Read NQAARIIT NE ROOG A cangatin ale 8 Bible Online

A cangatin ale 8 - NQAARIIT NE ROOG bible

A cangatin ale 8

¹«Fat nu ngay ndax nu ndeef kebil ke um daawnaa a nuun fop xaye. Neene, xan nu ñoow, ndimatir soo njang saax le o Yaal oxe a daaɓoox’ina o ci daan nuun.

²Fat nu mbetandooxaa a ƭat ale o Yaal oxe Roog nuun a xotnoorna a nuun fop kam a koƥ-a-ƥor ale na xa kiid qarɓeen nahik axeene. A doona a nuun coono mayu, ndax ta ɗeetloox a nuun boo a ga ke refna kam a qeeñ nuun, a and ndax nu mbuga ndeef kebil ke ten, ndax nam.

³A cinj coono keene fo a cinj ye ta ñaatlanditna a nuun nqeex, a ci’a a nuun maan fee, ta ref ñaamel kaa nu and’eerna, daan nuun and’iran. Neene, a lala a nuun ee o kiin ñoowitkee ngaaf soom, ndaa fo fa lay fuu sutoorna no don no Yaal oxe.

⁴Toki nuun ƈaxooxee, too a caf nuun mboloxee na xa kiid qarɓeen nahik axeene.

⁵Andyo a paax boog ee o Yaal oxe Roog nuun kaa yaraa a nuun ne faap a yartaa o ƥeem.

⁶Fat nu ndeef kebil ke no Yaal oxe Roog nuun, ñaaƴ na ƭat um too saɗarin.»

⁷«O Yaal oxe Roog nuun xan a rokin a nuun no saax faax, saax laa jegna a ƈufnand fo a cur fo poofi mayu kaa na mbaltaa na yulanq ake fo na xa coong axe,

⁸saax laa jegna bele fa lorso fo taxar biiñ fo tun fo taxar goronaad, a jeg itam taxar oliiw fo suum,

⁹saax laa ñaamel nuun a ndangkeerna, too nu ñakkee dara, saax laa a ƥil ake a ndefna celem, soo nu ñaƥtaa xanjar na xa coong axe.

¹⁰Yaa nu ñaamkaa boo naang tem koy, fat nu ngidim o Yaal oxe Roog nuun yaam saax faaxaan le ta ci’na a nuun.

¹¹Fat nu mbootoox o mbeecit o Yaal oxe Roog nuun, boo mbañ o ndeef kebil ke ten fo bargal ke ten, um daawnaa a nuun xaye.

¹²Yaa nu ñaamkaa boo naang tem, max pind mosu soo ngen a den,

¹³yaa xa siir axe nuun fo a ked ake nuun a ndimatirkaa, xaaliis nuun fa wurus nuun ee gañ, soo ke nu njegna fop a may muut,

¹⁴fat nu mbootoox o magnandoox, mbeecit o Yaal oxe Roog nuun sutitna a nuun no saax laa Misira, maa nu ndeeƭna faɗ.

¹⁵A ñaaƴnoora a nuun na koƥ-a-ƥor a maak a saɗarnooxu le pangool cegu daŋat fo a beex a ngenna. Kaa koy, no lanq beeru koroŋ keene jegeerna o mboofi, a balnanta a nuun foofi no ɓil saƭku koŋ.

¹⁶A ñaamnoora a nuun kam a koƥ-a-ƥor ale maan fee daan nuun a and’eerna. A doona a nuun coono, ndax ta ɗeetloox a nuun, cinj kaaga ta fi’an a nuun paax.

¹⁷Ba nu lay taa kam nuun boog ee doole nuun fo o saƭkel xa ƥay nuun ci’u a nuun halal feene.

¹⁸Fat nu mbetandoox ee o Yaal oxe Roog nuun na ci’aa a nuun doole faa nu njegitna halal feene, ndax ta saƭkand ngiɓoor ne ta daaɓooxna fo daan nuun, ne ta fi’tan boo xaye.

¹⁹Kaa koy, boo nu mbeecitna o Yaal oxe Roog nuun, ndeefaa roog lakas ke, mbaɗooxaa a den, ngungaa mbaambir den, mexe layaa a nuun xaye yee yaaga xan nu saŋkoox.

²⁰Nu nan-gilooxangee o ñuxur no Yaal oxe Roog nuun, xan nu saŋkoox nen qeet ke o Yaal oxe a saŋikkaa mbaambir nuun.»