a den me no we sibna a nuun fop.

¹⁶Fat nu moocand qeet ke o Yaal oxe Roog nuun a ɓoxotkaa na xa ƥay nuun. Ba nu yirim a den, too ba nu mbaɗoox roog ke den, yaam kaaga mbog a refkaa na nuun.»

¹⁷«Xeƈa xan nu layaa taa kam nuun ee: ‹Qeet kene moƴu o may a in, nam i mbaagkaa ndaxit a den boog?›

¹⁸Baa keene tax nu saɗar a den. Mbetandooxyo ke o Yaal oxe Roog nuun a fi’na a Firawon fee fo Miimisira we fop.

¹⁹Nu nga’ooda coono ƭomu ke fo xa anddiloor axe fo comlaand ke o Yaal oxe Roog nuun a doonna a den, ye ta sutitna a nuun Misira fo o ɓay o jegu doole le ten fo a naax ale ten letnooxna. Neene deŋ o Yaal oxe Roog nuun a fi’kaa qeet ke nu saɗaraa.

²⁰Xan o Yaal oxe Roog nuun a heblaniid a nuun poopolyaam sax, da yen took den, boo yaa we na maadkaa o yoqaa too a ƭaskaa a nuun a saŋkooxna.

²¹Ba nu send mbaambir den, yaam o Yaal oxe Roog nuun oxey a ndeer nuun, Roog fa maak fa saɗarnooxu fee.

²²Xan o Yaal oxe Roog nuun a palaa qeet keene o ndang o ndang nuu nu mattiidaa. Nu moocandkee a den jaf leng kut, yaam ndik ƥaaɓaan ke a ndimatir, too yaaga faaxkee na nuun.

²³Xan o Yaal oxe Roog nuun a ɓoxot a den na xa ƥay nuun, a firɓand a den boo yaa da moocandkeel.

²⁴Xan a ɓoxot maad we den na xa ƥay nuun, nu ñuf a kon den ɗuƭ ɗuga asamaan fee. O leng daagooxkee mbaambir nuun, ndaa xan nu moocand a den.

²⁵Fat nu ndox xa taaƴ axe no roog ke den. Nu yaawkee xaaliis fee mbaat wurus fee refna took xa taaƴ axeene, too nu njangkiran, yaam ndik ta ɓek a nuun nu mbaɗooxaa roog tefee ndigil ke. O Yaal oxe Roog nuun kaa sib keene.

²⁶Nu ƥekkee cakalaaru keene kam pind nuun, yaam ndik nu ndef moocandel nen a den. Fat nu ƭeetin nen cednooxu fo cakalaaru, yaam moocandel a ndefu.»